2022 иесь монь туртов тешкстазь Василий Сергеевич Брыжинскоень «Каргонь Кинь ломанть» драматической саганть лангсо важодемасо, ютавтынь сонзэ эрзянь кельстэ рузонь кельс. Колмо томт, 2276 лопат.
Тагояк мекев ловнан ютавтозь картинатнень, действиятнень... Зярыя ковонь важодема – монсь, мерят, эрямо пингень ки печтинь. Аволь эсень – Кочкуровтнень кудораськень эрямокист. Ансяк вана те кись монсеньгак, эдь сёрмадыцясь ёвтни эрзятнеде. Ды улевельть сагань геройтне аволь эрзяткак, ялатеке марят: сёрмадеесь маштсь невтемс эрямонть эрьва ёндо, тевень содазь ды маштозь, сонензэ кемат ловномань перть, седеяк пек – ютавтомсто, седееть ризны-мелявты кувалмаст, натой авардят.
Василий Сергеевич Брыжинский ломанесь содавикс Мордовиясо ды сонзэ томбале. Сон тонавтыцянь кудораськестэ, весе малавиксэнзэ, вейсэ саезь, макссть тонавтома тевентень 300 иеде ламо. Сонсь Василий Сергеевич од шкава ушодсь важодеме тонавтыцякс, 25 иеть важодсь Мордовиянь госуниверситетсэ, ульнесь национальной культурань факультетэнть теицякс, важодсь прявтсонзо 11 ие. Сон – театральной критик, драматург, искусствоведениянь кандидат, Российской Федерациянь (1999) ды Мордовиянь (1977) заслуженной роботник, Мордовиянь Государственной премиянь кавксть лауреат (2001, 2005). Сёрмадсь зярыя книгат эрзятнень ды мокшотнень драмадо, национальной театрадо, эрзятнень ды мокшотнень налксематнеде. А вана кода художественной покш произведениянь сёрмадыцядо, сондензэ содыть аволь пек ламот. Алкукс, 2012-2014 иетнестэ эрзянь кельсэ лиснесть «Каргонь Кинь ломанть» сонзэ драматической сагань колмо томтне. Ансяк вана вишкине тиражось – эрьва томось нолдазель 300 экземплярсо, ды сеяк – эрзякс ней аволь пек ламот ловныть (тенень пачтясь вана мезесь: школасо ней киртизь келень тонавтоманть, ды целанекак эрзянь келесь пек капшазь кармась туеме эрямостонок) – весе те, нама, кирдсь ловныцятнень теевемс содавиксэкс произведениянть марто. Ды арсезель ютавтомс книганть рузонь кельс. Эряви меремс, шнамо валтнэ ды паро мельтне литературоведтнэнь ды сетнень ёндо, кить уш ловнызь эрзякс колмо томтнень, теизь эсь тевест. Те тевенть саизе эсензэ лангс Василий Сергеевичень цёразо – Сергей Васильевич. Сонсь пандызе ютавтомантькак, книганть нолдамонзояк.
Зярдо ансяк ушодокшнынь васенце книганть ютавтомо, кевкстия Василий Сергеевичень, мекс сон истя кувать эзь кундакшно художественной произведениянь сёрмадомо. Сон мерсь тень нурькинестэ: «Шкам арасель».
Ледстясынь трилогиядонть исторической наукань докторонть А. С. Лузгинэнь домка арсеманзо: «В. С. Брыжинскоень драматической сагась – те келей ды домка ёвтамо Кочкуровтнень колмо пингень перть ризксэв ды а шожда эрямодост-уцяскадост. Сагань геройтне – эрзянь ломантне, шабрань раськетнень марто вейсэ ютыть ламо а шожда кить, конат сюлмавозь Россиянть уцясканзо марто. Кочкуровтнень кудораськень ломантне ульнесть Емельян Пугачев марто, 1812 иестэ пансть масторстонть Наполеононь, олякстомтсть болгаронь раськенть туркатнень лепштямодо, ульнесть русско-японской войнасо, Масторлангонь васенце ды гражданской войнатнесэ, ютасть ревоюциянть пачк, печтизь раскулачиваниянть ды коллективизациянть, тюрсть фашизманть каршо Масторлангонь омбоце войнасонть...».
