Вторник, марта 19, 2024
Важное

«Кезэрень модань од моро» – истямо лем ало фестивалень ютавтомадо ушодксонть теизе «Литова» эрзянь авань вейсэндявксось. Те ульнесь 2015 иестэ. Секе иестэнть ушодксось топавтозель, ютавтозель васенце фестивалесь, ков пурнавкшность тиринь кельсэ морсиця морокурот, ськамост морыцят кода Мордовиясто, истя лия регионтнэстэяк.

Фестивалесь тусь весень мельс. А стяко тов пурнавозтне весе вейкень пес ёвтасть мель седе товгак поладомс истямо фестивалень ютавтнеманть. Истя арсезельгак. Ансяк тень теемс эзть максо эрьва кодат стакачитне, конат меельце шкастонть апак лотксе стякшныть каршонок пандо ладсо ды кирдить весе тевенек, мезенть кувалма апак топавто кадовить ламо пек паро бажамонок. Аволь весть сёрмалинек проекткак. Ансяк стяко. Шнамонть шнасть эйсэст, тевсэ жо эзть капша лездамс. Видькстан, кемеманокак тень кувалма ёмакшнось. Ды вана тедеде минек тевесь, окойники, сыргавтозель, мезенть кис васняяк эряви сюконямс Мордовиянь Культурань, раськень политикань ды архивень тевень министерствантень. Те сонзэ лездамонзо пингстэ тедеде таго яволявтынек «Кезэрень модань од моро» омбоце фестиваленть ютавтомадо. Те тевсэнть покш лезкс максыть истя жо «Луч» Культурань кудось, А. С. Пушкин лемсэ раськень библиотекась.

Пандемиянть кувалма сонсь фестивалесь ютась онлайн-лувсо. Ковдо теде икеле Интернетэнть вельде максозель тердема тиринь кельсэ морсиця морокуротнень, ськамост морыцятнень туртов кучомс видеороликть эсест морост марто. Тердемась марязель. Фестивалев эсест моро марто видеороликть кучсть эрьва ёндо. Сынь пурназельть вейс ды ноябрянь 30-це чистэ концерт ладсо невтезельть Интернетка (ВКонтактсо, Одноклассниксэ, Инстаграмсо). Кить эзть кенере ваномонзо, совадо Саранск ошонь «Луч» Культурань кудонь сайтс. Сеть коллективтнеде, кинь морост путозельть концертэнь программас, ёвтнетяно седе мейле.

Видеоконцертэнть анокстамодо башка фестиваленть молема шкасто топавтозельть ламо лия тевть. Вейкесь эйстэст – вейсэнь морга экшсэ кортамось. Сон ульнесь ноябрянь 23-це чистэ А. С. Пушкин лемсэ Национальной библиотекасо. Эйсэнзэ кепедезельть ламо кевкстемат. Васняяк, истятнэ: мекс эрявить ванстомс кезэрень моротнень, кодамо тарка сынь саить минек эрямосо, мейстэ нетяно сынст питнест неень шкань культуранок туртов, кодамо лезэ сынь кандыть эйкакштнень ды од ломантнень трямосо-кастомасо, тиринь келенть ванстомасо?

Сон панжозель кезэрень койсэ: кирвазтезель раськень штатолось, «Ламзурь» ансамблянь аватне морызь Пазморонть, конань вельде пшкадсть Инешкипазонтень лездамс тиринь келенть ванстомасо, раськенть кастомасо. Вастовомас сазтнень туртов, конатнень ютксольть вейсэндявксонь, морокуронь прявтт, ськамост морыцят, культурань учреждениясо важодицят, лембе валт ёвтась Мордовиянь Культурань, раськень политикань ды архивень тевень министрань васенце полавтыцясь А. И. Карьгин. Сон тешкстынзе истят вастовоматнень эрявиксчист, кезэрень моротнень питнейчист минек эрямосо.

Кезэрень моротнень ванстомга тевть топавтыть ды тень туртов ламо шка ды вийть максыть «Литова» вейсэндявксонь аватнеяк. «Ламзурь» ансамблянть марто 25-де ламо иень перть сынь пурныть-тонавтнить кезэрень моротнень, якить мартост ошка-велева, морсить ды невтить сынст мазычист ды сюпавчист эрьва косо. Ней сынст моротне срадсть эрьва кува, морсевить ламо таркава. Эряви меремс, «Ламзурьсэ» морыцятнень кунсолозь, ламо ломантнень панжсть мелест морамс эрзянь морот. Ламо таркава сынст мельга кармасть теевеме од морокурот.

