Маень 19-це чистэ чачома чинзэ тешксты 5-це номер Республиканской клинической больницянь терапиянь отделениянь врачось-терапевтэсь Раиса Борисовна Бабина. Течи сонзэ лемс ёвтавить ламо лембе валт, паронь арсемат.
Минь, «Эрзянь правда» газетань теицятне, вейсэндявтано неть седейшкавань арсематнес ды ёвтатано тензэ поздоровт чачома чинь кувалма: Раиса Борисовна, уледе шумбрат, кадык Пазось кази тенк кувака эрямо, весе арсеманк топавтовост ды кадык кармить седе ламо шумбралгавтозь ломаненк!
Неень шкань
профессиянзо кочкизе вишкинестэ
Раиса Борисовнань эйкакш пингезэ ютась Кочкурбуесэ. Тетязо-авазо, Борис Михайлович ды Елена Григорьевна Букининтнэ, трясть-кастсть кавто тейтерть, кавонест сынь, кода авасткак, эрямонь тевекс кочкизь медицинанть. Аваст, Елена Григорьевна, важодсь Кочкуровань райбольницясо медсестракс. Сонзэ, ловт, весе Кочкуровань районось содылизе. Аволь ансяк больницясо бажась весенень лездамс, кудоскак сеедьстэ сыльть тензэ лезкс мельга. Виде, аволь шожда пинге Пазось максокшнось те стакачиде а пелиця авантень... Сонензэ ульнесть ансяк 42 иеть, зярдо стака ормась саизе мирдензэ, Борис Михайловичень, эрямонзо. Кавто-колмо сменат савкшнось топавтомс тензэ ды эштё кудоютксо тевтнеде байтякольть, тень лангс апак вано, кенерсь эрьва ков. Валентина ды Раиса тейтерькатне сеедьстэ ульнесть мартонзо больницясо, кода кортыть, эсь сельмесэ несть сень, кода аваст кази лембе ормалгадозтненень, кода сон вечксы эсь тевензэ, кода седейшкава котьми малавиксэнзэ перька. Нать, а стяко васня покшось, Валентина Борисовна, эрямонь тевекс кочкизе медицинанть, сон лецясь эйкакшт, ульнесь педиаторокс. Мейле омбоцеськак, Раиса Борисовна, эрямонь тевекс кочкизе медицинанть.
Раиса Бабина (Букинина), вишкинестэ аванзо важодема таркав яказь, пурнынзе весе орматнень, конатнесэ сеть шкатнестэ ламот сэрелесть (кшнясо (руз. корь), ожосо, ливкссэ). Секс кавксо классонь прядомадо мейле апак кавтолдо максынзе документэнзэ Саранскоень медицинской училищав (ней – колледж). Кода школасо те тейтерькась тонавтнесь ансяк «ветес», истя медучилищантькак прядызе якстере диплом марто. Ламос бажиця, эрьва тевс кенериця од специалистэсь тень лангс эзь лотка. Медучилищанть прядомадо мейле кармась тонавтнеме Н. П. Огарёв лемсэ Мордовской государственной университетэнь медицинской факультетсэ (чокшнень отделениясо). Васенце курссо эштё кавто покш тевть ульнесть сонзэ эрямосо: лиссь мирденень ды чачсь Марина васенце тейтерест. Кунсолынь Раиса Борисовнань ды пек дивазевинь: се шкастонть сон кенерсь аволь ансяк парсте тонавтнеме истямо стака факультетсэнть, кода медфак, эштё кастсь ансяк чачозь эйкакш, викшнесь, стась, кодась!
