Суббота, сентября 18, 2021
Важное
Покш Игнатбуень Вармазейка велесь аволь покштнень эйстэ, ашти жо райцентрадонть овсе аволь васоло. Аволь умок минь содавтынек те эрзянь веленть ды ванынек, кода ды мейсэ эрить тесэнь ломантне, кодат полавтомат тесэ лиссть меельце шкастонть.
Покш кистэнть веленть ёнов велявтозь, минек васты сехте эрявикс ды покш полавтомась – Вармазейка велентень теить вадря од ки. Кода тешкстызь велень эрицятне, истямо казненть сынь учить уш умок. Ды вана ней сынст бажамост топавтови. Кинь теемась ветяви «Безопасные и качественные автомобильные дороги» национальной проектэнь программанть лувсо.

Эряви меремс, неень шкане вадря китне пек эрявикст покш ошсояк, вишка велесэяк. Вармазейканть туртовгак сон пек эрявикс. Велесь аволь кадозь. Сон эри. Ды кода тешкстыть тесэнь эрицятне, велесь эри важодема таркатнень улеманть кувалма, конатнень максыцясь, аволь ансяк тесэнь, райононь ламот лия велетнень эрицятнень туртовгак, Владимир Юрьевич Кабаевень крестьянонь-фермерэнь хозяйствась. Аволь ламо шкань перть тесэ стявтсь-пурнась ракшань трямонь ферма ды панжовсть важодемань од таркат.



Весемесь ушодовсь 2004-це иестэ. Владимир Кабаев Н.П. Огарёв лемсэ МГУ-нь Аграрной институтонть прядомадо мейле карми важодеме прявт зоотехникекс райононь велень хозяйствань управлениясо. Роботась тензэ вечкевсь ды зярыя иетнень перть топавтсь сонзэ покш мельсэ. Ансяк вана Владимирэнь ульнесь вейке покш арсемазо – ушодомс эсензэ тев. Эдь эштё овсе вишкине цёрынекс сон свал чийниль фермав ваномо, кода скалонь потявтыцятне потявтыть скалтнэнь, бажиль тенст лездамс. Ды те меленть-бажамонть, ракшатненень вечкеманть сон кирдсь ламо иетнень перть. Секскак специальностенть получамодо ды эрявикс опытэнть пурнамодо мейле сон арси пурнамс эсензэ хозяйства ды целанек алты эсь прянзо вечкевикс тевентень.

Владимирэнь тетязо, Юрий Алексеевич, васняяк мольсь цёранзо арсеманть каршо. Сон пек парсте содыль весе неть тевтнеде. Надежда Андреевна нинзэ марто весе эрямост алтызь колхозсо важодемантень ды фермерэнь тевентень. Ансяк цёраст эзь кунсоло ды кеместэ ютась эсь тешкставт целентень. Ды, эряви меремс, эсь меленть сон топавтызе.

Эсь хозяйстванть Владимир Кабаев ушодызе весемезэ кемень скалсто. Аламонь-аламонь эсь стаданть кастызе комсь скалс. 2006-це иестэ Кабаевтне сайсть 300 тыщат целковоень покшолмасо кредит. Неть ярмактнень лангс «Развитие семейных животноводческих ферм на базе крестьянских (фермерских) хозяйств» программанть юрсо стявтызь эсь васенце ферманть (100 скалс). Мейле «Семейная животноводческая ферма» программань грантонь ярмактнень лангс стявтовсь эштё вейке комплекс.

Шкась мольсь, хозяйствась кассь-виензась. Неень шкане тесэ роботыть 85 ломанть. Конат тескень, Вармазейкань, конат састь райононь лия велетнестэ, улить шабра Нижегородской областьстэяк. Течи хозяйствасонть лововить тёжадо ламо сюракшов ракшат. Потявтовиця скалтнэде – нилесядто ламо. Эрьва скалсто сутказонзо потявтови 22 литрат ловсо. Фермерэнть кедьстэ сонзэ рами Саранск ошонь «Данон» компаниясь, конань марто важодить малав уш кемень иеть. Истя жо хозяйстванть 700 гектардо ламо моданзо. Седе покш пельксэсь эйстэст – 500 гектартнэ – эсензэ хозяйстванть. Лиятнень жо саить арендас эрицятнень кедьстэ. Тень кис ломантненень эрьва ие максови сюро. Тесэнь эрицятнененьгак паро, пакся тикшесь а колы модатнень, хозяйствантеньгак ули ков сюронть-тикшенть видемс. Истя, тедеде сюротнеде видезь 700 гектардо ламо ды 200 гектардо ламо кукуруза.
Тешкстама, хозяйствасонть ули весе эрявикс техникаськак: тракторт, комбайнат, сокамонь-видемань туртов агрегатт. Малав эрьва ие тракторонь-машинань паркось одкстомтови, рамави мезеяк од. Истя, ютазь иестэ рамазь сюронь ды тикшень урядамонь од комбайнат, икеле иестэнть – «Кировец-230 СТ» трактор.



Кода тешкстыть механизатортнэ, неень шкань техникась важодемань туртов пек вадря. Сон эряза, ули эйсэнзэ весе эрявиксэсь.
Зярдо минь ульнинек Вармазейкасо, крестьянонь-фермерэнь хозяйствань паксятнесэ мольсь телентень тикшень анокстамось. Тикшень ледема комбайнань руленть экшсэ важодсь Андрей Матвеевич Куманев. Цёрась сонсь Андрейвелень ды вана уш кото иень перть важоди тесэ.

– Мон уш пенсиясан, а кудосо тевтеме аштемс кода-бути а ён. Эсенек велесэ колхоз арась, роботамс а косо, – ёвтни Андрей Матвеевич. – Тесэнь хозяйствадонть жо марсинь аволь весть. Арсия самс ды варчамс. Ды вана уш кото иеть тесэ роботан. Ней теленень тикше анокстатано. Курок ушодови сюротнень урядамось, озан лия комбайнань руль экшс. Техниканть марто курок кель-вал муян, эрямонть перть эрьва кодамосо савкшнось роботамс.

Истя жо А.М. Куманев тешкстызе, кадык эри Вармазейканть эйстэ ве ёно, тей ардтнеманть коряс мелявкст арасть. Весе важодицятнень хозяйствась пачти эсь транспортсо. Теке марто тесэ мелявтыть андоманть коряскак. Ули вадря столовой, косо весень туртов пидеви ярсамопель. Обедтэ ды ужиндэ мелявтомс а эряви.

А вана Павел Викторович Абрамов ды Михаил Михайлович Французов тесэ важодить ракша мельга якицякс. Цёратне кавонест Игнатвелень. Сынст лангсо ракшатнень андомась, алксост ванськавтомась, бути улить вазыиця скалт, сынст мельга ваномась ды вазыявтомась.
– Эрьва кодамо таркасо савкшнось роботамс, ламо иень перть ульнинь связистэкс. Зярыя иень перть важодинь Од Кшуманця велень колхозсо. Мейле сынь тей ды вана уш зярыя иеть хозяйствасонть роботан, – корты Павел Абрамов. – Тевесь тень мелень коряс, зарплата пандыть шкастонзо ды а берянь. Мекс бу а роботамс.

Вармазейка велень эрицятне пек мелявтыть эсь веленть чамомадо ды ёмамодо. Секскак бажить теемс весементь, штобу тесэ свал гайгевельть эйкакшонь вайгельть, ды эрьва мейсэ лездыть сеть ломантненень, конат сынст велентень явить мель.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».