Вторник, марта 19, 2024
Важное
Нуема шкась – кодамояк лия ёнов а молиця шка, зярдо пертьпельга качады ансяк пурнавт сюротнень чинесь ды велетнеяк, мерят, вельмить одс: маряви комбайнатнень увтось, тей-тов ардыть сюросо пештязь машинатне.
Велень хозяйстватнесэ молить сехте «пси» чить ды веть. Ве лувсо роботыть весе: комбайнёртнэ, водительтне, механизатортнэ ды тинге лангсо важодицятне. Самай истя молить тевтне «ООО МАПО и К» ТНВ-нь хозяйствасонть, конань прявтсо алкуксонь азорось, Россиянь Минсельхозонь Почётной роботникесь, Мордовия Республикань велень хозяйствань заслуженной важодицясь Николай Всеволодович Ютяев. Тосо инжекс минь ульнинек неть читнестэ.

– Нуеманть ушодынек медьковонь 10-це чистэ ды васняяк кундынек озимтнень пивсэме, – ёвтни хозяйствань агрономось Николай Арсентьевич Сараев. – Нама, учинек аламодо лия невтевкст, ансяк вана пси ды коське читне учоманок колызь. Озимтне макссть косо-бути 25 центнерт вейке гектарстонть, яровойтне жо невтить седе аламо – косо-бути 20 центнерт. Теке марто, сюрось а берянь, коське, натой жойни. Течи нуемась ветяви хозяйствань колмонест отделениятнесэ. Бути пертьпельксэсь карми маней седе товгак, неть читнестэ сюротнень нуеманть прядсынек.

«ООО МАПО и К» ТНВ-нь отделениятнень хозяйстватнесэ весемезэ видезь 2 тёжадо ламо гектарт яровой сюрот, 3 тёжат – озимть, 1,5 тёжат гектарт кукуруза, 2 тёжат гектарт ламбамо якстерькай ды 2 тёжадо ламо гектарт ламоиень тикшеть.

Кода тешкстызе агрономось Николай Сараев, течинь чине хозяйствась малав целанек анокстынзе ракшатнень андоманть туртов эрявикс тикшетнень ды сенажонть.

Зярдо минь ульнинек хозяйствасонть, ванынек, кода моли нуемась Пятинань отделениянь паксятнесэ. Теле лангс видезь товзюронть тесэ пивсызь уш зярыя чиде икеле, ней жо пивсэсть шужонть (газетань лисема чинтень сонзэяк уш прядызь). Паксясонть роботасть кото ACROS комбайнат ды вейке – Дон-1500Б. Пивсэзь сюронть усксесть вете машинат.

– Тесэ минек важодить сисем комбайнат, целанек жо МАПО-нь паксятнесэ тевсэть 20 комбайнат, малав комсь автомашинат. Весе техникась эсенек, киньгак, костояк эзинек сиведе, – ёвтни Николай Арсентьевич. – Шужонть анокстатано эсенек туртов, миеме ковгак а карматано. Хозяйствась три-кирди сюракшов ракшат, сынст андомга аволь аламо сюро эряви.

Кода уш тешкстынек, Пятина веленть маласо паксясонть шужонть пивсэсть сисем комбайнат, конатнень руль экшсэ важодсть эсь тевень содыця ды ёроков механизатортнэ. Сынст ютксто вейкесь – Александр Букин.

– Механизаторокс мон роботан 11 ие ды уш сисем кизэть – комбайнёрокс, – ёвтни Александр. – Тедеде хозяйствась рамась од комбайна – ACROS 585, конань экшс монь озавтымизь. Техникась вадря, эряза, мерят, весементь сонсь теи. Теке марто, сюронть пурны ёмавкстомо. А те пек эрявикс ёнксось. Ды важодемскак эйсэнзэ вадря куш кодамо шкане. Кодамо пси ушосонть илязо уле, кабинасонть экше.
Эрзянь цёрась комбайнёронь тевенть вечксы вишка шкасто. Эштё эйкакшокс улемстэ лездыль эсь тетянстэнь, кона истя жо ульнесь комбайнёрокс. Секскак школанть прядомадо мейле кочкась эстензэ тев, кона сюлмавозь веленть марто. Мольсь Отяжелень училищав, косо тонавтнесь механизаторонь тевентень.

– Мон чачинь-касынь Чаунза ёнксонь Маризь велесэ. Велесь аволь вишкине, свал ульнесь колхоз. Тетям роботыль трактористэкс, а кизна, сюротнень нуема шкасто, максыльть тензэ комбайна. Мон пек училинь те шканть. Сондензэ икелев ношкстылинь колхозонь мастерскойтнес ды училинь, зярдо сыргатано паксяв. Васень шкастонть ансяк ардтнемань кисэ якилинь, мейле тетям кармась аламонь-аламонь озавтнемень руль экшс, теке шкастонть ёвтниль панеленть лангсо улиця эрьва кнопканть ланга. Истя, васня тонавтния кабинанть потмонзо, мейле карминь эцнеме машинань моторонть потскак. Эдь кодамо тон механизатор, бути а содасак, кода пурназь-теезь тонь машинась. Бути калады, мезе тееме кармат? Ды, сюкпря тетянень, сонзэ лезксэнзэ вельде весементь тонавтния. Ды ней од техникасояк важодемась тень стакакс а маряви. Весементень пек куроксто чарькодян.

Ней Александр уш сонськак тонавты сы шкань механизатортнэнь. Мартонзо яла сайсы лелянзо цёранть Максимень, конась овсе а кады тошнакалемс ды весемеденть апак лотксе кевкстни: «Мекс? Кода? Мекс истя, аволь мекевланг?» Арсеви, касы алкуксонь комбайнёрокс.
Кода тешкстызе Александр Букин, чинзэ перть сонзэ комбайнантень сави пивсэмс 6-10 бункерт сюро. Тесэ тевесь ашти сеньстэ, кодамо сюрось: покшт аволь видметне, кодат кассть прятне. Ламось ашти сеньстэяк, зяросо валске лисить нуеме ды кода невтьсы прянзо чись.
– Нама, валске марто пек рана комбайнатнень паксяв а ливтьсыть, – полады цёранть кортамонзо агрономось Николай Сараев. – Валске ланга лиясто пры начко, сюро прятнень аламодо летькемтьсынзе. Эряви учомс, зярдо чись сынст костясынзе. Истя шкась таргави 10-11 часос. Чокшнестэнть тагояк кувать а кирдеват паксясо текень коряс. Улезэ вадря сюрось, нуемс шканть жо кодаяк салсесынек.

Эряви меремс, Н.А. Сараев агрономонь тевенть топавты уш колоньгеменде ламо иеть ды весе те шканть перть важоди «ООО МАПО и К» ТНВ-сэ. Тей кучокшнызь сеске Мордовиянь госуниверситетэнть прядомадо мейле. Неть иетнень перть Николай Арсентьевич эсь важодемасо варчнесь эрьва мезенть, сон а пели тевс нолдамс од технологиятнень ды корты, одонть совавтомась зярдояк а эрси берянекс. Паряк, сонзэ неть совавтоматнень вельдеяк сынст хозяйствась сови республикасонть сехте вадрятнень юткс.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».