Эсензэ сёрмасонть Мордовия Республикань Прявтонтень А. А. Здуновнень рузонь кельсэ колмо томтнень нолдамодо Василий Сергеевич сермадсь: «Кода ломань, кона эрясь кувака ды эрьва кодамо тевсэ сюпав эрямо, кода эрзя, кона потсонзо кандтни тиринь ёнксонь оймекоштонть, мон бажинь кадомс эсень раськенть туртов книга – ютазденть ледстямо, книга, конась ёвтни ломанень обуцянь сеть ёнкстнэде, конатнень лангс пингеде-пингес нежеди ломанень весе раськесь. Те эсеть кудораськенть вечкемась, тевень вечкемась, цидярдомась ды ломанькс эрямо маштомась, кода бу стака аволь уле, а ёмавтнемс эсеть питнейчитнень...».
Монгак ёвтаса эсень мелем те пек виев ды покш произведениядонть. «Каргонь Кинь ломанть» драматической сагась теке кувака моро, теке келейдеяк келей лей. Сонзэ лемесь сюлмавозь кезэрень ёвтамонть марто. Келя, ломантне чачсть Иненармуненть эйстэ, конань кись кадовсь менельс. Кезэрень шкасто саезь сонензэ мерить Каргонь Ки. Те Каргонь Кинть лангсо тештинеть – те эрьва паро ломаненть тештинезэ тосо, Каргонь Кинть лангсо. Кить эрясть, кить эрить ды кить сыть минденек мейлеяк, весень тештинест кармить улеме те Каргонь Кинть лангсо.
В. С. Брыжинскоень драмась – те алкуксонь эрямо ды миф. Алкуксонь ломантнень марто рядсек эрить а неявикс Юртава ды Юртатя, ды весе свал ваныть Каргонь Кинть лангс, вешнить эсест тештинест. Каргонь Кись – драманть а неявикс персонаж, саганть башка герой. Каргонь Кись вейсэнди весе паронть, мезде ёвтни книгась.
Мезекс ломанесь чачи ды эри моданть лангсо – те В. С. Брыжинскоень драматической саганть сехте васенце арсемась. Нечай, Олёшка, Радай, вишкине Захар, Борис Симбирский, Кичай сокор атясь, лиятне – весень сынст уцяскаст а шожда. Натой сетненьгак, конатне а вечкевить ловныцянтень, конат тейнить апаро тевть... Те сынст кись, сынст уцяскась. Ды уцяскаст коряс невтеви весе раськенть уцясказояк, вейкеньгак вакска а ютыть кажотне-зыянтнэ.
«Каргонь Кинь ломанть» драматической сагась сёрмадозь ломаненть вечкезь. Цёранть ды аванть вечкезь. Можна меремс, те – вечкемантень изнямонь моро. Текенень поладса, сагась сёрмадозь православиянь лувсо, кадык сёрмадыцясь эзь аравтнеяк эсензэ икелев истямо задача. Лиссь истя, кода эрямосонть. Куш улить тесэ мифологиянь образткак, – нама, истя, кода ульнесь эрзятнень седикелень эрямосонть.
