Аволь умок масторонь келес тешкставсь Вирьсэ важодицятнень кенярксчись. Сонензэ алтавсть ламо акцият ды мелень витемань тевть. Неть читнестэ виртнесэ сехте парсте важодицятне пурнавкшность Республикань Кудос. Сыненст поздоровт ёвтась ды макссь казнеть МР-нь Прявтось Артём Здунов.
Те профессиянь топавтыцятнень покш путовксост пертьпельксэнть ваньксчинзэ ванстомасо ды сонзэ мазылгавтомасо, идем ракшатнень ламолгавтомасо. Нама, васень таркас сынь аравтыть вейсэнь сюпавчитнень толдо ванстоманть. Те иень кизэнь пси шкастонть сынст виев важодемаст лездась а нолдамс истямо покш кажотнень.
Кода неень шкасто важоди МР-нь Вирень, охотямонь хозяйствань ды природопользованиянь министерствань «Саранское территориальное лесничество» МР-нь ГКУ-нь Кочкуровань участковой лесничествась, неть читнестэ неинек эсенек сельмесэ.
Сёксень вейке маней, лембе чистэ «Саранское территориальное лесничество» МР-нь ГКУ-нь прявт лесничеенть Юрий Васильевич Чикнайкинэнь ды Кочкуровань лесничествань вирень ванстомань коряс государственной участковой инспекторонть Юлия Петровна Комкинань марто якинек вирев.
Чарькодеви, пертьпельксэнть вечкемась, вирьсэ чувтотнень-куракштнень ванстомо тонадомась ушодови эйкакш пингестэ. Тень кувалма васняяк лоткинек Сурвелень школанть ваксс. Сонзэ икеле вастовинек «Саранское территориальное лесничество» МР-нь ГКУ-нь Кочкуровань участковой лесничествань лесничеенть Василий Русяйкинэнь марто. Тешкстасынек, Василий Алексеевичнень неть читнестэ макссть питней казне, сон кармась улеме РФ-нь вирень заслуженной роботникекс. Покш казнесь тензэ максозь а стяко, сон малав 40 иеть пии-палы виртнень сюпавчист ламолгавтомаст ды ванстомаст перька. Сон полады раськензэ тевенть, кинь вирьсэ важодемань вейсэнь стажост малав 200 иеть. Ды а стяко сонзэ марто вастовинек школанть икеле. Василий Алексеевич ламо важоди од ломантнень марто экологиянь тевтненень тонавтоманть, тиринь ёнксонь питнейчитнень ванстоманть коряс.
Вана нейгак тонавтницятненень, «Сосёнки» школань лесничествас совицятненень, сон сась аволь чавонь кедть, эйкакштненень кандсь ламбамо казнеть. Эдь сынь сеедьстэ невтить ёрокчист муниципальной, республикань ды весероссиянь пелькстамотнесэ.
Ютазь кавто иетнестэ «Лучшее школьное лесничество» пелькстамосонть «Сосёнки» лесничествась мельга-мельцек совась изницятнень юткс. «Ёлочка, живи!» конкурссонть «Лучшая стенгазета» номинациясонть сынь лиссть колмоце таркас.
Теке жо чистэнть «Саранское территориальное лесничество» МР-нь ГКУ-нь лесничеесь Ю. В. Чикнайкин макссь вирень ведомствань Почётонь грамота те школань тонавтыцянтень, «Сосёнки» школань лесничествань прявтонтень Валентина Никитична Нуштайкинанень.
2022-2023 иетнестэ тонавтницятнень ютксто пурнасть «Сосёнки» агитбригада. Васня невтизь ёрокчист эсест школасо, мейле Кочкуровань районсо. Жюринтень вечкевсть ды сынст саизь республикань «Есть дело до лесного дела» агитбригадань конкурсонтень, косо максызь тенст 4-це тарканть.
Седе, кода эряви тонавтомс эйкакштнень пертьпельксэнть вечкеме, сонензэ покш мелень явомо, ды Сурвелень школасо «Сосёнки» лесничестванть важодемадо, минь кортнинек Валентина Нуштайкина марто.
– Валентина Никитична, умок-аволь топавттадо тонавтыцянь тевенть?
– 1997 иестэ Н. П. Огарёв лемсэ МГУ-нть прядомадо мейле сынь «география» предметэнь тонавтыцякс Морд. Давыдовань школав, 2013 иестэ саезь важодян Сурвелень средней школасо. Тонавтыцянь тевесь а шожда, ялатеке пек вечкса профессиям, конанень алтынь 25 ламо иеть. Эрьва иестэ тонавтницянок марто невттяно ёрокчинек пелькстамотнесэ, олимпиадатнесэ. Минек эйкакштне аволь весть лиснесть изницякс ды призёрокс географиянь, обществознаниянь, историянь ды лия предметтнэнь коряс.
– Инескеть, пачтядо «Сосёнки» школань лесничестванть историядонзо, конань прявтсо Тынь важодтядо ламо иеть.
