Неть читнестэ Мордовской госуниверситетсэ ушодовсь МР-нь Велень хозяйствань ды продовольствиянь министерствань, Н. П. Огарёв лемсэ МГУ-нь ды Россельхозбанконь «Фермерэнь школа» вейсэнь проектэсь. Эйзэнзэ максозельть кодгеменде ламо яволявтомат, пелькстамонь кочкамонть ютызь 35 ломанть. Ней сынь кармить тонавтнеме фермерэнь тевентень «Животноводство» ды «Растениеводство» ёнкстнэнь коряс.
Пелькстамонь участникекс кармасть крестьянской (фермерэнь) хозяйстватнень прявттнэ, конатне важодить минек республикасо, Н. П. Огарёв лемсэ МГУ-нь Аграрной институтонь студенттнэ ды истя жо сеть, кить арсить важодемс АПК-нь ёнкссо предпринимателень тевсэнть минек регионсо.
– Комсь иеде икеле Н. П. Огарёв лемсэ МГУ-со панжозель «Технология производства сельскохозяйственной продукции» специальностесь. Те ульнесь васенце эскелькс сы шкань фермертнэнь анокстамосонть. Ансяк вана анокстамонь шкась ульнесь вете иеть. «Фермерэнь школа» проектэнть течинь важодемасо овсе лия ёнкст. Тей сыть ломанть уш опыт марто ды ули эрявикс образованияст. Секскак тонавтнемань шкаськак ков седе аламо, – школанть важодеманзо панжомсто тешкстась Н.П. Огарёв лемсэ МГУ-нь васенце проректорось профессорось Пётр Сенин.
Тонавтнемань шканть перть «Фермерэнь школань» участниктне содавтсызь предприятиятнень ды крестьянонь-фермерэнь хозяйстватнень производственной ды перерабатывающей площадкатнень, косо ванносызь важодемасо нолдавиця агротехниканть ды эрявикс оборудованиянть.
– «Фермерэнь школась» лезды кемекстамс уликс содамочитнень, важодемасо а нолдамс ильведькстнэнь ды теевемс седе вадрякс. Тонавтнемань те проектэсь уш невтизе эсь эрявиксчинзэ. Проектэнь тонавтницятнень ламолгадомась ды географиянть келейгадомась кортыть седе – фермертнэнь ютксо тонавтнемань истямо ёнксось эрявикс. Кеман, «Фермерэнь школась» карми эштё вейке ёнксокс велесэ предпринимательстванть виевгавтомасо, – тешкстась МР-нь Велень хозяйствань ды продовольствиянь министрань васенце полавтыцясь Тимур Гаджиев.
Кавто ковтнень перть проектэнь участниктне ютасызь теоретической анокстамонть, тонавтнесызь фермерэнь хозяйстватнень важодемань правовой ёнкстнэнь, финансонь бизнес-модельтнень, маркетингень аравтлувтнень ды ютыть стажировка Мордовиянь покш предприятиятнесэ ды фермерэнь хозяйстватнесэ. Тонавтнеманть ютазь, весенень максовить дипломт.
– «Фермерэнь школа» проектэсь – лия ёнов а молиця. Минь а тонавттано вете иеть, тонавттано киртязь программань коряс. Проектэнть колмоцеде ютавтомась невти, те ёнкссонть специалисттнэ эрявикст. Иестэ иес ламолгадыть тонавтницятне. Покш сюкпря Н. П. Огарёв лемсэ МГУ-нтень тонавтнеманть туртов площадкатнень явоманть кисэ. Арсян, тестэ лисить вадрясто анокстазь специалистт, – мерсь «Россельхозбанк» АО-нь Мордовиянь региональной филиалонь прявтось Виктор Пузаков.
Кода уш тешкстынек икеле, те иестэ «Фермерэнь школа» проектэнь тонавтницякс кармасть 35 ломанть. Сынст ютксо Н. П. Огарёв лемсэ МГУ-нь Механикань ды энергетикань институтонь 4-це курсонь студентэсь Иван Наместников. Зярдо кевкстинек, мекс сон кочкизе «Фермерэнь школа» проектэнть, васняяк, сон мерсь, келя, те сонзэ туртов панжи од ёнкст.
– Зярдо мереви получамс од компетенцият, мекс бу тень а теемс. Теке марто тень кисэ а эряви пандомс, – мерсь од цёрась. – Мон ней истямо иесэ, маласо шкасто топоди тень 21 ие, зярдо ули покш мель седе ламо содамс. А неень шкасто тень туртов ули весемесь.
Иван чачсь-кассь ошсо ды велень эрямонть, теке марто, фермерэнь тевенть, овсе а содасы. Ансяк, кода мерсь од ломанесь, проектэнть прявт тевесь сеньсэ, кармить тонавтомо бизнес-плантнэнь сёрмадомантень-анокстамонтень.
– Бизнес-планось – те истямо тев, конась маштови куш кодамо ёнкссо важодемасонть, – мерсь Иван Наместников. – Невтемга, мон сёрмадан грантонь проектт. Покш сюкпря, «Росмолодёжь» федеральной агентстванть пельде течи улить пек ламо грантт. Эсь вийтнень мереви варчамс весенень. Зярс монь вановт ало спортонь туризмань ёнксось. Бажан невтемс весенень минек масторонь мазычитнень. А бути кармить эштё бизнесэнь ветямонь ёнкссонть содамочинь, те покш плюс монь туртов. Эдь монь улить арсеман сы шкастонть панжомс эсень тев. Кодамо ёнксонть марто сон карми сюлмавозь, зярс арсян. Паряк, «Фермерэнь школасонть» тонавтнеманть прядозь, кочкаса фермерэнь тевенть.
Юлия Еремина