Кода кезэрень морось лезды ванстомс тиринь келенть, койтнень-кирдатнень, парсте содасы Вирь Тавласо В. И. Ромашкин лемсэ Этно-кудо музеень прявтось, «Эрьмезь» вейсэндявксонь ветиесь П.В. Рябов. Пётр Владимирович ёвтнесь, кода вети эсь тевензэ сонзэ прявтсо музеесь эйкакштнень марто сюлмавкстнэнь ладямсто. Ледстясынек, музеев сакшныцятнень ютксо седе ламо эрсить эйкакшт ды од ломанть. Сынст тосо свал вастыть кши-сал марто, эрзякс шумбракстнемасо. Экскурсиянь ветямсто музеень азоравась Р. В. Водясова эсензэ кортамонтень свал совавты эрзянь валт. Текень пес, музеев сыця инжетнень сеедьстэ вастыть моро марто, конатнень морамо тердтневить Йовлань Олонь лемсэ «Торама», Пакся Тавлань «Толава» ансамблясо морыцятне. Истямо ладсо вастоманть ломантне, сехте пек эйкакштне, а стувтсызь зярдояк.

Пурнавозтнень мелест седеяк кепедизе «Морама» ансамблянь прявтонть Г. В. Дулкинэнь кортамозо. Геннадий Васильевич истя превейстэ ды келейстэ ёвтнесь кезэрень моротнеде, раськень седямопельтнеде, марявсь, сонзэ туртов арасть истят кевкстемат, конатнень лангс аволь муе, мезе ёвтамс.

Эрзянь этнокультурной сюпавчинть ванстомань ды кемекстамонь фондонь прявтось Т. И. Ларина ёвтызе мелявксонзо аудио- ды видеоматериалонть ванстоманзо коряс, конанть сон пурнакшнызе радио-тележурналистэкс улемстэ. Келя, весе се, мезе кенерсь сон снимамо ды пурнамо, ули ёмавтозь, бути а теемс сынст туртов ванстомань фонд.

Эсь раськень культурантень ламо вийть максы Р. Д. Жегалина, конань минь содасынек, кода эрзянь келень тонавтыцянть, моронь вечкицянть. Римма Дмитриевна, пенсияв туезьгак, топавты покш тев. Интернетсэ Одноклассниксэ панжсь «Эрзянь моро, мазый моро» кужо, козонь кармась пурнамо тиринь кельсэ гайгиця моротнень. Ней арась эрзякс морыця истямо морокуро эли ськамонзо морыця, кинь моронзо авольть сова те кужонтень. Римма Дмитриевна сынст вешни ды мукшны Интернетэнь весе таркатнева, таргси эйсэст эрьва косто ды путни эсензэ кужонтень.

Вейсэнь морга экшсэ кортамо сонсь Римма Дмитриевна эзь саво. Тень таркас кучинзе эсензэ сёрмадовксонзо, косо сон весеме ёндо панжинзе эсензэ арсеманзо неень шкань культуранок коряс, ледстинзе, кодат ды зяро тиринь кельсэ морыця морокурот улить Мордовиясо ды сонзэ томбале.

Неень шкань музыкальной культуранть коряс эсь мелензэ ёвтынзе од морыцясь, Лямбирьбуень Александровка велесэ «Ялгат» фолк-группань теицясь Артём Мамаев. Сонзэ мелявтовты, мекс минек композитортнэ меельце шкастонть аламо сёрмадыть од морот. Тень кувалма эрьва концертсэ савкшны морамс секеть моротнень, конатне гайгить эрьва косо. Одтнэнень те а вечкеви. Сынст мелест кунсоломс неень шкантень ладиця морот. Ансяк сынст а косто саемс. Секс савкшны морсемс рузонь кельстэ эрзякс ютавтовт морот.

Эряви меремс, рузонь моротнеяк эрзянь кельсэ гайгить аволь беряньстэ. Тенень кемевтемакс ульнесть моротне, конатнень серьгедизь Артём Мамаев ды Сергей Фудин. Кавто вайгельсэ ды гармониянь коряс (седицясь С. Фудин) моротне витизь пурнавозтнень мелест ды паролгавтызь ёжост.

Вейсэнь морга экшсэ кортамотне поладозельть чайде симемстэ. Вастовомась ютась лембестэ, седейшкава. Вейкесь апаргавтнесь: эзть саво зярыя ломанть, кинь кунсоломс покшоль мелест весень. Пек учинек «Мерема» морокуронь прявтонть Екатерина Модинань. Сон алтакшнось самс. Се чистэнть ормалгадсь тейтернезэ. Лиятненьгак ульнесть эсест тувталост. Секс кеж а сайтяно лангозост. Ули кемема, те вастовомась, кода «Кезэрень модань од моро» фестивалеськак, ютасть аволь меельцеде.

Раиса Щанкина

 

 

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».