Неень шкасто Мордовиясо седеймариця ломантне СВО-нь воинтнэнень анокстыть казнеть ды маскировочной материалт. Саранскойсэ «Старт» стадионсонть волонтёртнэ ды весе сеть, кинь седеест ризны-палы минек боецтнэнь кисэ, вейсэндявсть акциянтень ды ушодсть важодеме сынст лезэс. Седе, кода тосо ютыть тевтне, минек ловныцятненень пачти лезксэнь максомань ушодыцятнестэ вейкесь, «Z-сети и свечи Мордовии» группань прявтось Наталья САПУНОВА:

– Весемесь ушодовсь «Мордовия-Z Своих не бросаем» группастонть, конань Telegram ды Viber социальной сеттнесэ панжинзе Татьяна Лютый. Тешкстаса, те аванть республикасонок ламот садасызь кода иневанькс таркатнева православной ломантнень ветницякс. Ютазь иень сентябрясто саезь сынь весе виест арсесть максомс СВО-нь боецтнэнень лездамга.

Шкань ютазь, блогертнэнь сёрмадовксост ванкшномсто, мон рединь истямо куля: спецоперациянь ветицятненень эрявсть маскировочной сетть. Эстенек ушодомс сеттнень кодамо арсеманть кучия волонтёронь чатс, кияк каршо эзь моле. Ютазь иень ноябрясто минь теинек од группа ды тердинек весень, кинь ульнесь мелезэ лездамс. Васенцеде пурнавинек ноябрянь 10-це чистэ, анокстынек материал – керсинек панкскеть маскировкань сеттнень туртов.
Теде мейле Саранск ошонь эрицятне кармасть тенек каземе сетть, минь жо карминек сынст мазылгавтомо. Омбоце пель ковонь перть эйстэдест кодынек 160, а ней уш кавтосядто ламо.
Виде, сеске эзинек сода, мейстэ ушодомс, секс карминек тонавтнеме видеороликтнень вельде. Кой-мезес тонадынек лиятнень пельде, мезе-бути минсь арсинек ды нолдынек тевс. Невтемакс, Россиясо васенцекс Од иеде икеле теинек кузнэ ёнов молиця маскировкань сеть. Мезень кисэ ёвтасть тенек сюкпря ды шнымизь.

Ушодовсь аламосто

Нама, васня ушодынек кодамо «Старт» стадионсонть, мейле аламонь-аламонь кармасть тенек вейсэндявомо республикань районтнэ. Покш лезкс тенек максыть священнослужительтне ды храмс якицятне. Сеттнень эйсэ кодыть кода цела коллективсэ, истя ськамонь-ськамонь. Вана, саемга, Инсаронь муниципальной районсо ушодсь вейке сыре ломань, те тевенть сон топавтсь кудосо. Свалшкань группа «Старт» стадионсо арась. Кие-бути сеедьстэ сакшны, кие чуросто… Весть сыцянтеньгак кецятано. Минек командасонть улить кода од ломанть, истя сыретькак. Весе тенек сыцятне марявить одокс, зярошка эйсэст вий, покш мель максомс лезкс. Ламот иесткак а ледстнить...

Видьстэ меремс, неень шкань пенсионертнэнень эрьва кодамо шкасто савсь эрямс, сынь мейсэяк а тандавтовить. Чарькодить ды содыть, эрьва кодамо лезксэсь пек эрявикс. Зярдо кедьчелькев ломантне кодыть сеттнень, се шкастонть сынь арсить сетнеде, кинень неень шкане сынь пек эрявить. Меельце шкастонть пертьпельксэсь эйсэнек эзь кенярдовто, ульнесть пиземеть, эйгажа кить, ансяк, тень лангс апак вано, минек волонтёртнэ стамбарнэ, ялатеке састь тенек ды макссть виест изнямонть малавгавтомантень.

Тонавтнетяно вейке-вейкенек пельде!

Тешкстаса, «Старт» стадионов сыцятнень минь эрьва чистэ нетяно, ламот юткстост маштыть парсте кодамо. Кинь жо сеске а лиси кодамс, тонавттано эйсэст. Овсе лиякс тевтне аштить Мордовиянь районтнэсэ важодицятнень, тенек лездыцятнень марто. Минь сынст туртов кучтано тонавтыця видеороликть. Истя жо сынськак фотографиятнень вельде невтить тенек важодевксэст. Ванкшномадост мейле, бути редятано ильведевкст, невттяно эйсэст ды ёвтатано, кода эрявить сынст витемс.

«Сёксь», «теле», «рудазов лов»…

Истя минь лемдтяно сеттнень, конатнень тейтяно весе вейсэ. Кодамонь коряс сынь вейкеть, явовить ансяк тюсонь коряс, анокставить иень эрьва шкантень.
Виде, кодамонь техникантень явома башка мель. Весть тень савсь марямс истят валт: «Паро, а содатано, видестэ-аволь топавттано тевенек. Бути чарькодевлинек, кодатано эйсэст авидестэ, сестэ лоткавлинек бу тень тееме». Секс, нама, мезеяк атееманть таркас седе паро теемс истя, кода маштат. Боецтнэ сынсь чарькодьсызь, кода сеттнень седе парсте нолдамс тевс.

Штатолтнэ аволь ансяк
валдомтыть…

Республикасонок блиндажной штатолонь теемань производственной предприятият арасть. Сынст теить ансяк кедьвийсэ. Лезэсь эйстэст пек покш. Военнойтне окопсо улемстэ сынст кирвазтнить аволь ансяк валдомтомга, истя жо зярдо тенст пек якшамо, ярсамопелень, ведень эждемстэ.

Меельцекс ули мелем ёвтамс покш сюкпря весенень, кить течи лездыть малавгавтомс Изнямонть, кить сыть тенек важодеме эсест тевест кадозь. Сынь лездыть ванстомс боецтнэнь эрямост.
Неень шкане минек ули сатышка материалонок сеттнень кодамс, штобу теемс седе ламо, эрявить лездыцят. Минь анокт сынст тонавтомс, куш кодамо шкане.

Тешкстаса, а ёвтавикс путовксост минек храмтнень, кить максыть тенек шта. Кие-бути канды штатолонь пелькскеть, кие-бути максы тарка, косо теевить штатолт. Улить священнослужительть, кить вейсэ нист ды эйкакшост марто сакшныть тенек лездамо.