Четверг, июня 13, 2024
Важное

Ютазь недлясто А.С. Пушкин лемсэ Национальной библиотекасо ютась эрзянь ды мокшонь раськень регионъютконь общественной вейсэндявксонь исполкомонь келейгавтозь промксось. Сонзэ важодемстэ ваннозельть зярыя кевкстемат: васняяк, кода топавты вейсэндявксось эсь тевензэ республикасонть ды сеть регионтнэсэ, косо эрить эрзятне ды мокшотне.
Вастовомантень сакшнось истя жо культурань, раськень политикань ды архивень тевень министрань васенце полавтыцясь Александр Карьгин.

Панжизе промксонть вейсэндявксонь прявтось Юрий Мишанин ды сеске тешкстынзе республикань эрзянь ды мокшонь келень сехте паро кабинеттнэнь коряс пелькстамосонть изницятнень. Васенце таркатнень эрзянь келень кабинеттнэнь ютксо саизь Саранск ошонь 8 № школась (тонавтыцясь Л. А. Ледяйкина), Кочкурбуень Кочкур велень средней школась (тонавтыцясь А. С. Мигунова). Омбоце таркасо – Ицялбуень Рождественань средней школась (И. М. Панькина)
Юрий Александрович ёвтнесь седе, кода ютасть раськень кенярксчитне мелят ды кодат кармить ютавтовомо тедедень кизна. Кода свал, нама, юты «Шумбрат» покш чись, ков самс уш омбоцеде мель явсь сонсь Мордовиянь Прявтось Артём Здунов.

Ёвтнезель од ушодкстонть – «Национальное достояние» премиянть максомадо. Арсезь кото номинацият. Васенце премиянть покшолмазо карми малав 50 тёжат целковойть. Эштё кавто паро кулят: те эрзянь ды мокшонь кельтнень тонавтнема учебниктнень федеральной переченьс совавтомась ды социально-эрявикс литературань пелькстамонть топавтомась. Сонзэ коряс весе книгатне, конатне сёрмадозь эрзянь ды мокшонь кельтнесэ ды кучозельть конкурсонтень, нолдавить госбюджетэнь ярмактнень лангс. Тедеде арсеви истя жо ютавтомс од кенярксчи – те эрзянь ды мокшонь од ломантнень этнокультурань фестиваль Президентэнь грантонь ярмактнень лангс. Бути мелесь топавтови, сестэ те проектэсь юты пек келейстэ. Гранттнэнь ярмак лангс топавтовить ламо лия ушодксткак.

Тедеде исполкомось ютавтсь кавто промкст районтнэсэ – Темниковасо ды Орданьбуесэ, козонь тердезельть маласо районтнэяк. Неть вастовоматне кандыть ламо лезкс. Покш лезкс максыть исполкомонь члентнэ СВО-нь участниктнененьгак: пурныть ярмакт, гуманитарной лезкс Россиянь Мирэнь фондонтень. Тердезель поладомс те паро тевенть седе товгак ды седе келейгавтомс сюлмотнень Россиянь од регионтнэнь марто, вешнемс тосто минек ёнкссо чачозь ломантнень.
Юрий Александрович тешкстынзе мелявкстнэньгак, васняяк, кельтнень тонавтоманть коряс, школатнесэ раськень музеень панжоматнень коряс, тиринь кельсэ информациянть ульцятнесэ, киулотнесэ, организациятнесэ аламоксчинть. Ёвтнесь вейсэндявксонь прявтось регионтнэсэ эрзятнень ды мокшотнень марто вастовоматнедеяк. Истя жо кортасть регионтнэнь представительтне: Ульяновскойстэ, Чувашиясто, Пенза ёнкссто.

Исполкомонь прявтось Татьяна Ларина ёвтынзе, кодамо регионсо тедеде ютасть ды кармить ютавтовомо «Шумбрат» национально-фольклорной кенярксчитне ды сонзэ юрсо лия лем ало вастовоматне, эрзянь-мокшонь культурань читне, ды кодамо лезкс максы исполкомось сынст ютавтомсто: максы транспорт, кучи морыцят, панды тосо эрямо таркатнень, кучи казнеть.
Тиринь культурань читне уш ютасть Московсо, косо редязельть ламо минек раськень кедьчелькев ломанть ды ютавтозельть сынст выставкаст. Самарасо ульнесь «Од толонь чи», карми «Масторавань тундо», Нижней Новгородонь Лукояновасо карми «Эрзянь лисьмапря», Даньшинасо ютыть кавто покш кенярксчить… Ды истят мероприятиятнеде Россиянть келес арсезь пек-пек ламо.

Исполкомонь промксонть шкасто эсь важодемадост ёвтнесть Отяжелень ды Сыре Теризморгань раськень культурань центратнень представительтне. Меельцекс эрзянь ды мокшонь кельсэ нолдавиця газетатнень ды журналтнэнь редактортнэ тердизь весень а стувтомс тедедень омбоце пельиес изданиятнень лангс сёрмадстоманть.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».