Июнень 14-це чистэ тешкстави Доноронь масторлангонь чись. Минек республикасо те ёнкссонть важоди «Мордовская республиканская станция переливания крови» МР-нь ГБУЗ-сь. Неть читнестэ минь содавтынек те станциянть, кортынек тосонь важодемадонть, республикасонок донорстванть виевгавтомадо ды седе, кода теевемс донорокс.
Верень саемань республикань станциянь общественностенть марто важодемань коряс менеджерэсь Наталья Викторовна Асанова ютавтсь минек туртов экскурсия учреждениянь нупальтнева ды эсь сельмесэнек неинек, кода ветяви роботась. Весемеденть ёвтнетяно те материалсонть.
Кода ёвтась «Мордовская республиканская станция переливания крови» МР-нь ГБУЗ-нь прявт врачось Ольга Геннадьевна Македонская, неть читнестэ сыненст сась паро куля: Мордовиянь Прявтось Артём Здунов Московсо вастовкшнось Федеральной медико-биологической агентствань руководителенть Вероника Скворцова марто ды кортазель Верень саемань республикань станциянть вадрялгавтомадонзо. Арсеви одкстомтомс материально-технической базанть ды панжомс республикасонок плазмоцентра.
«Россиянь ФМБА-сь анокстась концепция, конань лувсо арсевить ламолгавтомс верень плазмань донорской анокставкстнэнь отечественной лецямонь препараттнэнь тееманть туртов. Ды те иестэ Мордовиясь совась пилотной проектэнь регионтнэнь-участниктнень юткс. Донорстванть виевгавтомась минек туртов ашти пек эрявикс тевекс, штобу шкастонзо максомс лезкс ломантненень, идемс сынст эрямотнень», – сёрмадсь Артём Здунов эсь телеграм-каналсонть.
– Минек туртов те пек паро ды кенярдовтыця куля, – мерсь Ольга Геннадьевна. – Од полавтоматнень марто важодемаськак ладяви лиякс, седе келейстэ.
ЛИЯТНЕНЕНЬ ЛЕЗДАМГА
Верень саемань республикань станциянть ули эсь девизэзэ: «Тонь вереть – питней казне. Тонь мелеть – кинь-бути эрямо. Кочкамс тонеть!». Ды неень шкасто неть валтнэ кармасть девизэкс аволь ансяк станциянть, ламот минек эрицятнень туртов, конатне кочкасть виде ки ды кармасть донорокс. Ды те кись виень коряс ламонь туртов. Эряви ансяк изнямс пелеманть ды молемс верень саемань станцияв. Мезе тень туртов эряви? Васняяк улезэ мель. Нама, кеме шумбрачи. Верень максомадонть икеле зярыя чинь перть кирдема диета – а ярсама салов, куяв, коптязь ярсамопельде, а симема иредстиця симемапельть. Само чистэнть валске марто ярсама ведьс пидезь кашадо, симема ламбамо чай тантейка марто. Эряви самс вадря ёжосо. Верень саемань станциясо эрьва сыцясь сёрмады анкета, косо пачти шумбрачидензэ ды ёжомарямодонзо. Теде мейле врачось-трансфузиологось ванкшносы доноронть, корты мартонзо. Бути кодаткак мелявкст арасть шумбрачинь коряс, веренть мереви максомс.
Истя жо донортнэнень пандовить ярмакт. Верень максоманть кисэ максовить 600 ламо целковойть, плазманть кисэ те суммантень путовить эштё 300 целковойть, а тромбоцитэнь доноронтень – эштё 800 целковойть. Теде башка, важодема таркасо сыненст максовить кавто оймсема чить. Бути ломанесь максы верь 40-ксть, сонензэ максови «Россиянь Почётной донор» лемесь.
– Миненек тей сыть шумбра ломанть, конатне анокт лездамс лиятненень ды конатне донорстванть ловить прявт ды эрявикс тевекс, – тешкстызе Наталья Асанова.
Андрей Анатольевич Сафронов – Россиянь Почётной донор. Верень максомо сась 46-цеде.
– Васенцеде верь максынь медучреждениянь кармавтоманть коряс. Минек республикасо ве шкане ульнесь истямо лув. Те, зярдо ломанентень тееви операция ды тень кисэ эрявсь максомс верь. Монь крёстной аванень тейсть операция, медицинской учреждениясь пшкадсь малавикстнэнень максомс верь, теемс истямо лезкс. Ды мон явинь мель. Те ульнесь 2007 иестэ, – корты донорось. – Теде мейле жо кода-бути арсезевинь, мекс бу а лездамс. Монь туртов верень максоманть коряс кодаткак стакачить арасть. Лездамс эряви. Эдь зярдояк а содат, мезе лиси эсеть эли малавиксэть марто. Паряк, зярдояк тонетькак максы кияк лезкс.
Процедурадонть мейле прям марян вадрясто, кода-бути шождалгадат, одкстомат.
Андрей Сафроновонь туртов донорствась кармась свалшкань тевекс. Иенть перть цёра-ломантненень веренть мереви максомс ветексть, сон сакшны колмоксть, лиясто – нилексть. Эряви ёвтамс, весть самсто доноронть саеви 450 мл верь. Процедурась моли 5-7 минутань перть.
А вана лия залсонть ульнесть тромбоцитэнь донорт. Те процедурась ветяви истямо лувсо – верьстэнть явовить тромбоциттнэ, плазмась жо ды лия элементтнэ велявтовить мекев доноронтень. Истямо вересь максови яволявтомань коряс. Ули яволявтома медучреждениянть пельде, тердеви донор. Процедураськак саи седе ламо шка.
Зярдо минь ульнинек Верень саемань республикань станциясонть, тромбоцитэнь донорокс сакшнось Александр Вячеславович Богачев. Сонзэ те ульнесь 26-це донация.
– Мон, кода ламот лия донортнэяк, васенцеде верень максомо сакшнынь лецямонь учреждениянь тердеманть коряс. Патянень тейсть операция, – ёвтни Александр Богачев. – Омбоцеде сакшнынь теке тувталонть коряс – ним чачтсь. А седе мейле свал тердилимизь, кода течияк, верень клеткатнень максомо. Истямо лувсо верень саемась моли седе кувать. Ней вана уш час пель марто аштян, икеле часонь перть весемесь ютнесь. Шкась ашти ломаненть организмадонтькак, паряк, давлениясь кепететсь эли, мекевлангт, прась, паряк, мейсэяк лиясо тевесь. Аппаратнэяк тесэ аволь вейкеть. Эрьвась роботы эсь лувсо.
Валерия Сергеевна Куляскина истя жо тердезель тромбоцитэнь максомо. Донорокс тейтерь-авась кармась 18 иесэ. Сестэ сон тонавтнесь Россиянь правовой академиянь Саранск ошонь филиалсонть, сыненст тонавтнема таркав сакшнось верень максома станциянь мобильной комплексэсь.
– Мон арсия варчамс эсь прям донорокс. Мелезэнь тусь. Ней эрьва ие сакшнан верень максомо вейсэ мирдень марто. Течи сынь колоньгемень омбоцеде, – корты донорось. – Гайневтсть тень, тердимизь максомс тромбоцитт, эряви монь верень группась. Монь туртов те а стака. Бути максован лезкс, мекс бу тень а теемс.
Юлия Еремина
Фототне
Марина Девятовань.
(Поладксозо сыця номерсэнть)