Четверг, марта 28, 2024
Важное

Августонь 4-5-це читнестэ Саранскойсэ ды Темниковасо ютыть кенярксчинь мероприятият, конатне алтавить рузонь флотоводецэнть, иневанькс праведной воинэнть Феодор Ушаковонь канонизациянь 20 иетненень.



Феодор Ушаковонь лемезэ свалшкас сёрмадозь Россиянь Военно-Морской флотонь героической историяс. Адмиралось изнясь иневедень 43 тюремасо, вестькак арасель изнязь. 2001 иестэ Рузонь Православиянь церьковась сонзэ яволявтызе Саранской епархиянь иневаньксэкс (святоекс). 2004 иень августонь 6-це чистэ Саранскоень кафедральной соборонтень максозель праведной иневанькс воинэнть Феодор Ушаковонь лемесь. Ды иневанькс адмиралось кармась Мордовиянть ды Россиянь Военно-Морской флотонть менельстэ ванстыцякс.

Августонь 4-це чистэ кенярксчинь мероприятиятнень лувсо, конатне алтавить Феодор Ушаковонь 20 иетнень канонизациянтень, Темниковасо инжетнень туртов ютавтовить сонзэ лемсэ музейганть, Санаксаронь Рождество-Богородичной монастырьганть, Вирень Цибаева велень эрзя-мокшонь курмонь-кармонь этно-кудованть ды Алексеевка велень рузонь курмонь-кармонь этно-кудованть экскурсият. Ошонть куншкакуросо кармить молеме спортонь пелькстамот ды «Морская душа» патриотической моронь регионъютконь фестивалень гала-концертэсь. Истя жо, арсематнень коряс, ёрокчист невтьсызь Л.И. Воинов лемсэ раськень седямопелень оркестрась, республикань искусствань деятельтне. Меельцекс карми кенярксчинь салютось.

Саранскойсэ, августонь 4-це чинь валскестэнть, Bytex Hall офиссэнть ушодови Налксематнесэ цифровой образованиянь чись. Чить А.С. Пушкин лемсэ культурань ды оймсемань парконь кизэнь эстраданть лангсо ютавтови «Доблесть и вера» ошонь культурань шкинемань вейсэндявкстнэнь фестивалесь-марафонось. Тёжа иетнень площадьсэнть, арсематнень коряс, карми седямо Санкт-Петербургонь Н.А. Римской-Корсаков лемсэ Россиянь Военно-Морской флотонь центральной концертной образцовой оркестрась, истя жо пурнавозтнень икеле морыть ды киштить «Разгуляй» ансамблянтень совицятне.

Августонь 2-це чистэ, Саранскойсэ прявт мероприятиятне ушодовить Божественной Литургиясто ды иневанькс праведной воинэнть Феодор Ушаковонь кеврунгонтень Крест марто ютамостонть. Кафедральной Соборонть икеле карми важодеме «На земле святого праведного воина Феодора Ушакова» регионъютконь выставкась-ярмункась. Теке жо чистэнть ютавтови «Феодор Ушаков объединяет…» духовно-просветительской проекттнэнь панжадо фестивалесь, конань лувсо Саранскойсэ васенцеде ютыть World of Warships дисциплинань коряс киберпелькстамот.

Соборонть икеле ёрокчист невтьсызь Санкт-Петербургонь Россиянь ВМФ-нь Н.А. Римский-Корсаков лемсэ оркестрась, И.М. Яушев лемсэ музыкальной театрань солисттнэ, «Умарина» моронь ды киштемань государственной ансамблясь, Пензань О.В. Гришин лемсэ рузонь раськень хорось ды С.В. Балабан лемсэ «Разгуляй» казаконь моронь ды киштемань государственной ансамблясь.

Никоннэнь кеврунгонть вакссо сравтови «Панжадо менель ало искусствань площадесь», конасонть невтевить Ф.В. Сычков лемсэ художественной училищань студенттнэнь важодевксэст, училищань модань театрань ды Н.П. Огарев лемсэ университетэнь Национальной культурань институтонь «Иненармунь» модань театрань коллекцияст, ютавтовить ДШИ-нь тонавтыцятнень ды «Юный художник» конкурсонь лауреаттнэнь мастер-класст.

Изнямонь площадьсэнть карми важодеме Россиянь ДОСААФ-нь региональной отделениянь транспортонь выставкась, истя жо ёрокчист невтьсызь ульцянь гимнасттнэ, восточной единоборствань ды ВМХ-нь спортсментнэ.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».