Весе образтнэстэ пурнави-тееви сельметь икеле эрзянь ломаненть алкуксонь чачозо-обуцязо. Вейс совавтовить главной геройтнень пек редявикс ёнкстнэ. Кочкуров Нечайсэ ули кеме обуця, сон икелев ваныця ды а пелиця. Пек вечксы нинзэ. Те вечкемась кирдияк эйсэнзэ, лезды цидярдомс весе стакачитнень, сон – нежезэ. Вечкемась – неже весе кудораськензэ туртовгак. Олёшка – седеймариця, важодиця, кедьчелькев ломань. Машты чевтестэ раксеме-згилямо, эрьва ёндо вадря ломань. А вана эрямозо кодаяк а ладяви, а муеви тензэ эриялгаяк. Одсто сон маштызе бояронь цёранть, кона нарьгизе нинзэ – сон стясь кеженть каршо.
Эрямось зярдояк арасель шождакс. Пугачевонь марто улемась мейле кармавтсынзе прявт геройтнень пингест прядовомс кекшнемс вирьга, ломанде явозь. Неть виев ломантне бажить а синдевемс кодаткак стакачитненень ды муить кить-янт, кода тенст ломанькс эрямс. Ансяк вана ве кужосо ломань марто эрямось сынст туртов каднови а топавтовикс бажамокс.
Артем Кочкуровонь покш цёразо, Петр, чачсь вечкемасо, секс арсят: весе эрямозо ули пародояк паро, ильведькстэме. Ансяк эрямосонть лисни овсе лиякс. Петр а весть манявкшны. Эрямось максы тензэ шка полавтовомс, витемс ильведькстнэнь, ансяк аволь весе витевикс. Федор, Петрань покш цёразо, эсь шкасто кадновсь тетянзо вановтомо, ды те ёвтавсь обуцясонзо. Цёразо мерьки-яжи ламо ломанень эрямот, меельцекс ёмавтсы эсензэ эрямонзояк. Ды тесэ се, кода эрясь тетясь ды се, мезес пачкодсь цёразо, а явовить, сюлмазь вейс.
Артем Кочкуровонь лия цёразо, Никита, видечисэ эриця ломань, сон зярдояк киньгак а чумонды, бажи чарькодемс эрьва ломаненть, нолдамс чумонзо весе теезенть кис. Кода ней миненек те а сатны обуцясонок!
Покш мелем ёвтнемс те книгастонть седе ламо талновтыця таркат. Вана: ломантне эрить вирьсэ, киньгак марто а вастневить. Истя лиси, ссылкав молицятнестэ вейке ломань оргоди конвоенть эйстэ, сонзэ эль а раздесы верьгиз, тетят-цёрат Кочкуровтне идесызь сонзэ. Ды те ломанесь, Борис Симбирский, карми эрямо мартост. Сон – гусар, превей, эрьва мезес маштыця ломань. Борис сеске редясы, кода парсте Захар цёрынькась чарькоди музыкасо, сон тонавты эйкакшонть скрипкасо седямо, конань тейсы Радай – цёрыненть тетязо. Ды вана семиянек весе кунсолыть, кода Захар седи. Чарькодеви, сындест башка цёрыненть, секень вант, кияк а марясыяк, ды те пек ризнэвти седеенть. Мон эсь арсематнесэ седикелень шкатнестэ, конатнеде ёвтневи книгасонть, ютан неень шкатнес, зярдо минек «Торамась», Владимир Ромашкин дивавтсть лия масторонь раськетнень эрзянь кезэрень моротнесэ, седямосонть. Зярс жо тесэ Захаркань кунсолыцятнеде ансяк вете ломанть...
А вана лия тарка. «Монень паро, мекс тонеть паро», – корты Петр Кочкуров Никандр Веряскиннэнь, кона кармась улеме сонзэ цёракс. Ледстия «Мимино» киносто героенть, конань налкси армянинэсь Фрунзик Мкртчян. Сон ёвты некеть валтнэнь ялганстэнь, конань налкси грузинэсь Вахтанг Кикабидзе. – Мезть кортамс, весе раськетнень туртов парось чарькодеви вейкетьстэ.