Семиянь династиясь поладови
Минек республикасо теевсь паро коекс Медицинасо важодиця кенярксчинтень кочкамс профессиянь коряс семиянь династият ды тешкстамс сынст покш чистэ. Истямо уцяскав мельспаро казезель Букининтнэнь семиянтеньгак. Виде, сестэ эштё эзь лисне сценанть лангс Раиса Борисовна Бабинань (Букининань) тейтерезэ Марина, кие эрямонь тевекс истя жо шкань ютазь кочкизе медицинанть. Сон сырькаензэ ладсо важоди Кочкуровань райбольницясо медицинской сестракс. Бабинтнэнь омбоце тейтерест Наталья школасо тонавтнемстэ невтсь покш ёрокчить музыкань коряс. Васня тонавтнесь Саранскоень Л. П. Кирюков лемсэ музыкальной училищасо, мейле парсте кирдинзе экзаментнэнь Казанень консерваториясо. Тонавтнемань заведениянть прядомадо мейле тоско кадовсь эрямояк.
Семилейсэ ды маласо велетнесэ
асодыцянзо арасть
Кочкуровань муниципальной райононь Семилей велень медицинской амбулаториянть перька касыть ламо эрьва кодат чувтот ды куракшт: умаринат, грушат... Неть тундонь читнестэ весе тей сыцятнень сельмест кенярдовтыть мазый тюссост бояронь куротне (сирентне). Овсе пирявксонть ёжосо ашо оршамопельсэ, прок одирьва, ськамонзо ашти лемзёркс чувтось.
Амбулаторияв совамсто мизолкс марто кенярдозь вастымизь медицинской сестрась Марина Тятюшкина. Медицинань учреждениянть невтемадо мейле, ушов лисемстэ сон тенек пачтясь, весе чувтотнень сынь озавтызь икеле тесэ важодиця велень врачонть Раиса Борисовна Бабина марто. Тешкстасынек, Раиса Борисовна шкань ютазь кармась улеме общей практикань (семейной) врачокс. Кода мерсь Марина Сергеевна, те паро арсемась ды сонзэ эрямос совавтомась ульнесть Раиса Борисовнань. Те оймамонь а содыця, одонтень свал бажиця авась сонсь кочкась ды якась лавкатнева эрявикс касовкстнэнь, видьмекстнэнь рамсеме. А зяро эрьва кодат цецят путсть амбулаториянть перька! Мейле секе-тев якасть мельгаст: шкастонзо валность, кавшакавтсть моданть ды истя седе тов.
Марина Сергеевнань валонзо коряс, Раиса Борисовна умок уш мартост а важоди, а вана сонзэ кедьсэ озавтозь чувтотнень лангсо истянь зняро чачить умарть-грушат, сынь сатыть аволь ансяк эстест ды сыненст пшкадиця ормалгадозтненень, мик маласо весе эрицятненень!
Истя жо Семилей велесэяк те шкас ледстнить сонзэ кода тевензэ парсте содыця врачонть, кие свал анок самс лездамо кажос понгозентень. Лецямонь лия учрежденияв туезьгак, те шкас сонензэ гайневтнить эрьва кодамо кевкстема марто.
– Эрямосонть эрьва кодат тевть эрсить, аволь пек кувать шкас ютакшнынь лия тевс, ялатеке свал арсинь велявтомс вечкевикс профессиязон, – ёвтнесь тенек Марина Тятюшкина. – Те тевенть эрямос совавтомс лездась тень Раиса Борисовна. Сон монь ильтимим содамочинь кастомо, профессиям седе домкасто ды од лувсо тонавтнеме. Те сонзэ превс путомадо мейле мон карминь семейной медсестракс, тонавтымим кемеме эсь вийтнес, явсь мель тень прок тиринь авам... Сон макссь монень ламо превс путомат, конат лездыть эрямосон те шкас. Невтемакс, те сонзэ мереманзо коряс молинь тонавтнеме автошколав ды Раиса Борисовнань ладсо озынь руль экшс.
