Декабрянь 15-це чистэ ютавтовсь МР-нь Государственной Собраниянь сисемеце тердемань колоньгемень васенце сессиясь. Тосо ульнесть Мордовиянь Прявтось Артём Здунов, региононь правительствань члентнэ, властень исполнительной органтнэнь ды местной самоуправлениянь органтнэнь представительтне.
Сессиянть панжизе ды ветясь МР-нь Госсобраниянь Председателень полавтыцясь Наталья Долматова. Чинь повесткас совавтозельть кемгавтово кевкстемат. Васняяк толковасть «О внесении изменений в Закон Республики Мордовия «О республиканском бюджете Республики Мордовия на 2023 год и на плановый период 2024 и 2025 годов» Мордовия Республикань Законопроектэнть коряс. Эйзэнзэ совавтозь зярыя полавтомат. Сындест пачтясь МР-нь финансонь министрась Сергей Тюркин.
– 2023 иентень доходтнэнь покшолмась кассь 607,5 млн целковойтнес. Ярмактнень арсеви явшемс китнень витнемс, общей ды дошкольной образованиянь муниципальной учреждениятнесэ важодицятненень зарплатань пандомс, транспортонь ды жилищно-коммунальной комплексэнь отраслятненень лездамс, – мерсь Сергей Александрович. 2024 иестэ ламо ярмакт явовить социальной сферантень: образованиянтень, здравоохранениянтень. Неть тевтнес ютавтовить 32,4 млрд целковойть. Истя жо бюджетэнь ярмакт явовить Ромодановань райононь Белозерье велень школань од корпусонть, Саранскойсэ 600 таркас школанть ды Саранскоень специальной (коррекционной) общеобразовательной школанть-интернатонть строямс, эйкакштнень оймсемаст ды шумбрачист витеманть коряс мероприятиятнень ютавтомс.
Финансонь лезкс арсеви максомс льготань категориянь эрицятненень, педиця орматнень каршо бороцямонь тевтнень ветямонтень, нацпроекттнэнь топавтомантень. Истя жо поладовить Ицялонь сыре ломантнень ды инвалидтнэнь туртов кудонть-интернатонть строямось, сиведемань договоронть коряс уроз эйкакштненень эрямо таркатнень максомась.
Депутаттнэ кемекстызь «О пчеловодстве в Республике Мордовия» Закононть. Сондензэ макссь толковамот республикань прокурорось Сергей Лапин. Законось лезды нешкепирень кирдемань отраслянь виевгавтомантень ды мекшень кирдицятнень праваст ванстомантень.
Ламо эйкакшонь триця-кастыця семиятненень ды колмо иеде седе вишкине эйкакш марто семиятненень лездамга МР-нь Госсобраниянь Социальной политикань коряс комитетэсь, инфляциянть мельсэ кирдезь, ёвтась мель покшолгавтомс эрьва ковонь пандоманть кото иес эйкакштненень лецямопельтнень, ве шкасто колмо ды седе ламо чачозь эйкакштнень семиятненень эрьва ковонь пособиянть (зярс эрьва эйкакшонтень а топодить 18 иеть); врачтнень меремаст коряс ловсонь продуктатнень рамамс эрьва ковонь пандоматнень.
Меельцекс МР-нь Госсобраниянь Председателень полавтыцясь Наталья Долматова пачтясь парламентэнь иень итогтнеде. Те шканть перть ютавтозельть 12 сессият, кемекстазь республикань 107 законт, 50 постановленият, ванкшнозь 945 федеральной законопроектт ды 185 законодательной ушодкст, конат састь лия регионтнэнь законодательной собраниятнестэ.
Сессиясонть истя жо аравтозь мировой судьят.
Валентина Юдина