Саганть сёрмадыцясь – минек шкань ломанесь, ёвтни эрзянь родонть эрямодонзо ламо пингень перть, ды тень пачк сон корты ютазденть, неень шкадонть ды сы шкадонтькак. Лопасто лопас книгась уски-тарги эйсэть, ризнэвти-мелявтовты, кармавты седе ламо содамс те кудораськеденть ды, теке марто, маряви, эстедетькак. Эрьвась эйстэнек, прок мерят, те родсонть, кадык чачсь-кассь овсе лия таркасо, эсензэ тиринь ёнкссо.
Домкасто, потмоёжонь чарькодезь, панжовить книгасонть весе цёратнень образтнэ. Сынь вечкевицят, мельстуицят, прок неят эйсэст ды марят сынст. Марят натой, кода лексить. Парсте панжозь эйкакштнень – цёрынетнень образтнэяк. Васня Радай, седе тов – Захар, Мишук, Бориска, Михась, Василька… Авань образтнэ, кода васня монень марявсь, цёрансетнень коряс истя парсте апак панжо, сындест седе ламо содат ансяк цёратнень валтнэстэ. Истямо Нуянза, Лиза, Лёнушка, Анюта… Ды ансяк шкань ютазь монень панжовсь: те кода Библиясо – цёранть ды аванть вейс валовомаст. Пазось теизе Евань Адамонь ирдезстэ. Ды авантень а эряви капшамс икельдямс цёранть, улемс сондензэ виевекс, превеекс, ёроковокс. Авась – цёранть поладксозо, сонзэ нежезэ, ванстыцязо. Сонзэ марто цёрась тееви виевекс ды превеекс.
Саганть ули эсензэ ритмиказо. Эрязь-эрязь Кочкуровтнень родсонть тагояк некеть тевтне: простямот, вастомат, геройтне полавтовить, а вана экшсэст эсь ютковаст тагояк кортыть-эрить некеть Юртавась, Юртатясь, Калмазырьатясь. Сынь кортыть ломантнень мартояк – ансяк сестэ, зярдо эрямось эль а туи эйстэст. Улить дивань тевтькак. Истя, Вирявась вирьсэ лезды од тейтерькантень идемс Сергей Кочкуровонь. Эли вана кие-бути апак учо канды пси ям ды ловсо – те тейтерькинесь, Нина Петровна, ансяк кенери теде арсезевемеде... Ярсамопелесь лезды стямс пильге лангс Сергейнень.
Васня а кемезеваткак весе тень эйсэ – ёвксонь тевть... Книганть ютавтомсто бажан чарькодемс, мекс истя тейни сёрмадыцясь. Ды сы превезэнь: эрьвась эйстэнек свал мезес-бути пек бажи. Вана тесэяк: мезес бажить – се лисияк. Истя вана алкуксонь эрямось ды дивань тевтне вейс човоргадыть. Арази аламо дивань тевть эрсить минек эрямосонть?!.
Вейке книгасто неть читнестэ ловнынь: «Мифологиясо марявикс шождачись корты раськенть шумбрачидензэ». Вана, паряк, В. С. Брыжинскоень драматической сагасонть диватнеяк кортыть текеденть. Паряк, неень шкань вановтсо се, мезесь ульнесь кезэрень шкасто, миненек маряви теке аволь алкуксонь, прок мезе-бути шождалгавтозь. Ды ялатеке теньгак эряви содамс. Сестэ минь седе парсте чарькодьсынек эсенек раськенть кезэрень культуранзо, ёжомарямонзо, лисни, чарькодьсынек неень ды сы шкань тешкстнэньгак.
