Ине Отечественной войнань иетне пингеде-пингес кадсть масторлангонь эрицятнень ледстнемас а стувтовикс тешкст. Арась вейкеяк семия, косо бу авольть ледстне эсест героенть валдо лемензэ. Неть ломантне казсть неень шкань эрицятненень сэтьмечи ды валдо менель.
Зяро эрямот сайсь войнась… Зяро уцяскат ёмавтсь… Зяро кажот кандсь эрьва семиянтень, эрьва велентень, эрьва ошонтень… Арась Россиясо вейкеяк кудо, конань кенкшс бу аволь вачкоде эсь кельме кедьсэнзэ войнась. А ёвтавияк неть зыянов читнень тандадомась, кона пингеде-пингес кадовсь минек покштятнень ды сыре покштятнень ледстнемас. Кодамояк валсо а ёвтави малавикс ломантнень ёмавтомань апарось, конат тусть фронтов ды эзть велявто: веенст ёмасть кулявтомо, лиятне тюремань паксятнес кадовсть, колмонстнэ кулость фашистэнь лагертнесэ.
Модас сюконятано войнань участниктненень. Минек сэтьмечинек – целанек сынст изнявксось. Сынст виесь, апелемачись, эсь эрямонть тиринь масторонть кис максомась. Те пример эрьванть туртов. Неень шкасто аволь эрьвась анок невтемс эсь ойме виензэ, смелчинзэ кода минек покштянок ды сыре покштянок.
Войнасто велявтозь ветерантнэнь ды сетнень, кить кадовсть тюремань паксятнес, изнявксост вельде ней якатано Моданть ланга, кеняркшнотано эрямонтень, касттано эйкакшт ды арсетяно валдо сы шкадо.
Монь семиясо истя жо ледстнить Ине Отечественной войнань героенть лемензэ. Те монь сыре покштям Кипайкин Кузьма Павлович.
Кузьма Павлович чачсь 1911 иень октябрянь 5-це чистэ Мордовской АССР-нь Кочкуровской райононь Семилей велесэ.
Войнадо икеле важодсь колхозсо. Урьвакстсь эсь велень мазый тейтеренть (фамилияст ульнесть вейкеть) Кипайкина Мария Ивановнань лангс (велесэ тензэ мерильть Малюнь). «Бути лиси Малюнь экшезэнь, урьвакстан», – яволявтсь Кузьма тетянстэнь. Кудосонть сынст семиясь кармась колмоцекс – зярыя иеде икеле урьвакстсь Кузьмань лелязо. Куш кортыть, вейке кудосо ламо семият а эрявить, сынь жо эрясть весе ояксчисэ, апак сёвно. Урьватнеяк эрясть вейке-вейкенень лездазь. Зярыя шкань ютазь лелясь тусь эрямо лия кудос, урьватне жо ялатеке эрясть ояксчисэ, мезенть ванстызь эрямост перть.
Кузьма Мария марто уцяскавсто эрясть кавксо иеть. Сынст чачсть колмо эйкакшост – Фёдор цёраст ды кавто тейтерест – Надежда ды Вера. Эйкакштнестэ сехте покшось – Надежда, монь бабам Кипайкина Надежда Кузьминична. Сыре покштям ды сыре бабам трясть-кастсть вадря ломанть.
Монь бабам, Надежда Кузьминична, важодсь 45 иеть тонавтыцякс Саранск ошонь округонь Октябрьской райононь Пакся Тавлань средней школасо, тонавтсь рузонь ды эрзянь кельть ды литература. Бабам ютксонок арась уш вейксэ иеть. Сонзэ ялаксозо Фёдор важодсь шофёрокс Семилеень колхозсо. Сон ульнесь аванстэнь лездыцякс, вечкилинзе патянзо ды сазоронзо. Ризксэнтень, кулось одсто, ниленьгемень иетькак эзть топодекшне. Вера сазорост мирдензэ марто важодсь чугункань ки лангсо.
Весе, мезе содатано сыре покштядон, саезь архивстэ. Эдь зярдо сыре покштям тусь фронтов, сынст эйкакштненень – Надежданень ульнесть сисем иеть, Фёдорнэнь – вете, Веранень – зярыя ковт. Бабань тетядонзо кадовсть ансяк эйкакшпингень ледстнемат. Сон сельведь марто ледстнесь, кода вечкилизе тетянзо, кода чииль роботасто вастомонзо, свал таргиль кодамояк каванямопель зепестэнзэ.
Архивень материалтнэнь вельде карминек содамо монь покштянь Ине Отечественной войнань иетнестэ эрямонь хронологиянть.
