Четверг, июня 13, 2024
Важное

Мартонь 19-це чистэ Мордовиянь коммунальщиктне кармить тешкстамо эсь кенярксчист. Миненек лиясто а неяви, зяро эрявикс тевть теить те сферасонть важодицятне, чуросто ёвтатано тенст «сюкпря» ды сеедьстэ лангс ливттяно ансяк асатыкстнэнь. Аволь умок минь вастовинек Отяжелень ошонь поселениянь администрациянь прявтонть Александр Иванович Серов марто ды кортнинек седе, кодат полавтомат молить посёлкасонть, кода одкстомтови жилищно-коммунальной ёнксось те эрзянь районсонть ды кодат проектт топавтозельть 2022 иестэ.

Александр Иванович чачсь-кассь Покш Манадыши велесэ, конась Отяжеленть эйстэ ашти кеменьшка вайгельбень тарка. Университетэнть прядомадо мейле сон кемекстызе мелензэ кадовомс эрямо тиринь ёнксос ды путомс весе вийтнень райононть кастомга-виевгавтомга. Ды кода невтить тевтне – сисем иеть ошонь поселениянь прявтокс улемстэ сонензэ ламо мезе удалась теемс.

– Ютазь иесь минек туртов а шождаль ды теке марто мельстуицяль. Отяжелень ошонь поселениясь – те Отяжелень райононть чачозо, ды сонзэ кувалма эрицятнеяк-инжетнеяк арсить седе, кода эри-ашти, касы-кемексты тиринь ёнксось. Мелят минь топавтынек пек ламо ды пек эрявикс проектт, кой-конатнень поладтано те иестэяк.
Васняяк бу тешкставлия васенце пек покш тевенть, конань минь теинек иень перть «Жилье и городская среда» национальной ды «Ванькс ведь» федеральной проекттнэнь лувсо: те Отяжеле посёлкасонть ведень максомань системанть витнемась-одкстомтомась (1-це этапось). Те тевенть куватьс учость посёлкань эрицятне ды, арсетяно, кадовсть мельспаросо. Сюкпрянь валт эрявить ёвтамс проекттнэнь анокстыцятненень, васняяк, минек администрациянь специалисттнэнень, подрядчиктненень, конатненень максозель а пек кувака шка тевенть теемс. Ды сынь сонзэ топавтызь истя, што эрицятнень пельде эзь са вейкеяк музгордема ды пеняцямо. Целанек одкстомтозельть ведень саемань узелэсь, ведень анокстамонь станциясь, полавтозельть водопроводонь сеттнень 13 вайгельбетне, 96 лисьматне, 5 водопроводонь камератне, 22 пожаронь гидранттнэ. Весемезэ тень кисэ пандозель 216 миллиондо ламо. Кодамокс ульнесь станциясь ды кодамокс сон теевсь ней – тынь несынк эсенк сельмесэ фотографиятнестэ, конатне аштить водозаборонтень совамо таркасонть. Объектэсь совавтозь эксплуатацияс ды ванькс ведесь ней лезды Отяжелень эрицятненень ванстомс шумбрачист, мелявкстомо пидемс-панемс ярсамопельть.

Мелят жо Отяжеле посёлкасо «Современный облик сельских территорий» госпрограмманть вельде строязель эштё вейке покш социальной объект, конась пек полавтсы тосонь эрямо лувонть ды ансяк паро ёнов. Те – Социокультурной центрась, козонь совить бассейнась, эйкакшонь ды од ломанень оймсема таркась, лавшо шумбрачи марто ломантнень туртов чинь отделениясь. Бассейнасонть ниле укшнома кить, ули тренировкань зал, шлямо таркат. Ве сменас тозонь кельгить 62 ломанть. Курок те мазый центрась ушодсы эсь важодеманзо весе вийсэнзэ.
– Теке программанть вельде, – полады ёвтнеманзо Александр Серов, – мелят строязель спортонь од площадка Отяжеле посёлкань 1 № ПСШ-нть маласо. Эйкакштнень туртов стявтозельть футболсо налксемань, гимнастикань, волейболонь ды баскетболонь площадкат, чийнемань яннэть, тренажёрсо занятиятнень туртов сектор. А посёлканть куншкакуросо, истя жо васняяк од ломантнень туртов, панжозель питневтеме совамка «Интернетс», тень туртов ветязель эрявикс оборудования.

Ниле грантт топавтозельть «Благоустройство сельских территорий» госпрограмманть вельде. «Сараст» птицесовхозсо стявтозель налксемань од площадка, Кулязбуесэ, 2 № ПСШ-нть вакссо, одкстомтозель спортплощадкась, витнезель-петнезель Отяжеле посёлкань 2-це Микрорайонсо 468 метрань кувалмосо тротуарось ды 862 метрань кувалмосо – Центральной ульцясонть. Неть кавто объекттнэ теезь Отяжелень ЖКХ-нь МП-нть вийсэ.
Паролгавтозельть аволь ансяк тротуартнэ – китнеяк. «Содействие» ФЦП-нть юрсо «МАПО – ТРАНС» ООО-нть вийсэ витнезельть Отяжеле посёлкань Горюнов лемсэ ульцяванть ды 2-це Микрорайононь №14, 14а ды 16-це кудотнес ветиця китне.
Республикань капремонтонь фондось лездась ютавтомс витнемань тевть Отяжелесэ ды «Сараст» птицесовхозонть 10-де ламо квартирас кудотнесэ. Тосо полавтозель электропроводкась вейсэнь пользованиянь таркатнесэ. Сюкпрянь валт бу ёвтавлинь сеть подрядной организациятненень, конатне лездасть тенек топавтомс проекттнэнь. Неть: «Созидание С», «СтройИнвест К», «Валиан» ООО-тне ды лият.

Ламо тевть арсетяно топавтомс 2023 иестэ: карматано одкстомтомо кудотнень перька китнень, строятано од налксема площадка 1-це Микрорайонсо, поладсынек автомобильной китнень витнеманть, ламо квартирань кудотнесэ полавтсынек инженерной систематнень ды латотнень. Бажатано прядомс проектной тевтнень Отяжеле посёлкасо ведень ветямонь сеттнень ды ванськавтыця сооружениятнень строямонть коряс ды совавтомс те объектэнть нацпроекттнэс. Бути весе топавтови, сестэ полавтсынек ды строятано 32 вайгельбень кувалмосо канализациянь сетть, стявттано од вешематнень коряс очистной сооружениянь станция.

Вечкевикс ялгат! Жилищно-коммунальной роботниктнень чиденть икеле ули мелем ёвтамс тенк поздоровт ды арсемс ансяк икелев молема, весе икеленк путозь задачатнень топавтома. Кадык шумбрачись карми кеме, кудосо-эрямосо мартонк ули уцяскась, семиясо ансяк вейке-вейкень чарькодема ды паро мельть-арсемат.

А. И. СЕРОВ, Отяжелень ошонь поселениянь
администрациянь прявт.


Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».