Вторник, марта 19, 2024
Важное
(Геннадий Гребенцовонь творчествадо)
(Ушодксось газетань 25-це номерсэнть)

Поэтэсь свал кирди седейсэнзэ тиринь Бозаёвонзо, косо ютавтызе эйкакшпингензэ, косо кармась вечкеме пертьпельксэнть мазычинзэ ды чарькодеме эрямонь зэменть. Веле юткова чудиця Бозов лейнесь сонзэ туртов сехте мазый ды седейс совиця.


Бозов лейнесь – сэнь сурине,
Сон певтеме ды теине,
Жойнезь чуди, кольнезь чии,
Сонзэ вечксы эрьва кие.
«Бозаёв»

Сонензэ тесэ весемесь малавикс, весемесь кенярдовты, вити мель.
Тиринь ёнксось свал максы Г. Гребенцовнень шкинемань од вийть. Те парсте неяви сонзэ «Вирень лисьмапря» стихень пусмостонть, конадонть В. И. Дёмин профессорось кортась: «Минек икеле ламо тюссто стазь поэзиянь дневник. Эйсэнзэ мельстуезь ёвтневи велень школадо, косо лирикань героесь таштась эрямодо васенце содамочить, тиринь кудодонть, конадонть арсематне кандыть оймень лембе, максыть кемема эсь вийтненень, васенце тонавтыцядонть, кинень пшкадят стака шкасто, ялгадонть, ки марто ютавтык штапо-кепе эйкакшпингенть.

Теде кортави седей марто, стакасто лексемавтомо. Кемевтить тесэ эрявиксстэ ды тевень содазь кочкавт художественной ёнкстнэ (детальтне), ваньксчись, лия ёнов а молиця вановтось. Сынст прявт виесь – весементень эрямонь коштонть совавтомась, мазычинтень, мода лангсо эрямонтень кенярдомась».
Профессоронь валтнэнь кемекстыть «Эйкакшпингень лей», «Чачома ёнкс», «Тиринь мастором ды авам», «Чачома веле», «Кудов», «Велем монь седейсэ» ды лия стихотворениятне.
Седейшкавань валсо поэтэсь ёвтасы вечкеманзо тиринь велентень – чачома ёнксонтень.

Чувтонь, артозь кудот
Стякшность лейчирева.
Тондеть паро мелем,
Морыть тень цёковом.
«Чачома веле»

Сонзэ свал терди тиринь кудось, конань марто сюлмазь сехте валдо ледстнематне.

Таго, таго, кудов таго
Течи эскелян.
Ванан, кедьсэ тень аволи, –
Каршон авам лиссь.
«Кудов»

Сонензэ тиринь кудось – те авазо, эйкакшпингеде валдо ледстнемат, пертьпельксэнь мазычись. Секскак сынст эйстэ поэтэсь корты талновтыця валсо, конатне молить седейстэ, кепедить ёжонь сехте салавань бажамотнень-мельтнень.
Стихень пусмосонть покш тарка явови пертьпельксэнь лирикантень. Тиринь паксятне, виртне вельмевтить поэтэнть седейс валдо арсемат, кенярдомань мельть.

Тундонь чистэ совинь
Тусто виренть потс.
Мон симеме коминь,
Перькам – цецяв коцт.
Сэрей пичеть, тумот,
Вант, стясть икелень.
Теке роднякс умок
Сынь теевсть монень.
«Вирьсэ»

Поэтэсь вейсэндяви тиринь пертьпельксэнть марто – сон сонзэ аявовикс пельксэзэ. Тесэ прянзо мари уцяскавокс, тесэ весемесь мельстуиця, седейс совиця ды валдо арсемань сыргавтыця. Виресь, лугась, конатне поэтэнть седейсэ, мазыйть эсь мазысэ, сынст ули лия ёнов а молиця, сельмс а каявиця тюсост. Сонзэ чувтотнень «шальть пижеть кайсезь-сюлмазь пряваст», «чинть ало кецить, Сельмезэнь ваныть. Якстернеть, ожот, Сэняждицят сынь, Эждить потмоёжо, Вечксызь эрьва кинь». Истямо мазычинть поэтэсь бажи ванстомс, пачтямс лиятненень.

Кода эрямосонтькак, Г. Гребенцовонь лирикасонзо валдо, мазый тюстнэде башка вастневить нусманячитькак, конатне тагояк парсте невтить пертьпельксэнть полавтовоманзо.

Уить пельть мацеекс,
Нусмакадсть ней садт.
Килейтнень юткова
Пиземесь поцердсь.
«Сёксень килейпуло»

Сёрмадеенть ламо стихензэ теевсть морокс. Истямо поэтической строчкадо мерить «музыкальнойть». Стихензэ лангс сёрмадозь моротнень морсить содавикс артистт ды эйкакшт. Ламо ёвтнеманзо ды стихензэ совасть школань тонавтнема книгас.