Те пек седе шождалгавтызе эрямом. Ледстяса, минек профессиясонть эрсить ламо апак учонь тевть, кудов эйсэнек тердтнить кода чить, истя ветькак. Сень лангс апак вано, Раиса Борисовна врач, шождасто, зярдояк апак музгорде, бути эрявсь, топавтсь аволь ансяк эсензэ, медсестрань тевентькак. Сон содась минек велень малав колмо поколеният. Зярдо-бути лецясь покштятнень-сырькайтнень, мейле сынст эйкакштнень, шкань ютазь жо нуцькаст лезкс мельга кармасть тензэ пшкалеме. Содазь, улить ламо ормат, конат ютыть раськетнестэ, сетненень сон башка мель явсь, – поладсь Марина Тятюшкина.
Марина Сергеевна те шкас эзинзе стувто сеть валтнэнь, конатнень Раиса Борисовна ёвтынзе тензэ вейсэ важодеме ушодомсто: «Сэредицятнень марто эряви кортамс, прок эсеть ды лия малавиксэть марто!» Алкукскак, зярдо ломанентень эрси пек стака, сестэ аволь ансяк ормаменьксэсь, чевте ды лембе валоськак лездыть. Омбоцесь, эрси, ков седе питней ды паро! Самай неть обуцянь ёнкстнэ пек ладить медицинасо сеть важодицятненень, кинь юткс совавтови Раиса Борисовна!
Шкань ютазь Раиса Борисовна кармась важодеме Саранскойсэ 5-це № Республиканской клинической больницясо врачокс-терапевтэкс. Икеле таштазь опытэсь сонензэ пек маштовсь од таркасонть. Течи сон ёвты покш сюкпря чарькодемань, лезксэнь максомань кисэ те больницянть прявт врачонтень, МР-нь Госсобраниянь депутатонтень Анатолий Николаевич Пинямаскиннэнь, терапиянь отделениянь прявтонтень Олеся Валерьевна Чернышеванень. Од таркасонть сонзэ парсте вастызь терапевтической отделениянь икелень прявтось Зинаида Григорьевна Алаева, лечебной пельксэнь коряс прявт врачонь полавтыцясь Надежда Викторовна Кузнецова.
Раиса Бабина покш мельспаросо ёвтнесь тенек ояксчисэ эриця коллективдест, косо эрьвась содасы эсь тевензэ.
Валентина Юдина
Вечкевикс Раиса Борисовна!
Мереде ёвтамс Тыненк поздоровт чачома чинк коряс. Мон те шкас аштян покш мельспаросо монень лезксэнь максоманть, тонавтоманть, превс путоманть кисэ! Сюконян модас! Кадык Пазось максы истянь зняро жо паро Тыненк, зяро теиде монень ды Семилей велень поселениянь эрицятнень лезэс.
Марина ТЯТЮШКИНА,
Семилеень медицинской
амбулаториянь
медицинской сестрась.
Мельвановикс Раиса Борисовна!
Семилей велень поселениянь эрицятне, ков совить Воеводское станциясь, Примерный ды Рассказово посёлкатне, те шкас эзизь стувто, кода Тынь тосонь ломантнень лециде аволь ансяк лецямопельсэ, лембе валсояк, паронь арсемасояк ды сынст мелест ваномасояк. Чачома чинк коряс ёвтан Тыненк поздоровт, арсян кеме шумбрачи, уцяска ды весе арсеманк топавтома!
Александр КУДАШКИН,
Семилей велень
администрациянь прявтось.
Вечкевикс Раиса Борисовна!
Комсте ламо иень перть Тынь ванстыде минек шумбрачинек, зярдо бу аволь саво пшкадемс, Тынь свал анок ульниде минек кунсоломс, лецямс, максомс эрявикс превс путома! Башка мель явиде сыре ломантненень, вишка эйкакштненень, весенень, кить Тыненк пшкалесть лезкс мельга. Весе седейстэ арсян Тыненк, весе малавиксэнк туртов кеме шумбрачи, уцяска, вечкема ды кувака пинге!
Анна МАКАРОВА,
«Норов» Агрофирмань
экономистэсь.