– «Сосёнки» школань лесничествась Сурвелень средней школасо теезель ютазь пингень 70-це иетнестэ. Сон пурназель минек школань педколлективенть ды «биология» предметэнь тонавтыцянть Александр Никифорович Канаевень ушодксост вельде. Те тевсэнть, кода икеле, истя нейгак, покш путовксост Сурвелень лесничествань важодицятнень. Истя, малав 50 иеде икеле велесэнек теевсь лиятнень ёнов а молиця школань кружок, косо эйкакштнень тонавтыть пертьпельксэнть ды, васняяк, виртнень вечкеме ды перьканзо мелявтомо. Васняяк тонавтницятнень марто ютавтневить теоретической ды практической занятият. Шкань ютазь анокстазель нормативно-правовой базась, конань пингстэ кармасть кемекстамо эрьва кодат эрявикс документт, программат, приказт, вейсэнь договорт ды истя седе тов. Весе те шканть перть минь важодтяно «Большеберезниковское территориальное лесничество» МР-нь государственной казённой учреждениянть марто.
– Школань лесничествасо неень шкасто зяро тонавтницят ды иень кодамо шкасто седе ламо тевть сынь топавтыть?
– «Сосёнки» школань лесничествась, конась теезь «Сабаевская СОШ» МБОУ-нть юрсо, малав весе арсеманзо ды тевензэ топавты уроктнеде юткошкастонть. Сынст тевест а маштнить сёксень, тундонь ды кизэнь каникулатнестэяк. Тешкстаса, кизэнь шкасто сеедьстэ тенек вейсэндявить сеть эйкакштне, кить сыть ошсто велев каникуласт ютавтомо.
Эрьва кодамо шкасто, сестэ эштё школань кружоконтень, ней школань лесничествантень,с совицятне ульнесть аволь вейкеть. Весемесь аштесь седе, зяро тонавтницят школасонть, ды истят эйкакштнеде, кинь ули мелест тов якамс. Меельце шкасто минек школасо эйкакштне яла аламолгадыть. Свал якицятнеде – 20-25 эйкакшт. Неть 7-11 класстнэсэ тонавтницятне. Школасонок экологиянь темас ютавтовиця мероприятиятнес тердевить весе, кинь ули мелезэ невтемс ёрокчинзэ.
– Кодамо ёнксонь коряс ветяви важодеманк школань лесничествасо?
– Минек школань лесничестванть важодеманзо коряс ули эсенек Уставонок ды Положениянок. Кемекстазь договоронть коряс тевенек явовить ниле ёнкска: эколого-просветительской, природоохранной, исследовательской ды лесохозяйственной.
Эколого-просветительской ёнксонть коряс тонавтницятнень марто анокстатано ды явшетяно буклетт, листовкат, ютавттано анкетированият «Покормите птиц», «Ёлочка, живи!» акциятнень ютавтомадо икеле. Меельце шкасто анокстынек ды ютавтынек «Наши зимующие птицы», «Синичкин день», «По страницам экологического календаря», «Сила леса», «Заповедные места Республики Мордовия» занятият.
Омбоце ёнксось – пертьпельксэнь ванстомась. Тень пингстэ эрямос совавтовить ламо проектт: «Берегите лес от пожара», «Зелёная весна», «Ёлочка, живи!», «Берёзкины слёзы», «Не оставим лес», «Сад памяти» ды лият.
Биотехнической мероприятиятнень ютавтомсто понгавтневсть нармунень кудот, теевсть тенст эрямо таркат. Вейсэ Кочкуровань участковой лесничествасо важодицятнень марто ванськавтови виресь, максови лезкс зыянс понгозь идем ракшатненень ды нармунтненень. Тонавтницятнень туртов исследовательской важодеманть эрявиксчидензэ башка толковамс а эряви. Чарькодеви, эйкакштне сонзэ вельде редясызь стакачитнень, мусызь эйстэст лисемань кинть. Сон теи тонавтницятнень эсь вийтнес кемицякс, седе ламо содамочинь пурныцякс, сы шкань профессиядост арсицякс. Невтемакс, сынь важодсть Кочкуровань райононь орнитофаунань коряс. Неть исследовательской роботатне парсте идезельть научно-практической конференциятнесэ, конат ульнесть эсенек районсо ды республикасо.
Лесохозяйственной ёнксонть коряс сёксня ды тунда топавтовить виренть одкстомтоманзо коряс ламо тевть: чувтотнень озавтомась, видьмекстнэнь путомась, од чувтотнень ды куракштнень мельга якамось, видьмекстнэнь ды пиче умарень пурнамось.
Минек тонавтницятне а кадновить ве ёнов «Всероссийский день посадки леса», «Зелёная весна» ды лия акциятнень эйстэ. Сынст вельде аволь ансяк ламолгавтовить касыця чувтотне, истя жо эйкакштне тонавтовить виртнень ванстомо ды виренть перька важодиця ломантнень профессияст седе парсте содамо.
Валентина Юдина