Поэтэсь малав иень эрьва шкантень-пельксэнтень алты стихотвореният, конатнесэ парсте тешкставить сынст башка ёнкстнэ, мазычись. Сон эрявикс тюссо арты тундонть, кизэнть, сёксенть, теленть.

Г. Гребенцовонь, кода алкуксонь эрзянь ломаненть, седеезэ сэреди тиринь раськенть, келенть, культуранть кис. Ризнэманзо сон ёвты «Валдо юбилей», «Саранск», «Ояксчисэ», «Тиринь мастор», «Эрзянь кель», «Вечкевикс кель…», «Монь келем» стихотворениятнесэ. Тиринь келенть сон вечксы, бажи ванстомонзо, корты сондензэ лембестэ.

Тон прок вирьсэ валскень эрьке,
Мазыят, вечкеват.
Эрьва валот – авань эрьгтне,
Конатне мештеват.
«Монь келем»

Вечкевикс кель, монь эрзянь кель,
Тон ойме менькс, тон паро мель.
Тонь эйсэ авань ловсонь тансть,
Эйсэть пингень трокс покштям
кандсть.
«Вечкевикс кель…»

Поэтэсь терявтни эсензэ стихотворениятнесэ сыргавтомс тиринь келень ды раськень ванстомань ды сюпалгавтомань мель. Минь несынек сонзэ «гражданской позициянзо» – сон весе вийсэ тиринь келенть ванстоманзо кис.

Г. Гребенцовонь лириказо умок лиссь келей эрямос аволь ансяк эрзянь, лия кельтнесэяк. Теде кортыть рузонь, мокшонь, удмуртонь ды лия кельтнес сонзэ стихотворениятнень ютавтовкстнэ. Стихень ютавтомась – стака тев. Васняяк, эряви мельсэ кирдемс, кода ванстомс раськень эсь ёнксонть, мейле – муемс куншканть мазычинть ды видечинть ютксо. Васенцесь толковави истя: стихотворениясонть невтевить раськень эрямонь ёнкстнэ, сонзэ келенть вельде ёвтавить художественной образтнэ. Лия кевкстемась: кодамокс теемс ютавтоманть – смустень седе видестэ кандыцякс эли ютавтома кельсэнть седе мазыйстэ гайгицякс? Ютавтомасонть а мереви ёмавтомс подлинникенть художественной зэмензэ, ды теке марто эряви ванстомс сонзэ форманзояк. Сынст вейсэндямосонть эрявикс смустеськак. Эрзянь поэтэнть ютавтыцянзо малав педе-пес топавтызь неть вешематнень.

Рузонь кельс Г. Гребенцовонь стихотворениянзо ютавтыцятне – Мордовиянь заслуженной поэтэсь А. Громыхин, рузонь поэттнэ А. Терентьев ды А. Бакулин, эрзянь поэттнэ М. Втулкин ды Т. Мокшанова. Ютавтозь стихотворениятнесэ ванстовить сынст эстетикань-художествань башка ёнксост. Ютавтыцятне парсте содасызь ды чарькодьсызь поэтэнть сёрмадомань лувонзо, пертьпельксэнь мазычинть невтиця валонзо. Весемесь те лезды теемс истят ютавтовкст, конатнесэ сынь, малав кода авторось, ёвтнить эрямодонть ды пертьпелькстэнть, невтить сынст мазычинть.

Седе ламот ютавтовкстнэнь теинзе А. Громыхин, мезесь корты авторонть ды ютавтыцянть ютксо кеме сюлмавомадонть, шкинемаст малавиксчиденть. Нама, те седеяк вадрялгавты ютавтозь стихотворениятнень, лезды видестэ пачтямс эйзэст совавтозь смустенть ды лирикань мазычинть. Авторонть ды ютавтыцянть ютксо кеме сюлмавоматнеде кортыть «Веснушки» ды «Снежные звёздочки» эйкакштненень алтазь рузонь кельсэ нолдазь стихень пусмотне. Васенценть целанек ютавтызе А. Громыхин. Омбоцесэнтькак сонзэ ютавтовкстнэде сехте ламо.

Мокшонь кельс «Снежные звёздочки» («Ловонь тяштенят») стихень пусмонть ютавтыцязо Мордовиянь заслуженной поэтэсь Рая Орлова.
Г. Гребенцовонь эйкакшонь стихотворениянзо ютавтовить финнэнь-угрань лия кельтнескак. Истя, Ижевскойсэ 2014-це иестэ лиссь «Нюлэс вöтъёс» («Вирень онт») удмуртонь кельс ютавтозь стихень пусмозо.
Г. Гребенцовонь эйкакшонь лириканть лия кельс ютавтомась корты сонзэ художественной паро ёнкстнэде, вишка ловныцятненень мелезэст туемадонзо, эйсэнзэ тонавтоманть ды эстетиканть парсте вейсэндямодонть. Кода эйкакшонь паро автор сон совавтозь «Антология детской литературы народов России» книгантень, конась нолдазель Российской Федерациясо раськень литературатненень лездамо программанть топавтомга. Антологиянтень весемезэ совасть ведьгемень вете кельстэ рузонь кельс ютавтозь кавксосядт сизьгемень сёрмадовкст. Эрзянь пельксэнтень, Геннадий Гребенцовонь стихотворениятнеде башка, совасть Числав Журавлёвонь, Татьяна Разгуляевань ды Любовь Дергачёвань сёрмадовксост.