Кода монень марявсь, драмасонть ули мезе-бути истямо, мезесь кармавты секе тев ледстнемс эсеть кудораськеть, малавикстнэнь, конат умок уш тусть эрямостонть, а вана ней, прок мерят, перькат аштить, прок сыньгак улить те книгасонть. Кода уш кортынь, драмасонть улить мифологиянь образт ды условной образт, истят, кода Фирса. Те велень ломань, кона пек бажась касомс-лисемс офицерэкс ды истя эзь лисе. Ды вана апак топавто меленть кис сон, теке Идемевсь, весенень панды апаросо. Сон корты: мезеяк паро а ули, минек манимизь. Книгасонть изницякс лиснить пароськак, берянеськак. Ломаненть питнензэ онкстыть аволь ансяк тевтне, эрси, сеяк, кода ваныть лангозонзо. Ды ансяк Пазось неи весементь истя, кода ули. Сагасонть ули паро ды кеж, вечкема ды авечкема. Ули видечи ды авидечи – истя, кода эрямосонть, кода свал. Ды ломанесь, – виев сон эли лавшо, свал неть вийтнень ютксо. А максомс прянть, а синдевемс апаронтень пек а шожда. Ды а нолдтнемс кежей келенть лиянь лангс а эрьвась машты.
В. С. Брыжинский драматургось пек покш мель яви эрьва кодат прок а редявикс тешкстнэнень: валсо, декорациясо... Эсензэ коряс пек чевтестэ сон штавты-невти эрьва сценанть, эрьва картинанть – кадык режиссероськак, артистэськак, ваныцяськак весе тень несызь-марясызь ды чарькодьсызь. Ды свал эрьва косо сон мукшны мезе-бути истямо, мезесь кармавты натой дивсемс ды арсемс: кода весе те вадрясто бу невтевель сцена лангсто! Мон кодаяк а чарькодян, мекс минек Национальной театрась те шкас эзь кунда налксеме сцена лангсо те драматической саганть. Режиссеронть эйстэ ашти, мезе саемс, мезе а саемс. Тесэ покштояк покш, сюпавдояк сюпав ды пек вадря материал. Можна налксемс драмаяк, эйкакшонь спектакляяк, можна теемс башка спектакля эрзянь мифологиянть коряскак...
Теке марто, те драмась максы тонавтнемань покш материал сы шкань филологтненень, литератортнэнень. Василий Сергеевичень сюпав ды мазый эрзянь келезэ. Эйсэнзэ ламо пейдевтемань таркат, пшти валт, весементь экшсэ редявить покш содамочить. Геройтне кортыть аволь ансяк эрзякс, рузокскак, мокшокскак, натой французонь, болгаронь, белорусонь кельтнесэяк.
Важодемс истямо сюпавчинть марто – кеняркс. Кезэрень шкатнес чопавтемась, ризнэмась-мелявтомась Кочкуровтнень кудораськеденть – те чопавтнема раськенть кезэрень эрямонтень, сонзэ ёжомарямотнес. Василий Сергеевичнень ульнесть малав кавксоньгемень иеть, зярдо лиссть эрзянь кельсэ колмо томтне. Лисни, сёрмадызеяк сон саганть уш аволь одсто. Ды, теке марто, маштсь ванстомс седейсэнзэ валдо ёжомарямотнень, маштсь сындест мазыйстэ, седеень талновтозь кортамс. Ды тень сехте пек марят вечкемадо сценатнесэ. Сон панжи ловныцянтень ды ваныцянтень вечкеманть валдонзо ды мазычинзэ. Вана вейке героесь корты эсензэ вечкемадонзо истя: «Сон монь туртов теке пси чистэ ванькс ведь марто лисьмапря. Зяро уш эрятано – а вана монь симемась ялатеке кодаяк а явавтови». Драмасонть пек ламо кортыть вечкемадо, цёранть ды аванть ютксо малавиксчиде – ансяк арасть тесэ кодаткак берянь валт, амазычи. Ушодындеряй кияк тень коряс апак визде кортамо – свал муеви лоткавтыця. Вана ардыть цёратне Болгарияв туркатнень каршо тюреме ды олякстомтомо братушкатнень. Килангонь перть човсить од алятне келест, ледстнить кутморямост-палсемаст... А вана мартост ардыця прявт геройтне, Артём Кочкуров ды Платон Никандров, чатьмонить. Сынст лангс ванозь, лиятнеяк кургост пекстнесызь, уш а кортыть вечкемадост, мезеньгак апак сёпо. Сы превезэть: те эрзятнень обуцясост – чаво валт а тапарямс потмонь ёжомарямотнеде.
