Августонь 2-це чистэ Мордовиянь Прявтось Артём Здунов ЦУР-со ютавтсь виде линия, конань шкасто макссь каршо валт региононь эрицятнень кевкстемаст лангс, конат кучозельть социальной сеттнень вельде. Теде башка, студиянтень тердезельть журналистт, блогерт ды общественникть, конатне истя жо макссть зярыя кевкстемат.
Ветясь виде эфирэнть содавикс журналистэсь Анастасия Видяева. Артём Здуновнень весемезэ састь нилесядто ламо кевкстемат. Эфирэсь мольсь 1,5 част.
Васняяк Мордовиянь Прявтось ёвтась поздоровт Илия пророконь ды ВДВ-нь чинть кувалма, ды ёвтызе эсь семиянзо кенярксонть. Диана нинзэ марто комсь иеде теде икеле сынь кармасть мирдекс-никс ды кастыть кавто эйкакшт. Те чистэнть сынь тешкстызь фарфоровой свадьбаст, ды Артём Алексеевич кучсь шумбракстнемань валт малавиксэнзэ туртов.
Мейле ушодовсь кевкстематнень лангс каршо валонь максомась. ЖКХ-сь, китнень витнемась, общественной таркатнень вадрялгавтомась-мазылгавтомась – истят пшкадематнеде ульнесть весемеде ламо. Саранскоень эрицятне сехте пек мелявтыть Тежа иень площаденть ды Фонтанной валгома тарканть витнемаст коряс. Республикань Прявтось тешкстась, тедеде важодематне ушодовить площадьсэнть, финансированиясь муезь. Фонтанной валгома таркантень кундыть сы иестэ.
Республикань Прявтось, Мордовиянь эрицятнень кевкстемаст лангс каршо валонь максомсто, пшти кортамотнес сеске вейсэндинзе министратнень ды районтнэнь прявттнэнь. Истя, тешкстазель Рузаевкань эрицятнень туртов пек талновтыця кевкстемась, конась сюлмавозь водопроводонь-канализациянь хозяйстванть марто. Эсь шкасто сеттне максозельть частной кедтнес, азортнэ эзть путо инвестицият инфраструктурань виевгавтомс, ансяк сайсть ярмакт. Сеттнесэ свал лиснить аварият, канализациянь коллектортнэ потомсть. «Те кевкстемась ней ваннови судонть вельде. Тевс нолдавить закононь весе ёнкстнэ, штобу велявтомс предприятиянть, максомс сонзэ лезэнь кандыця азорнэнь эли важодемс эстенек», – мерсь Артём Здунов.
Саранскоень эрицятне пшкадсть башка адрестнэнь коряс кевкстематнень марто – сынь кевкстнесть эйкакшонь площадкатнень вадрялгавтоманть, общежитиятнень витнеманть, кудотнень перька таркатнень мазылгавтоманть коряс. ТЭЦ-2 райононь эрицятне пеняцясть налксемань площадкаст арасьчинь кувалма ды истя жо сень лангс, што «Т-Плюс» компаниясь эзизе ванськавто тарканть витнемань тевтнень ютавтомадо мейле. Артём Здунов алтась явомс башка мель те райононтень.
Саранск ошонь округонь Пушкина посёлкань эрицятне пеняцясть: модань участкатнес, конат явшевсть ламо эйкакшонь семиятненень, апак ветя кодаткак коммуникацият. Республикань руководителесь видькстась, кевкстемась пек пшти, ды кармавтсь ошонь прявтонтень Игорь Асабиннэнь вастовомс ломантнень марто ды кортамс те стакачинть витемадо.
Районтнэнь эрицятнень сехте пек талновтыть берянь китне. Виде эфирэнть шкасто састь пек ламо истят кевкстемат. Кортамось истя жо мольсь Покш Березникень, Зубова-Полянань райононь Каргашино ды Анаево велетнень ютксо китнеде. Госкомтрансонтень кармавтозь саемс ёвтазь китнень башка вановт алов ды куроксто пачтямс Прявтонтень сынст витнемаст коряс.
Республикань руководителесь истя жо макссь каршо валт кевкстематнень лангс, конат сюлмавозь школатнень педе-пев витнеманть, медицинань учреждениятнень ды велень хозяйствань предприятиятнень кадратнесэ топавтоманть, туризмань виевгавтоманть марто.
Кортамось мольсь СВО-нь участниктненень лездамодонтькак. Кепедезель оймсеме сыця боецтнэнь пачтямодо кевкстемась. Ней сынь сыть тиринь ёнксов эсест вийсэ, тень пингстэ лиснить башка стакачить. Республикань Прявтось кармавтсь ванномс те кевкстеманть.
Республикань раськень кельсэ нолдавиця печатень изданиятне кевкстнесть, кода ванстомс-кастомс мокшонь-эрзянь раськенть, тиринь кельтнень ды культуранть. Эрицятнень сёрмадстомань цифратнень коряс неяви, эрзятнень-мокшотнень ламоксчись пек алкиньгадсь. Артём Здунов тешкстась, минек раськесь, нама, эзь аламолгадо. Тевесь сеньсэ, кода эсь прянок марятано, кода сёрмадстынек раськень лементь. Тень коряс эряви ветямс покш важодема. «Ней минь поладынек важодеманть Московсо Мордовиянь землячествань од ломантнень марто. Сынст икелепелев кияк эзинзе пурнакшно. Зяро тосо предпринимательть, культурань деятельть… Сынь ней вастневить землячествань ушодыцятнень марто, конатнень ютксо силовой структуратнень, властень органтнэнь, управлениянь ды бизнесэнь представительть. Истямо паро пурнавсь конгломерат. Мон аволь умок мартост вастовкшнынь», – ёвтнесь Артём Алексеевич. Вейсэнь вастовоматне-кортамотне, диаспоратнень марто виде важодемась, кулятнень пачтямось ветить паро ёнксов, тешкстызе р еспубликань Прявтось ды ёвтась, сон эсь прянзо сёрмадстызе «мордвинэкс», кода эйкакшонзояк. «Эйкакштне касыть ды тень чарькодьсызь, эдь васняяк варштыть лангозонок, аволь мезе кортатано, а кода минь ветятано прянок, явтано-арась мель раськень кенярксчитненень, оршамопельтненень, келентень. Кевкстемась аволь сеньсэ, келя, минденек кармасть седе аламо, сон сеньсэ, минек раськесь сралевсь масторонть келес, ломантне ардтнить, вешнить важодема, тонавтнема таркат, ды ледстнить-арась эсь тиринь ёнкстост. Минек задачанок – весень вейсэндямс. Сась шка пурнамс кевть. Пек эрявикс кевкстема кепедиде, тень коряс важодтяно эрязасто», – тешкстызе республикань руководителесь.
