Россиянь чинтень алтазь мероприятиятне ютасть Мордовиянть келес ды республикань кудосо. Важодемасо ды общественной тевтеемасо изнявкстнэнь кисэ покш казнеть явшезельть мордовиянь эрицятненень, кить тейсть редявикс путовкс масторонь сэтьмечинть ванстомантень, региононь, промышленной предприятиянь эли организациянь виевгавтомантень, духовно-нравственной питнейчитнень ванстомантень. Мероприятиясонть ульнесь Мордовиянь прявтось Артём Здунов.
«Государствань виесь, сонзэ олячись, историянть ды койтнень ванстомась – минек ине масторонь эрьва эрицянть паро эрямонь юр, – тешкстась сон. – Россиянь Президентэнть Владимир Владимирович Путинэнь прявтсо минь тейтяно государствань од история флагонть ало, конань тюстнэ невтить вий, кемема, Чачома масторонтень вечкема. Неть ёнкстнэ весе шкатнестэ лездасть тенек ванстомс Отчизнанть ды, нама, изнямс. Кеман, сынь лездыть изнямс минек цёратненень, конат участвовить специальной военной операциясонть».
Тешкстазель, меельце иетнень изнявксокс кармась се, што Россиясь а менчеви Западонть икеле. Весе те лезды Россиянь эрицятненень марямс эсь пряст оля масторонь гражданинэкс.
Артём Здунов ёвтась башка сюкпря государствань лидерэнтень Владимир Владимирович Путиннэнь: «Весе минек тевтнень топавтомасо прявт нежекс ашти масторонь руководствань лезэсь, федеральной центрань лезксэсь, национальной весе проекттнэнь топавтомасо улемась».
Мордовиянь Прявтось пшкадсь Мордовиянь од эрицятненень, конатненень явшесь Российской Федерациянь гражданинэнь паспортт: «Кирдеде мельсэнк, тынь эрятадо ды тонавтнетядо масторсонть, косо чачсть-кассть ламо учёнойть, сёрмадейть, артыцят, лецицят, тонавтыцят, конатнень содасынзе весе масторлангось. Минек масторось васенцекс саизе космосонть, минек солдаттнэ велявтсть изнямо марто Берлинстэ, олякстомтызь Чачома масторонть ды весе масторлангонть фашизманть эйстэ. Ней минек воинтнэ поладыть покштяст тевест. Вечкевикс эйкакшт, свал каштанчи марто кандтнеде Россиянь гражданинэнь лементь!»
Казнетнень явшеманть ушодомсто, Артём Здунов тешкстызе: «Мельспаро, течинь лауреаттнэ – эрьва кодамо поколениянь, тевтеемань эрьва кодамо ёнксонь ломанть. Ёвтан эрьвантень юткстонк «сюкпря» профессионализманть, тевентень мелень явоманть ды ответственной гражданской позициянть кисэ. Эрьвась эсензэ таркасо малавгавты Изнямонть, виевгавттадо масторонть ды республиканть. Минь аштетяно каштанчисэ Россиянть кувалма!»
Мужестванть, отваганть ды апелемачинть кисэ, конат невтезь специальной тевтнень топавтоманть пингстэ, медальтнесэ тешкстазь специальной военной операциянь участниктне. Александр Кузин лейтенантось, кона казезель Мордовия Республикань Славань II степенень орденсэ, мерсь: «Эрьвась, кие топавты СВО-со эсь долгонть – алкуксонь герой. Монь казнесь – те весе боевой ялгатнень, земляктнень казнесь. Миненек пек питней лезксэсь, конань явить республикань прявттнэ, волонтёртнэ. Минь тейсынек весементь ятонть изнямга!»
«За смелость и отвагу» отличиянь тешкст максозь Республиканской 4 № клинической больницянь врачтненень-хирургтненень Павел Богдашкиннэнь ды Юрий Орловнень, кить макссть медицинань лезкс олякстомтозь таркатнень эрицятненень.
Важодемасо изнявкстнэнь ды ламо иетнень перть вадрясто важодеманть кисэ РФ-нь Президентэнь Почетной грамотасо ды Благодарностьсэ казезь «Резинотехника» заводонь лаборантось Румия Сюбаева, «Управление механизации и нулевых работ» ООО-нь башенной кранонь машинистэсь Надежда Болдырева ды «Комплекс-строй» ООО-нь автогрейдерэнь машинистэсь Александр Видманов.
Мордовия Республикань Славань II степенень орденсэ гражданской мирэнь кемекстамонтень ды духовно-нравственной ды культурань койтнень ванстомантень покш путовксонть кисэ казезь Саранскоень ды Мордовиянь Митрополитэсь Зиновий. Республикань агропромышленной комплексэнь виевгавтомантень покш путовксонть кисэ Мордовия Республикань Славань I степенень орденсэ казезь «Старошайговагропромснаб» АО-нь прявтось Анатолий Фролов – МР-нь Славань полной Кавалерэнть лемс гайгсь Мордовия Республикань Гимнась.
«Заслуженный работник культуры Республики Мордовия» почетонь лемесь шкинемань тевтееманть ды культурань виевгавтомантень покш путовксонть кисэ максозь Ине Отечественной войнань ветеранонтень, краеведэнтень ды путешественникентень Валентин Крайновнень.
Каршо валсонть Н. П. Огарёв лемсэ МГУ-нь Историко-социологической институтонь прявтось Николай Арсентьев (сон казезь Мордовия Республикань Славань II степенень орденсэ) тешкстась: «Минь важодтяно аволь казнетнень кисэ, минь служатано Отечествантень!»
Те чистэнть поздоровт истя жо ёвтасть МР-нь Госсобраниянь Председателесь Владимир Чибиркин ды МР-нь Правительствань Председателесь Дмитрий Поздняков. Сынь истя жо явшесть казнеть тонавтыцятненень, лецицятненень, служащейтненень, важодицятненень, ветерантнэнень Мордовиянть ды Россиянть лезэс вадря важодеманть кисэ.