Вторник, марта 19, 2024
Важное

Эрзянь ды мокшонь раськетнень покш кенярксчи ютазь субутасто ульнесь Москов ёнксонь Химки ошсо. Тосо панжозель «Шумбрат, Подмосковье!» раськень культурань нилеце фестивалесь.
Сонзэ анокстыцятне-ютавтыцятне: Москов ёнксонь Мокшонь ды эрзянь национально-культурной автономиясь, прявтось Дмитрий Макайкин, лездыцятне: Москов ёнксонь Правительствась ды Химки ошонь прявтось Дмитрий Волошин. Кенярксчись ютась «Родина» Культурань кудосо ды пурнась сядодо ламо эрзят ды мокшот. Мордовиясто кенярксчинтень инжекс пачколесть Мокшонь ды эрзянь раськень регионъютконь вейсэндявксонь прявтось Юрий Мишанин ды морыцясь Артём Мамаев.

Поздоровонь ёвтамо ды вейсэ покш чинь тешкстамо сакшность истя жо рузтнэяк, азербайджантнэяк, чуваштнеяк, еврейтнеяк. Сынст пельде казнекс ульнесть раськень ансамблятнень киштематне ды морамотне.
Ушодовсь фестивалесь ушосо, тесэ ульнесть гармошка мельга эрзянь ды мокшонь нурька морынеть, пеедькшнемат, киштемат… Культурань кудонь фойесэ сравтозель кедьчелькев ломантнень выставкаст, косо невтневсть-микшневсть мазый оршамопельсэ някинеть, ставкст-кодавкст, кирьгакст, чувтосто керсевкст. Мейле ушодовсь концертэсь, косо эрзякс, мокшокс морасть Мордовиянь землячествань «Эрзянь вайгель», «Азорава» ансамблятне, Москов ёнксонь филармониянь артисткась, «Садко» ансамблянь морыцясь, Россиянь Военно-морской флотонь Н. А. Римский-Корсаков лемсэ оркестрань солисткась Вера Каяцкая Никита цёранзо марто, Саранскойстэ инжесь Артём Мамаев ды ламот лият.

Моротнень мельга ваныцятне эзть кирдеве озадо ды секе-тев лиснесть киштеме. Кода тешкстызе Юрий Мишанин, Культурань кудонь важодицятне дивсесть, келя, истямо гайгиця кенярксчи сынь эштё эзть некшне. Фестивальсэнть кепедезель кевкстемась курок ушодовиця Эрицятнень сёрмадстоманть коряскак, яволявтозель сонзэ кувалма видеороликень пелькстамось, ды пуромозтне мельспаросо арсесть од тердемат, конатне кепедьсызь весень седейсэ меленть сёрмадстомс прянть «мордва-эрзя» ды «мордва-мокша» раськень лемтнесэ.

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».