Россиянь чистэнть Мордовиянь Прявтось Артём Здунов вастневсь специальной военной операциясо маштовозтнень малавиксэст марто. Чаень симемстэ кортамосонть ульнесть Саранскоень ды Мордовиянь Митрополитэсь Зиновий, МР-нь Правительствань Председателень Васенце Полавтыцясь Галина Лотванова, МР-нь Военной комиссарось Игорь Тихомиров, «Защитники Отечества» Госфондонь Мордовиянь филиалонь прявтось Алексей Герасименко, Отечествань воинтнэнь семиятнень комитетэнь региононь штабонь руководителесь Ольга Соболева.

Артём Здунов лембестэ пшкадсь СВО-нь участниктнень малавикстнэнень, ёвтась поздоровт Россиянь чинть кувалма ды тешкстызе, ламотнень туртов те кенярксчись сельведь марто. «Течи кенярксчи, эйкакштне артыть асфальт лангсо сэтьме эрямо, ансяк весементь тень улемга минек цёратне максыть фронтсонть сехте питнеенть, мезе ули ломаненть, – эсь эрямост. Весень минек туртов тынк цёратне – свалшкас геройть!»

Региононь Прявтось тешкстась, Россиянь Президентэнть кармавтоманзо коряс Мордовиясо, кода масторонь весе регионтнэсэ, панжозь «Защитники Отечества» Государственной Фондонь филиалось. «СВО-нь участниктненень ды сынст семиятненень лездамонь коряс ламот кевкстематне кармить топавтовомо те площадкасонть, тыненк мереви пшкадемс тей куш кодамо кевкстема марто – районтнэнь прявттнэнень, волонтёртнэнень, весе вейсэндявозь те важодемантень», – мерсь Артём Здунов.

Вастовоманть прядовомсто Мордовиянь Прявтось явшесь маштовозь геройтнень малавикс ломантненень государственной наградат. Мужествань Ордент максозь Лямбирень районсто младшей сержантонть Еналиев Радик Гаязовичень аванстэнь ды братонстэнь; Теньгушевасто рядовоенть Куликов Денис Сергеевичень тетянзо-аванзо ды ялаксонзо туртов, райцентрасо сонзэ ледстнемга панжозь мемориальной лаз ды Героень Парта; Саранскойстэ рядовоенть Евгений Сарайкинэнь тетянстэнь-аванстэнь ды тейтеренстэнь; Лямбирень райононь Татарская Тавла велесэнть чачозь старшинанть Руслан Ямбушевень тетянстэнь ды аванстэнь. Российской Федерациянь Вооружённой Вийтнень Верховной главнокомандующеень Благодарность максозь Саранскойсэ чачозь ефрейторонть Андрей Василькинэнь аванстэнь.