Г. Гребенцовонь лириказо, конасонть гайгить кода эйкакшонь, истя покш ломаненьгак тематне, теевсь неявиксэкс минек литературасонть. Сонзэ ули эсензэ тюсозо, неявикс башка ёнксозо, мезесь корты сёрмадеенть ёрокчидензэ те жанрасонть важодемстэ.

Эряви меремс, Г. Гребенцовонь шкинемазо – те аволь ансяк поэзия. Сон терявтни виензэ прозасояк, кона полады поэзиясо кепедезь мельтнень-арсематнень. Сехте ламо важоди ёвтнемасонть. Тагояк эйстэст ламотне алтавить вишка ды од ловныцятненень. Теде кортыть «Ёжов ур», «Кодамо тюсонь ведесь», «Чиньжарамо» пусмотне.

Васенцесь нолдазель 1981-це иестэ. Эйзэнзэ совавтозель эйкакштнеде, сынст обуцядост, ёжомарямодост кевейкее ёвтнема, косо васенце таркасо ашти паро тевень теемас тонавтома, покштненень эрьва мейсэ лездамо кармавтома. Ламотнесэ сёрмадеесь невти эйкакштнень ды покштяст-сырькаест ютксо кеме сюлмавоманть. «Лисьмапря вакссо» ёвтнемасонть эйкакштненень покштяст ёвтни ютазь шкадонть, вельмевти эйзэст бажамо – содамс, кода эрясть икеле, кодат изнявкст теезельть уцяскав эрямонтень молема кинть лангсо.

Ёвтнематнесэ ламо мель явови эйкакшонь важодемантень. «Колянь бригадазо», «Мишань ялгазо» ёвтнематнесэ невтеви, кода школасо тонавтниця эйкакштне лездыть кастомс, ванстомс ды пурнамс сюпав урожай. Пертьпельксэнь ванстомадонть моли кортамось «Чувтов латко» ёвтнемасонть. Сонзэ персонажтне – велень эйкакштне – озавтыть чувтот ды лоткавтсызь латконть ды лейчиренть каладоманзо. «Ёжов урсонть» вишка ловныцятне теевить содавиксэкс сёксень мазычинть ды эряза уронть телентень анокстамонзо марто.
«Кодамо веденть тюсозо» пусмосонть (нолдазь 2005-це иестэ) Г. Гребенцов тагояк, эйкакштнень прянь ветямонть парсте содазь, полады сынст эйстэ кортамонть. Пусмонтень совавтозь ёвтнематне панжить вишка ломантнень мелест-арсемаст, ёжомарямост.

Пусмонтень совавтозь ёвтнематне кандыть тонавтомань-кастомань смусть. Эйсэст кортамось моли ломанень тевтнеде, конатнень марто содавтовить вишка персонажтне, ды сёрмадеесь аламонь-аламонь, апак фатя, тонавты сынст те тевенть тееме ды вечкеме. Книгань вишка геройтне лездыть тетяст-аваст туртов эрьва мейсэ.

Неявикс тарка пусмосонть саить пертьпелькстэ ёвтнематне. Эйкакштне кармить содамо, мекс нумолось полавты тюсонзо («Сёксень нумолкай»), кода эряви озавтнемс-видемс касовкст («Цецине»), мейсэ пси кизэстэ пизементь лезэзэ («Паро пиземе»)… Неть ды лия ёвтнематнень вельде сёрмадеесь бажи кармавтомс эйкакштнень вечкеме ды ванстомо пертьпельксэнть. Тенень лездыть ёвтнематнесэ вастневиця лирикань ёнкстнэяк.

Г. Гребенцовонь ламо ёвтнемасонзо невтеви вишка героенть ды кудонь ракшатнень ютксо ояксчись. Сехте кеме сон азоронть ды эрьва мейсэ лездыця кисканть ютксо («Оя», «Алкуксонь ялга»). Каткаськак, конань сынь вечксызь ды ванстыть эрьва кодамо зыяндо, эйкакштненень паро ялга («Порксазь кринка», «Лездыцят»).

Сёрмадеесь, эйкакшонь содамочинть мельсэ кирдезь, эсензэ ёвтнемань лувонть теи сыненст чарькодевиксэкс. Келезэ мельстуиця, сон машты кочкамо эрявикс валт, парсте теи валрисьметнень. Весемесь те кепеди ловнома мелест.

Юрий АНТОНОВ,
Н. П. Огарёв лемсэ НИ МГУ-нь
филологиянь наукань доктор.

(Пезэ сы номерсэнть).
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».