Ды вана мезде мон тесэ арсезевинь: превей, арсиця ломанесь свал муи, кода лоткавтомс лиятнень берянь тевде-валдо. Течинь чиде арсезь, нусмакадынь: нать, аламо ней истятнэде ютксонок. Телевидениясто, интернетстэ марят ансяк вейке-вейке лангс сёвномат, кеж ды апаро...
Ды тагояк вечкемадо. Эрьва шкастонть сондензэ кортыть весе, ды кортыть некеть валтнэсэ... Ды тень эйстэ пек парсте чарькодеви: кадык сядот иеть ютыть – а вана вечкемасонть мезеяк а полавтови. Ды те ансяк кавтотнень туртов, вечкицятненень, весемесь васенцеде, весемесь одокс маряви.
Мон уш теде кортынь: драмась – ютазь шкадо, ансяк сон истя лади течинь чинтень! Историянть, раськенть койтнень домкасто содамось ды целанек покш превчитне лездасть Василий Сергеевичнень парсте чарькодемс шканть. Ловномсто, ютавтомсто мон маринь шканть лексеманзо. Эзть кадно эйсэнь эсень ледстнематнеяк – тетядон-авадон, ялгадон... Ков якилинек од шкава, кода налксилинек, мезень кувалма ризнынек-мелявтынек... Произведениянть марто эсень ледстнематнень вейс валовомаст а стяконь: эрзянь ломантнень кувака пингень перть эрямонть ламо тюссо ды келейстэ невтемась совавтызе эсензэ эйс сеньгак, мезе ульнесь монь эрямосонть ды эрьванть эрямосо, кие ушоды те книганть ловномо эли зярдояк, окойники, несы те книганть коряс анокстазь спектаклянть.
Сюкпря Василий Сергеевич Брыжинскийнень тиринь раськеде те кувака, келей ды мазый моронть кис! Паряк, те кучовкс Брыжинскойтнестэ вейкенть сынст кудораськень поладыцятненень – сынь, паряк, ламонть тестэ лиятнеде парсте чарькодьсызь. Ды ялатеке те книгась аволь ансяк эсетнень туртов – сон весень туртов. Сонзэ эряви ловномс, невтемс сцена лангсто. Илязо лепамо эйсэнек родонь-раськень штатолось! Текенень поладса: В. С. Брыжинскиень сагась корты масторлангонь вейсэнь мелявкстнэдеяк: пертьпельксэнть ванстомадо, ракшатнень-нармунтнень ванстомадо, ломантнень ванстомадо. Ды тесэ пек ламо эрьва кодат содамочить. Невтемга, кармат содамо нармунтнень, лишметнень, кискатнень, верьгизтнэнь, овтотнень эрямо койдест, кода кундсемс калтнэнь лейстэ... – Те весе Василий Сергеевичень эрямосто ды пря потсто.
Целанекак те книгась аволь ансяк эрзятнеде – те минек масторонть эрямокизэ Пугачевонь шкатнестэ саезь. Ёвтневи весе войнатнеде, конатнесэ савсь тюремс минек масторонь ломантненень. Книгасонть улить содавикс ломанть: поэтэсь ды партизанось Денис Давыдов, Ине Отечественной войнань генералось Лев Доватор, художникесь Василий Верещагин.
Мон ютавтынь колмо томтнень ды пешкелинь весе драманть, сонзэ геройтнень эрямонь вийсэнть. Истямо покш вий эйсэнзэ!