«Эрзянь правда» газетанть пельдеяк максозельть кевкстемат. Прявт редакторось Марина Девятова ледстизе Прявтонть Мордовиянь Госсобраниянтень тедедень Кучоманзо эрзянь кельсэ пелькстнэнь марто, конась талновтынзе аволь ансяк тесэнь эрзятнень-мокшотнень, весе диаспоратнень регионтнэсэ. Те ульнесь васенцеде минек республиканть историясо ды кадовсь ламонь мельс. Те шкас се Кучомадонть кортыть ды тердить саемс лангстонзо пример. Кода молить Прявтонть тевтне эрзянь ды мокшонь кельтнень тонавтнеманть коряс ды кода кастомс-кемекстамс од ломантнесэ вечкеманть тиринь келентень-культурантень ды, целанек, мейсэ явовить неень шкань од ломантне минденек – истят ульнесть «Эрзянь правданть» кевкстеманзо.
Артём Алексеевич кенярдозевсь кевкстемантень ды мерсь, келя, сон пек паро, апак сюлмаво ЖКХ-нть марто (мизолдозь), ды макссь истят каршо валт: «Неень шкань од ломантне, кода мерсь РФ-нь Президентэсь, свал минденек парот, одт, ёжовт, эрязкалицят. Бути кортамс кельтнеде, од ломантне те ёнкссонть минек лезкстэме кодаяк, а кармить минек ёндо примерт – мезеяк а полавтови». Артём Здунов сонсь тонавтни эрзянь келенть ды мартонзо тень теи цёразояк. Кадык сон парсте соды омбо масторонь кель, теке марто яви тенень мель, секс мекс тетязо тенень яви мель. Республикань руководителесь кармавтсь весенень бажамс кортамс тиринь кельсэ. А эряви стувтнемс неень шкань программатнедеяк. «Ансяк книгатнесэ ды тонавтомань ташто койтнесэ сынст а манясыть», – тешкстась Прявтось ды ёвтнесь седе, кода Н. П. Огарёв лемсэ МГУ-со теить рузонь кельстэ эрзянь кельс электронной ютавтома (переводчик). Шнынзе сон тосонь эрзянь ды мокшонь кельтнень кафедрань преподавательтнень, конатне тензэ лездыть тонавтнемс эрзянь келенть. «Монь покштям-сырькаем кудосо свал кортнесть эрзякс ды пек ваньксстэ, тетям содасы келенть аволь пек парсте. Сон тусь Мордовиясто служамо лия ёнксов. Паряк, секс келесь монь туртов парсте саеви. Преподавательтне эсест виев методикаст вельде, паряк, сынь эштё советской шкань, эрьванть тонавтсызь кортамо. Мокшонь келесь ашти резервсэ. Мон эдь аволь ансяк эрзянь ёнксонть кисэ отвечан. Яксян кенярксчитнева, тосо эряви кортамс тиринь кельсэ. Арсян, весе карми вадря!»
Артём Здунов арсесь минек прявт редакторонтень поладомс эсь важодеманзо, ёвтась сюкпря эрзянь келенть ванстоманзо кисэ ды эрзякс мерсь: «Уледе шумбрат! Уледе весе парт!»
Мордовиянь руководителесь истя жо тешкстась, эряви кунсоломс од ломантнень мелест-арсемаст, марямс, мезе сыненст эряви, кодат ушодкст сынь ёвтыть. «Мон ульнинь исяк «Гвардеец» округонь военно-патриотической промкстнэнь панжомасо, кортынь минек цёратнень марто. Од ломантне ней лият, сынь а пелицят, ёжовт ды миненек весенень эряви бажамс, штобу ладямс сынст вешематненень, – мерсь Мордовиянь Прявтось. – Сынст покш учомаст видечинть коряс. Сынь монень кортасть башка тевтнеде: китнеде, ЖКХ-нь стакачитнеде. Весе пшкадематнень пачтинь Правительствантень. (МР-нь ред.) Ды ней энялдан Правительствантень домкасто ванномс весе кевкстематнень, конат састь виде эфирэнть шкасто. Те эряви. Эштё аволь весемесь минек лиссь, ансяк ламо уш теезь республикасонть. Витинек тевтнень бюджетэнть марто – тесэ минек касомань вадря невтевкст, покшолгавтынек китнень фондонть. Ансяк те весе а карми неявомо, бути ломанесь а мари каршо валт эсензэ кевкстематнень лангс. Яводо седе покш мель ды важодеде седе эрязасто!»
Меельцекс Прявтонтень максозельть блиц-кевкстемат. Артём Алексеевич ёвтась, сон вечки чокшне ловномо книгат, оймсема чистэ ваны фильмат, уды ковгак ардомсто ды ваны минек блогертнэнь.