Истя лембестэ, вечкезь ды седейшкава лемдить Кочкуровань муниципальной райононь Семилей велень медицинской амбулаториянь медсестранть Марина Тятюшкинань. Эряви меремс, неень шкасто те амбулаториясь сови 5-це № Республиканской клинической больницянтень.
Тешкстасынек, Марина Сергеевна чачсь-кассь теке велесэнть. Тетязо-авазо, Сергей Семёнович ды Наталья Михайловна, кастсть кавто тейтерть. Виде, аванстэнь, Наталья Михайловнанень, Пазось эзь максо кувака пинге, сон тусь эрямосто, зярдо омбоце тейтерькантень Мариянень ульнесть ансяк 12 иеть.
Нать, а стяко васенце тейтересь Марина эрямонь тевекс кочкизе медицинанть. Школадо мейле тонавтнеманзо поладызе Саранскоень медицинской училищасо (ней лемдеви колледжекс).
Тонавтнеманзо прядомадо мейле од специалистэнть Марина Чавкинань (тейтерьксэнь фамилиязо) саизь важодеме Республиканской клинической больницяв, ладизь медицинской сестракс реанимациянь отделенияс.
Те больницясонть Марина Сергеевнань тевензэ ютасть парсте. Ансяк эрямо кись пачтизе васня тиринь Кочкуровань районов, мейле Семилей велев, косо сон лиссь мирденень Александр Тятюшкинэнь экшс. Тешкстасынек, Александр Николаевич важоди чугункань ки лангсо водителекс-электромонтёрокс.
Од семиянтень кудонь путомасо покш лезкс макссть Александр Тятюшкинэнь тетязо ды авазо – Николай Маркелович ды Ольга Ивановна. Те шкас лембе валсо сынст ледстни Марина Сергеевна урьваст. Тятюшкинтнэ трясть-кастсть кавто эйкакшт. Андрей покш цёраст важоди эсест Кочкуровань райононь «Норов» Агрофирмасо, Алёна тейтерест М. Е. Евсевьев лемсэ государственной педагогической университетэнть прядомадо мейле эри ды важоди Саранскойсэ.
Кода вере ледстинек, Марина Сергеевна аволь пек куватьс кадокшнызе вечкевикс тевензэ, тукшнось важодеме лия таркав. Се шкастонть, зярдо Семилей велень амбулаториясо эрявсь медицинской сестра, сонензэ истямо мель марто пшкадсь Раиса Борисовна Бабина, сынст велень участковой врачось. Те шкас Марина Сергеевнань ледстнематнес кадовсь се кенярксчись, конань сон маризе малав комсь иеде икеле. Раиса Борисовна лездась тензэ ледстямс медицинань коряс содамочитнень ды практиканть. Ялатеке сехте эрявиксэсь – кемемс эсь вийтнес!
2006 иестэ, зярдо РФ-нь Президентэсь кемекстась Указ семиянь врачтнеде ды сынст юрсо уликс семейной медсестратнеде, Марина Сергеевна поладызе тонавтнеманзо Саранскойсэ. Семилеев велявтомсто сынь ламо од ды лезэв совавтсть эрямос вейсэ Раиса Борисовна Бабина марто. Кодамо шкасто бу авольть гайневте тенст сэредицятне, кажос понгозтне, сынь свал анокольть самс лездамо ормалгадозентень. Те паро коенть Марина Тятюшкина полады нейгак.
Ней, зярдо сонзэ тонавтыцясь тусь важодеме Саранскоев, медсестрантень савкшны саемс эсензэ лангс ламо тевень коряс ответственностенть. Виде, сон сеедьстэ гайневтни 5-це № Республиканской клинической больницянь главной медсестрантень Светлана Дмитриевна Паршинанень. Марина Тятюшкинань валонзо коряс, велень амбулаториятненень, весе тосо эрявиксэнть улемантень покш мель яви сынст прявт врачось, МР-нь Госсобраниянь депутатось Анатолий Николаевич Пинямаскин.
Те иень февральстэ 5-це № Республиканской клинической больницясонть ютавтовсь «Лучший по профессии» пелькстамось. Марина Тятюшкина саизе омбоце тарканть. Теде башка, сон свал якси Семилей велень «Вастома» ансамблясонть морсеме. Художественной самодеятельностень те ансамблясь косо ансяк эзизе невтне ёрокчинзэ: эрьва иестэ «Шумбрат, Мордовия!» республикань фестивальсэнть, Ковылкинань муниципальной районсо мелят ютавтозь «Шумбрат!» фестивальсэнть, Лямбирень райононь «Сабантуй» покш кенярксчисэнть ды истя седе тов. Сынь эрить покш ояксчисэ, вейке-вейкень чарькодезь ды лездазь. Зярдо Марина Тятюшкина ульнесь «Лучший по профессии» пелькстамосонть, кисэнзэ «сэредеме» якасть «Вастома» ансамблянь весе аватне.
Валентина Юдина