Кронштадтось – воинской славань ош, РФ-нь Балтийской флотонь военно-морской база. Теевезь коенть коряс, Российской Федерациянь Военно-морской прявт парадсонть улеманть туртов Российской флотонь адмиралонть иневанькс праведной воинэнть Феодор Ушаковонь мощанзо марто ракась Санкт-Петербургов ускозь Мордовия Республикань Санаксарской цёрань монастырьстэнть.

Аволь умок Санкт-Петербургонь «Шумбрат» фондонь участниктне Пазонь Авань Казанень пазавань кенярксчистэнть ульнесть тесэнь Казанской кафедральной соборсонть ды сюконясть Иневанькс праведной воинэнть Феодор Ушаковонь мощатненень. Пазнэнь кенярксчинь озномадонть мейле, кинь ульнесь мелезэ, автобуссо саезельть Кронштадт ошканть экскурсияв. Неванть вакска ютазь, сынь неизь боевой иневенчтнень, конатне примить участия Санкт-Петербургсо ды Кронштадтсо ютавтовиця Военно-морской прявт парадсонть. «Шумбрат» фондонтень совицясь ды те мероприятиянть пурныцясь Екатерина Огарева ды инжетне, Россиянь Писателень союзонь ды СПР-нь Од литератортнэнь советэнь поэттнэ ловнызь эсь стихест, конатне алтазь иневедень темантень.

Экскурсиясь прядозель российской флотоводецэнтень, адмиралонтень Феодор Ушаковнень кеврунгонтень, конась ашти стявтозь Кронштадтсо, Иневедень соборонть икеле, цецянь путомасо.

Мероприятиясь ютавтозель россиянь флотоводецэнть, адмиралонть Феодор Ушаковонь канонизациянь 20 иетненень.

Неть читнестэ жо фондонть вийсэ Санкт-Петербургсто Темниковав ильтязель иневенчень якорь, конанть Сюконямонь крёстонть марто вейсэ стявтызь ошонтень совамо таркантень.