«Жильё и городская среда» нацпроектэнь «Формирование комфортной городской среды» федеральной проектэнть коряс минек республикасо ветяви виев важодема. Эрьва муниципальной районсонть теевить оймсема таркатне, витневить-вадрялгавтовить ламо этажс кудотнень бокатне, одкстомтовить парктне. Целанек «Формирование комфортной городской среды» проектэнть тевс нолдамонь шканть перть витнезь-вадрялгавтозь общественной ды кудотнень перька малав 350 таркат.

Программанть юрсо меельце иетнестэ витнезь-вадрялгавтозь Саранск ошсо Подольской курсанттнэнень ды Донбассоньть кисэ аштицятненень сквертнэ, Рузавекасо – Старт-Паркось, Орданьбуесэ – «Базарной площадесь», Темниковасо – «Раздолье» паркось, Зубова-Полянасо – Культурань ды оймсемань паркось, Торбеевасо – Советской куросо эрькенть чирева таркась, Теньгушевасо – Коммунистической куросо паркось, Кочкуровасо – Культурань ды оймсемань паркось, Ромодановасо – Филатов лемсэ Культурань ды оймсемань паркось ды ламот лия таркатне.

Тешкстасынек, вадрялгавтоманть туртов общественной таркатнень кочкить республикань эрицятне эсь вайгельтнень максоманть лувсо. 2025 иестэ вадрялгавтомань таркатне кочкавить ней. Эсь вайгеленть мереви максомс Саранск ошонь Московская ульцясо Фонтанной валгома тарканть кисэ, Мордовская ульцясо Скверэнть кисэ эли Советской площадень пельксэнть вадрялгавтоманзо кисэ. 

Теемс тень а стака. Эсь вайгеленть мереви максомс Россиянь Минстроень вейкине федеральной цифровой платформасонть (13.gorodsreda.ru). Мереви тень теемс волонтёртнэнь вельдеяк, конатне эрьва чистэ важодить ошонь ульцятнесэ, ломантнень пурнавома таркатнесэ, ТРЦ-тнесэ, культурань ды тонавтнемань учреждениятнесэ, республикань предприятиятнесэ ды заводтнэсэ.

Илядо кадово ве ёнов, максынк эсь вайгеленк сы иестэ вадрялгавтовиця общественной тарканть кисэ! Тень теемга тынк улить эштё вете чить.