Улить ломанть, конатнень марто уш васенцеде вастовомсто тееват малавиксэкс, буто вейке-вейкень содат сядо иеть, сынст шожда, пейдевтиця ды теке марто эсь пря лангсо пеедькшниця обуцяст вечкеви ламонень. Истятнэнь ютксо Мордовиянь республиканской клинической больницянь (ГБУЗ РМ «МРЦКБ») трансфузионной терапиянь кабинетэнь заведующеесь, высшей категориянь врачось-трансфузиологось Татьяна Валентиновна Полякова.
Паряк, а весе содыть, кие истямо трансфузиологось? Сестэ ёвтасынек: трансфузиянь сферась медицинасо эштё од ёнксось, те врачось – верень, плазмань эли лия биологической жидкостень ломанень организмас каямонь ды лиясто лисиця мелявкстнэнь витемань коряс специалист. Медицинасо, сехте пек хирургиясо ды акушерствасо, сеедьстэ пациентэнтень эрявкшны каямс верь эли плазма операциянь шкасто эли медицинань невтевкстнэнь коряс. Сонзэ каямось – тевесь а жожда, эрявить ламо содамочить ды покш ответственность, эдь ломантнень эрьванть эсензэ верень группазо, резус-факторозо ды а весе ладить вейке-вейкень туртов. Те тевенть коряс лециця эли операциянь теиця врачтненень самай лездыяк трансфузиологось.
Операциянь теемстэ сеедьстэ эряви каямс пек ламо верь ды башка схемань коряс, лиясто токсической морявоматнень изнямга эряви куроксто ванськавтомс веренть – теемс плазмаферез, гемодиализ, гемосорбция. Сестэ таго тердема врачонть-трансфузиологонть. Эштё сон теи неень шкане ламонень вечкевикс ды эрявикс озонотерапиянть.
Клинической больницясонть Полякова роботы ськамонзо, трансфузиологтнеде ламо ансяк Верень максома станциясонть, конатнень марто Татьяна Валентиновна кирди кеме сюлмот, эдь истя жо сон канды ответственность тосто веренть ускоманзо ды ванстоманзо кис. Больницясонть свал эряви кирдемс запас ды улемс свал анококс сонзэ пештямс апак учнень тевтнень лисемстэ.
Полякова эштё сови МРЦКБ-нь кардиохирургической бригадантень, конась максы седей марто майсицятненень высокотехнологической лезкс искуственной кровообращениянь аппаратонть тевс совавтозь. Паро важодеманть кисэ врачось-трансфузиологось казезь МР-нь Минздравонь Благодарностьсэ ды Госсобраниянть пельде Почетонь грамотасо.
Татьяна Валентиновна Полякова уш 25 иеть капши лездамс пациенттнэнень. Сон ве чияк эзь робота лия таркасо, МРЦКБ-сь тензэ теевсь тиринь кудокс. 1997 иестэ од тейтерькакс сась тей Н. П. Огарёв лемсэ МГУ-нь медицинской факультетэнть прядомадо мейле «Лечебное дело» специальностенть коряс. Теде икеле ульнесь медучилища, конанть прядызе ансяк «ветес», ды университетсэ меельце вечерней колмо курсатнесэ тонавтнемстэ эштё кенериль важодемс БСМП-нь фельдшерэкс-лаборантокс ды тоско жо дежурямс. Сон нейгак тонавтни, шкань-шкань ютни квалификациянь кастомонь курсат Россиянь содавикс лециця учреждениятнесэ.
Татьяна Валентиновна свал мизолкс марто. Корты, врачонь профессиясо кенярксов обуцявтомо ковгак. Лангозонзо варштазь, сеске паролгады ёжот, эдь врачонть улить эсензэ ды лиятнень мелень кепедемань салавачинзэ: сон эрьва чи полавтни эсензэ медицинской чепчикензэ. Течи псакине марто, ванды оскасо налксиця кискинеть, ули коала марто сэнь чепчикезэ ды валдо-сэняжа, конасонть артозь карандашт. Истямо врачонтень ули мель видькстамс ды сеске ёвтнемс весе эрямот.
– Монь псакинетнень-кискинетнень вечкемась тесэяк неяви, – мизолды Татьяна Валентиновна. – Эдь эйкакшпорасто васняяк арсинь улемс ветеринарокс. Покштям-бабам трясть ламо ракшат, ды мон чинь-чоп эйсэст «лецилинь». Мейле, аламодо касозь, кармакшнынь сэредеме ды сестэ сась мель тень лецямс ломантькак. Эштё вечкилинь ды нейгак юткошкасто вечкан эйкакшонь книгань ловномо, те монь вишка «лавшочим». Ды ансяк конёв лангсо, мобильной библиотекатне аволь монь туртов. Мон – Гарри Поттерэнь ды фэнтези жанрань фанат, вечкан ёвкст, «Волшебник Изумрудного города» ды «Приключения Петрушки» – сехте вечкевикст те шкас. Седе покштнень туртов книгатнестэ мель яван Вальтер Скоттнэнь ды Майн Риднэнь.
Марина Девятова