Ванодо! Манчицят!
Россиянь МВД-нь «Чамзинский» ММО-сь панжсь уголовной тев манчемань коряс, конась лиссь тесэнь эрицянть, 71 иесэ аванть коряс. Зыянс понгозесь пшкадсь полицияв.
Кода ёвтнесь пшкадицясь, ютазь иень сёксня сонензэ гайневтсь асодавиксэсь, кона прянзо ёвтызе Московонь полициянь следователекс. Тонась кевкстсь, рамакшнось-эзь авась биологической добавкат. Рамамодо каршо валонть марязь, гайневтицясь пачтясь, неень шкане БАД-нь микшниця компаниянь прявттнэнь коряс панжозь уголовной тев аволь вадря продукциянть миеманть кисэ, ды авантень максови компенсация 9 миллионт целковоень покшолмасо.
Теде мейле авантень гайневтсь лия ломань, конась толковизе, келя, анок те кевкстеманть коряс сонзэ кисэ аштемс судсо, штобу пенсионеркантень а ардтнемс Московга. Эсь услугатнень кисэ асодавиксэсь вешсь 33 тёжат целковойть. Ярмактнень максомадо мейле асодавиксэсь таго гайневтсь ды пачтясь, компенсациясь путозь резервной счётс ды ярмактнень мереви получамс 200 тёжань покшолмасо страховканть пандомадо мейле. Авась тагояк пандынзе неть ярмактнень.
Кавто ковонь перть манчицятне зярыяксть гайневтекшнесть авантень ды эрьва кодамо тевень арсезь пандовтсть эсь услугатнень. Истя, пенсионеркась манчицятненень макссь 690 тёжат целковойть. Компенсациянь ярмактне тензэ эзть учово, ды январенть прядовомсто авась пшкадсь полицияв.
Мордовия Республикава МВД-сь тагояк пшкади эрицятненень а кемемс а содавикс ломаннень ды а максомс эсь ярмактнень. Бути тыненк алтыть кодамояк компенсация ды тень кисэ вешить пандомс налог, страховка эли лия мезеяк, содадо, тынк арсить манямс. Пшкадеде полицияв ды ёвтнеде тевденть.