Меельце шкасто «Эрзянь правда» тиринь кельсэ лисниця газетась ютавты ламо пелькстамот, акцият, од ды сыре ломантнень марто вастовомат. Минек ловныцятнень, соцсеттнесэ ваныцятнень марто важодемась седеяк виевгавтовсь Ине Изнямонь кенярксчинтень анокстамсто.
Аволь умок ютавтынек «Кияк апак стувто! Мезеяк апак стувто!» пелькстамонть, конань пингстэ миненек састь сизьгеменде ламо эрьва кодат важодевкст: морот, стихотвореният, артовкст.
Неть читнестэ минек прявт редакторось Марина Николаевна Девятова эрзянь кельс ютавтызе масторонь келес содавикс «Катюша» моронть. Теде мейле ёвтась мель эсенек редакциянь коллективенть вийсэ анокстамс видеоклип, алтамс сонзэ Ине Изнямонь кенярксчинтень.
Вана истя, тундонь маней чистэ «Эрзянь правда» газетань прявт редакторось Марина Девятова, экономикань ды велень хозяйствань отделэнь редакторось Юлия Ерёмина, общественно-политической отделэнь редакторось Валентина Юдина, минек фотокорреспондентэсь Эдуард Ретунский ды водителесь Александр Косолапов лиснинек Мордовиянь прявт ошонь сехте мазый таркантень, Саранка леень чирентень, ды серьгединек «Катюша» моронть эрзякс.
Тешкстасынек, истямо редакциясонок ульнесь васенцеде. Те казненть редакциянть пельде анокстынек минек покштятненень-бабатненень, кить войнань стака иетнестэ тюрсть ятонть каршо. Сынь малавгавтызь Изнямонть кода фронтсо, истя тылсэяк, пек стака важодеманть топавтозь. Клипенть снимизе ды анокстызе минек фотокорреспондентэсь Эдуард Ретунский.
Истя жо минь ёвтатано покш сюкпря лездыцянок туртов. Неть: Равчирень финнэнь-угрань раськетнень культурань центрась, «Вайгель» национальной радиопрограммась. Сюкпря ёвтатано Светлана Пивкинанень, Александр Асташиннэнь, Татьяна Моталинанень ды Валентина Дыдыкинанень.
Кемеви, истямо вейсэнь важодеманть поладсынек икелепелевгак. Ловныцятнень ды клипень ваныцятнень пельде учотано мельть-арсемат ды превс путомат. Видеоклипенть можна ваномс минек соцсеттнесэ.
Валентина Юдина