Суббота, сентября 18, 2021
Важное

Зярдо-бути Женя вишка тейтернем туртов ёвтнинь Михаил Девятаевень подвигте. Те историясь пек талновтызе сонзэ. Шкань ютазь сон анокстась школав презентация-ёвтнема, кона мейле теевсь покш проектэкс. Проектэнь темань кочкамсто 9-це классо тонавтнемстэ Женя апак кавтолдо кочкизе Ине Отечественной войнань Героенть Михаил Девятаевень подвигенть.



Миньгак, малавиксэнзэ, талнозь ды покш мельсэ ушодынек лездамо анокстамс проектэнть, муемс эрямонь факттнэнь, ломантнень, конат парсте содылизь Девятаевень, вейсэ тонавтнинек-ванынек Героенть эрямонзо ды подвигензэ. Теевинек содавиксэкс Девятаевень цёранзо Александр Михайлович марто. Сон лездась витнемс видеороликень текстэнть, ёвтнесь тетянзо эрямосто эрьва кодамо тевде.

Мейле ардтнинек Мордовияв, косо мон чачинь. Тесэ поладынек вешнеманок. 1941-1945 иетнень войнань ды трудонь подвигень мемориальной музеень прявтось Н.А. Кручинкин макссь тенек М.П. Девятаевде документальной фильматнень марто диск. Сон лездась ды макссь превть весе шканть перть, зярс анокставсь проектэсь.
Якинек Торбеевасо М.П. Девятаевень кудонтень-музеентень. Тосо лембестэ вастымизь музеень прявтось Н.Б. Бегаева. Сон ламо ёвтнесь тенек Советской Союзонь Геройденть, семиядонзо. Раминек М.П. Девятаевень «Побег из ада» эштё вейке книганзо, конань уш аволь весть макснинек ловномс ялгатненень.

Ды вана аволь умок, чадыковонь 24-це чистэ, Санкт-Петербургонь Национальностень кудосо ютась «Герои Великой Отечественной войны: подвиг М.П. Девятаева» историянь коряс проектэнь презентациясь. Сонзэ анокстызе Государственной Рузонь музеенть юрсо Россиянь гимназиянь 10-це «А» классонь тонавтницясь Евгения Романовская. Те проектэнть арсеви тевс нолдамс ошонь школатнесэ. Секскак теде икеле меринь Женянень ютавтомс урок-презентация М.П. Девятаевень земляктнень туртов, «Шумбрат» фондонь участниктненень. Евгения пачтясь, кода анокстась проектэнть, кода талновтызе Девятаевень подвигесь.

Проектэнь методической материалтнэ лездыть ютавтомс 5-11-це класстнэсэ М.П. Девятаевень подвигте теманть коряс ледстнемань урокт (план-конспект, презентация, видеоролик). Тесэ эрьва ёндо невтеви Советской Союзонь Героенть эрямозо. Улить схемат, картат, фотографият.

Михаил Петрович Девятаевень подвигесь – те покш героизма, апелемачи, эсь масторонь вечкема, те паро невтевкс весе ломантненень. Лётчикенть-истребителенть обуцясь лездась цидярдомс весе стакачитнень: войнань зыянонть, фашистэнь концентрационной лагерень полонс понгоманть, оргодеманть, тиринь масторсо пансеманть. Мезеяк лангс апак вано, Михаил Петрович ульнесь алкуксонь ломанекс, сон вечксь ломантнень ды тиринь моданть.
Презентациядо мейле «Шумбрат» фондс совицятне ёвтасть мель поладомс проектэнть, а лоткамс тень лангс. Эряви ванномс Ине Отечественной войнань Геройтнень – Мордовиясо чачозтнень историяст.

Вастовомантень сакшнось Санкт-Петербургонь Национальностень кудонь раськеютконь тевтнень коряс отделэнь прявтось Г.А. Пономарёва. Фондонтень сон макссь военно-патриотической воспитаниянть кастомань кисэ Благодарность. Истя жо Благодарностьсэ казевсь проектэнь арсицясь Евгения Романовская, кона явсь покш мель те тевентень.

Пурнавозтне эзть капша туеме кудов: кортнесть вейкест-вейкест марто, дивсесть ды аштесть каштанчисэ Михаил Девятаевень подвигензэ коряс. Весе ёвтасть сюкпрянь валт Евгениянень. Миньгак ёвтатано сюкпря Санкт-Петербургонь ды Ленинградонь областень «Шумбрат» мокшэрзянь культурань фондонтень, Эрзянь ды мокшонь раськень регионъютконь общественной вейсэндявксонтень, 1941-1945 иетнень войнань ды трудонь подвигень мемориальной музеентень, Торбеевань М.П. Девятаев лемсэ кудонтень-музеентень.

Марина Романовская.
Санкт-Петербург ош

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».