1941 иень майстэ Кузьма Павлович Кипайкинэнь ды теке велень зярыя лия цёратнень Кочкуровань РВК-сь тердекшнинзе военной сборов. Сынст сёрматнень коряс, од ломантненень, конатне веледест васов зярдояк лияв эзть тукшно, те марявсь приключениякс. Сбортнэсэ сынь мельспаросо тренировасть леднемасо, кемекстасть физподготовкаст, вечксть политзанятиятнень, конатнесэ тенст ёвтнесть, мезе моли масторлангсонть. Юткошкасто яксесть Белоруссиянь ошканть, яксесть кинов. Сынь кемсть, бути войнась кармияк, ялатеке ятонть сеске изнясызь, границядонть васов а юты.
Ансяк кияк эзь сода: войнась уш маласо, сон карми ламо верень валовтыцякс, фашисттнэ пачкодить мик Московонть видьс. Ды карми кувакакс – 1418 чинь перть саи миллионт эрямот, калавты цела ошт.
Монь сыре покштям, якстереармеецэсь Кипайкин, ульнесь сетнень ютксо, кить васенцекс вастовсть фашисттнэнь марто, эдь стрелковой частесь, косо сон служась, аштесь Белоруссиясо.
Сыре покштям туртов кувать воёвамс эзь саво. Мартонзо сюлмотне сезезельть 1941 иень июньстэ. А уш 1941 иень августсто Кузьма Павлович лововсь кулявтомо ёмазекс. Мейле кармась содавомо, частесь, конасонть сон служась, саезель кирьксэс ды весе солдаттнэ саезельть полонс. Те зыянов тевесь лисекшнесь 1941 иень июлень 17-це чистэ Белорусской ССР-нь Витебской областень Орша ошонть маласо.
Седе тов минек малавикс ломаненть эрямозо содави ансяк военнопленноень картанть коряс.
1941 иень августонь 27-це чистэ саезь сыре покштям ульнесь полонсо Германиянь Витмаршен ошсо, а теке жо иень ноябрянь 11-це чистэ уш Бохольт ошсо (ней те ошонть лемезэ Батхорн) аштиця Шталаг лагерьсэ. Шталагось аштесь чейбулосо. Полонс понгозь поляктне, сербтне, французтнэ, бельгиецтнэ, рузтнэ панезельть тов мелиорациянь роботатнень топавтомо. Пленнойтне тейнесть каналт, строясть кить, таргасть торф… Сыре покштянь земляконзо валост коряс, конатне велявтсть фронтсто, неть ульнесть войнань сехте стака иеть. Тельня тенст савкшнось важодемс кепе, шожда оршамопельсэ. Андсть пек беряньстэ. Ламо пленнойтне кулокшность вачочиде ды якшамотнеде.
Седе одтнэнь ды виевтнень фашисттнэ кучнесть важодеме шахтатнес ды предприятиятнес. Истя, монь покштям 1941 иень ноябрясто саезь 1942 иень февральс важодсь 108 командасонть. Сынст кармавтсть важодеме сутказонзо 14-16 част. Мик сехте шумбратнеяк ковонь-кавтонь ютазь ормалгадыльть туберкулёзсо…
Монь сыре покштям эзь кенере изнямс кодат-бути военной наградат, ансяк минек туртов сон ялатеке герой. Эдь ансяк арсематнеде, мезень пачк савсь тензэ ютамс, сельметне сеске пешкедить сельведте.
Сыре покштям, Кузьма Павлович, кулось 1942 иень мартонь 12-це чистэ. Сынст велень цёратне, конатне ульнесть мартонзо ве полонсо ды кадовсть живстэ, ёвтнесть, келя, сон кулось стака куломасо – лия военнопленнойтнень марто сонзэ панизь газовой камерас, косо пултызь. Калмазь Германиянь Бохольт ошсо.
Ней ломантне кеняркшнить, верень валовтыця войнась кадовсь васоло удалов, пря велькска а ливтнить пулят… Тень кисэ ёвтатано покш сюкпря сетненень, кить тюрсть ды маштовсть ояксчинть ды валдо эрямонть кис. Эрьва иестэ тешкстави Ине Изнямонь чись – уцяскав датась, шка ледстнемс, кода виевстэ вечксть эйсэнек минек сыре покштятне ды бабатне. Минек эрямонок ванстомга сынь ютасть пек стака шканть пачк, ламо майсемат ды стакачить пракшность лавтовост лангс. Свалшкань ледстнема тенст! Ней сынст калмост велькссэ сэтьме менель ды маней чипай!
Олеся Спирина,
«Детский сад № 121 комбинированного вида» МДОУ-нь воспитатель.
Фототне саезь семиянь
архивстэ