Тамара Баргова
Мельть-арсемат
Петр Рябов, художник, «Эрьмезь» вейсэндявксонь прявт:
– Василий Сергеевич Брыжинскийде кортыть кода содавикс драматургто, национальной театранть теицядо, режиссердо, тонавтыцядо, искусствоведтэ, сёрмадыцядо... Ды ялатеке весе те целанек а панжи сонзэ обуцянзо, весе сонзэ паро ёнкстнэнь, се покштояк покш путовксонзо минек эрзянь культурас, эрзянь кельс, тонавтома тевс, раськенть одс вельмевтемас. Сон вечксы видечинть ды корты ансяк видестэ, эсензэ произведениятнесэяк невти те видечинть. Василий Сергеевич а пелиця ломань, сон панжи весень туртов паронть ды мазыенть, свал кирди-кемексты весе паро ушодкстнэнь, кода эсь шкасто пек лездась «Эрьмезь» вейсэндявксонть теемасо, сон – «Масторава» вейсэндявксонть теицяяк. Ламо вий путсь истят покшчитнень теемстэ-ютавтомсто, кода «Раськень озкс», «Велень озкс». Сон сетнень ютксо, кить велявтызь тенек ды казизь минек кезэрень койтнень. Косо бу аволь уле, аволь важоде, эрьва таркасонть весе содамочитнень ды виензэ путсь эсензэ раскентень, культурантень, тиринь келенть ванстомантень.
Татьяна Ковалева, Российской Федерациянь ды Мордовия Республикань культурань заслуженной роботник:
– Василий Сергеевич Брыжинский эрзятнень ютксо васенце таркасо. Сон весе виензэ ды шканзо максы раськень койтнень тонавтнемантень, а максы сыненст ёмамс, сюпалгавты сынст.
Тамара Одинокова, музыковед, искусствоведениянь кандидат, Мордовия Республикань культурань заслуженной роботник:
– Драматургия В. С. Брыжинского зрелищна, красочна, динамична, привлекает новизной и оригинальностью выразительных средств (сценография, костюмы, атрибутика), естественно и органично вводит актера и зрителя в фольклорно-сценическое действие, в атмосферу сопереживания и соучастия.
Юрий Антонов, филологиянь наукань доктор:
– Коень коряс кудораськень сагасонть покш исторической событиятне невтевить кудораськенть уцясканзо вельде. В.С. Брыжинскиень драматической сагасонть геройтне примить участия весе исторической покш тевтнесэ, ды тень трокс онкстави неть ломантнень оймевиест, питнест. Мезе редявикс Брыжинскиень драмасонть: кудораськесэнть касы-кемексты ломаненть обуцясь. Сонзэ героесь а ули чаво ломанекс, эдь сон кеместэ сюлмавозь эсензэ кудораськенть марто, косо ванстовить покштятнень-сэрдятнень койтне.
Сагань геройтне – паро ломанть, сынь теке эскельдясть эйзэнзэ раськень эпоссто, эдь эйсэст овсе арасть кодаткак берянь ёнкст. Истямо минек эрзянь-мокшонь драматургиясо те шкас зярс эзь вастневе.
Драматургось келейстэ нолды тевс кудораськень сагань жанранть весе художественной возможносттнень, вейсэнди национальноенть ды универсальноенть. Сон художественна, эсензэ геройтнень эрямокист вельде панжи-невти раськенть эрямокинзэ, сонзэ оймевиензэ ды таликанзо минек масторонть уцяскасо.
Александр Пудин, драматург:
– Монь мельс пек тусь Василий Сергеевичень арсевксэсь. Брыжинский – ине эрзя! Сон минек Каргонь Кинть лангсо пек ды пек эрявикс Молиця, Прявт ветиця, конась кери вень чоподанть эсензэ ашо оршамотнесэ. Сюконян тензэ! Вечкса ды пек мельс путан те ломаненть. Сон монь туртов пек малавикс ды вечкевикс ломань. Кенярдан сень кис – Пазось кази тензэ уцяскав кувака пинге!
Тамара Баргова