Татьяна Владимировна Камаева – Саранск ошонь 5-це № Республиканской больницянь терапевтической отделениянь стационаронь медицинской сестра. Аволь умок Россиянь Президентэсь Владимир Путин эсь Указсонзо казизе сонзэ Лука Крымскоень медальсэ здравоохранениясо ламо иень перть парсте роботамонь кисэ. Неть читнестэ минь вастовкшнынек Татьяна Владимировна марто ды кортнинек сонзэ а шожда тевденть, конантень сон максынзе эрямостонзо 40 иетнень.
Камаевань чачома ёнксозо – Отяжелень райононь Каменка велесь. Тесэ сон ниле иеть роботась фельдшерэкс медучилищанть прядомадо мейле, мейле сась Саранскоень 5-це № больницяв ды 36 иеть важоди ве таркасо. Медсестрантень максозь «Сестринское дело» специальностень коряс высшей квалификационной категория. Сонсь Татьяна Владимировна а вечки ёвтнеме эседензэ, корты, сон роботы аволь медальтнень ды казнетнень кисэ ды лови медицинанть эсь эрямонь смустекс.
«Истят ломантнень питнест сырнень пондошка, – полады минек интервьюнть 5-це № больницянь прявт медицинской сестрась Светлана Дмитриевна Паршина. – Те ава, кона мельганзо вети ломанть, конанть кунсолыть одтнэ, сон максы тенст весе содамочинзэ. Истятнэде мерить – алкуксонь наставник. Кодашка вий эрявсь весе медиктненень, зярдо 2020 иестэ ушодовсь коронавирусось. Татьяна Владимировна ульнесь васенцетнень ютксо, конатне эзть пелезеве, эзть пота ды сыргасть идеме сэредицятнень стака ормадонть. Минек больницянь 60 койкас стационарось, косо роботась Камаева, се шкастонть теезель «якстере зонакс». Весе кавто иетнень перть сон ульнесь «эпицентрасо».
Коронавирусонь «ниле волнатнень» ютамсто важодсь прявт медицинской сестракс ды тейсь весементь, штобу сэредицятне лисевельть больницясто шумбрачинь стака колавкстомо. Весень марто тейнесь сэредицятненень уколт, сайнесь мазокт, путнесь капельницат, ветсесь консультацияс. Се шкастонть сыненст эрявсь аволь ансяк лецямо – васняяк, паро валт, сыця шкантень кемема, ды те весементь макссь тенст Камаева ды кармавтсь истямо лувсо роботамс медицинской персоналонтькак. Пациенттнэ жо сыльть эрьва кодат: пек тандадозь, сыреть, лия стака орма марто… Ялатеке, «васенце волнастонть» инфекционной отделениясонть весе 120 пациенттнэ нолдазельть кудов паро ёжо марто. Истя ульнесь лия «волнатнень» шкастояк».
Тешкстама, коронавирусось эдь эзь вешне, кинь лангс каявомс, ды, нама, эзь юта медиктнень вакскаяк. Секскак, лиясто савкшнось кадовомс тензэ ансяк Мединститутонь ды медколледжень студенттнэнь марто, тонавтомс сынст путомс капельницат, инъекцият, максомс кислород, муемс оймавтыця валт ды вийть а нолдамс кедтнень, кирдемс стакачитнень. Татьяна Владимировна эзь сода оймсема ды кенярксчить, зярыя част удыль ды таго боевой дежурствав. Кияк а корты, буто сонзэ ды лиятнень арасель пелема. Ульнесь! Ансяк сонзэ савсь кекшемс эсь потс, а тандавтомс эсь тарныця кедтнесэ сэредицятнень, конатне вансть медсестратнень ды врачтнень лангс, кода ашо халатсо ангел лангс. 2020 иень сёксень кавто ковтнестэ Татьяна Владимировна ютась рентгенодиагностикань отделениянь компьютерной томографиянь кабинетс, таго «якстере зонас». Эрьва чистэ кеменень-кемень част защитной костюмсо сон сайнесь мазокт 80-100 пациенттнэнь пельде!
Ютасть кавто пель марто иеть, кода ушодовкшнось коронавирусонь эпидемиясь. Полавтовсь эрямось, ней медицинась соды, кода изнямс ковидэнть, прививкатне лездыть печтямс орманть шождасто. Ансяк минь зярдояк а стувтсынек сеть шкатнень, конатне явизь эрямонть кавто пельксэв, кодашка стакачи кирдсть минек медиктне, зяро ломанень эрямот идесть врачтне ды истят медсестратне, кода Татьяна Владимировна Камаева. Сюкпря тенст ды весень пельде модас сюконямо!
Марина Девятова