Вторник, марта 19, 2024
Важное



Сонензэ пшкалить чинек-венек. Эрьвантень бажи лездамс, киньгак а кадомс мельтеме, весенень максомс эрявикс лезкс. Кортамось моли Елена Петровна Подлияновадо. Авась важоди Ицялбуень Рождествено велесэ «Сельхозтехника» РТС-нь ФАП-нь прявтокс. Те таркасонть сон роботы 2016 иестэ саезь.



Елена Петровна чачсь Украинасо. Тонавтнесь Запорожской медицинской училищасо. Важодемань кизэ ушодовсь эйкакшонь областной больницясо. Мейле ульнесь школань медсестракс. Седе тов вейксэ иень перть важодсь онкологиянь больницянь хирургиянь отделениясо, косо лецявсть стакасто сэредицятне.

2014 иестэ Донбассо чавовсь вечкевикс мирдезэ. Иень ютазь авась сась эрямо Мордовияв, тесэ ульнесть содавиксэнзэ. Ломантне вастызь паро мельсэ, лездасть валсояк, тевсэяк. Ды нейгак лездыть. Паро, Елена Петровнань ули медицинской образованиязо. Сонензэ сеске муевсь важодема тарка. Кавто иеть роботась «скоройсэ».

«Сельхозтехникань» прявтось Ф. Б. Корнаухов ФАП-сонть тейсь вадря витнема-петнема, ули эрявикс оборудования, ансяк важодть. Сон зярдояк а эрси чаво. Минь неинек эсенек сельмсэ, зярдо тосо ульнинек, ломантне вейке-омбоце мельга капшасть медпунктов. Эрьванть авась васты мельспаросо, кортни, мизолды, ёвты лембе валт.

Фельдшерэнтень пшкалить эрьва кодамо мелявкс ды сэредькс марто. Сон тейни уколт, путни прививкат, якси кудова стакасто сэредицятнень ланга, чийни тердемань коряс.

– Монь участкасон 200 ломанть, ламо эйкакшт. ФАП-нтень кандови Рождествено велень вейке пельксэсь, Оброчное посёлкань станциясь. Седе сеедьстэ ломантне пиштевтить гипертониядо, ламонь кузни покш давленияст. Медпунктсонок ули аптекаяк. Весе эрявикс надобиятне улить: давлениядо, седейде, противовируснойть, антибиотикть, сэредьксэнь саицят, керявксто-ваткавксто ды седе тов, улить шприцт. Мезе ломантне вешить – сень ускан тенст, – ёвтни Елена Петровна.
Истя жо сон тейнесь ковидтэ ламо прививкат, ней – ютавты ревакцинация.

Рождественасо Е. П. Подлиянова рамась кудыне. Тиринь ёнксов а соды, зярдо сави пачкодемс, тень коряс пек ризны, эдь тосо кадовсть эйкакшонзо, малавиксэнзэ. Весе юткошканзо сон ютавты важодема таркасо, натой оймсема чистэяк сакшны тей. Валонзо коряс, те шканть перть, зярс тесэ эри – кияк эзизе покорда. Кода кортыть, бути улят алкуксонь ломанекс – тонь мартояк кармить ломанькс.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».