Раиса Николаевна Адушкина эри Покш Березникень муниципальной райононь Симкина велень Цеця ульцянь окольцясо. Нать, а стяко те куронть тесэнь эрицятне умок уш лемдизь истямо мазый лемсэ.Эште советской шкатнестэ саезь малав эрьва эрицянть сад-пиресэ тундосто сёксес кенярдовтыть сельме эрьва кодамо тюссонь цецятне.
Кудазортнэнь Виктор Ильич ды Раиса Николаевна Адушкинтнэнь покш ды паро кудось, кода кортыть эрзятне, веле вити ды нама сонзэ икельксэсь свал мазылгавтозь эрьва кодамо касовкссо. Куш, нись ней кадовсь ськамонзо, ялатеке бажи икелень коенть а коламс .
Тешкстасынек, неть трудонь вечкиця, эрьва тевенть алкукс топавтыця мирдесь ды нись трясть-кастасть колмо паро эйкакшт, кавто цёрат ды вейке тейтерь, кить а стувтнить мелявтомо-ваномо ней уш ськамонзо кудос кадовозь вечкевикс аваст Раиса Николаевнань мельга..
Кавксоньгемень иетнень лангс апак вано, юбилеензэ те эрзянь авась тешктызе ютазь иень сёксня, ялатеке тевтеме а ашти. Те шкас кардайсэнзэ улить ракшат, нармунть.Пиресэнзэ касты модамарть ды весе эрявикс эмежтнень.Вана нейгак вальма лангсо учить тундонь лембе читнень умок уш озавтозь касовкстнэ.
Лиясто сынст лангс ванозь, чова чачо, чевте мизолкс марто нейгак эште мазый тейтерьавась,ламо иетнень лангс апак вано арсезеви икелень эрямодонть, ледстяви од порась….Кода ютавтызе пингензэ.Тешкстасынек, мирднзэ Виктор Ильичень те шкас ледстнить, кода тевензэ парсте содыця, эсензэ ды лиятнень пельде ламонь вешицякс тевень топавтомсто. Нать а стяко, икеле ды нейгак эйстэнзэ кортамстомерить Виктор Ильич. Содазь, велесэ чуросто кинень тетя лемсэ пшкадить. Виде, сон васня ульнесь торфонь предприятиянь прявтокс, мейле ладизь промкомбинатонь руководителекс.Теде икеле ульнесь «Путь к коммунизму» колхозонь партийной организациянь секретарекс.
Нама, велесэ а шожда улемс прявтонь никс, эрьва эскельксэть ломанень сельме икеле, эрьва валот а стувтови..Раиса Николаевна эзь эце сельмс, ээзь чии мердедензэ икеле, пингень перть стамбарнэ топавтсь библиотекарень сэтьме тевенть, бути эрявсь, лиснесь важодеме колхозов.Нать, а стяко кортыть мирденть прявтокс улемасонзо, пеледе покш путовксозо ламос чарькодиця, превей, а мешиця нинть
Р.Н. Адушкина велень хозяйствань техникомонь прядомадо мейле тирень велев сась од специалистэкс-зоотехникень диплом марто.Аволь кувать важодсь те тевсэнть, ютась школав урокто мейле тонавтнеме кадовозь эйкакштнень марто аштеме,воспитателекс важодеме.Раиса Николаевна, кода сонсь содылинзе те велень покш ломантнень ды эйкакштнень, истя тесэнь эрицятнеяк книга мельга тензэ самсто, кемсть пачтямозонзо.Эрьватанень максы се пусмонть, косто сон муи эстензэ лезэв превспутомат.Те авась те шкас ванстызе ловномо вечкеманть.
Ютко шкасто вейсэ ялганзо Анастасия Ильинична Борискинань марто ледстнить икелень эрямодост, кортыть Симкина велень вандынь чидензэ.Свал пряст яволявтнить Пелагея Степановна Астайкинанень, кие лавшо шумбрачинь коряс а лисни кудосто..Виде, неень шкань кажов орманть пингстэ сави тенст кортнемс ансяк телефононь вельде. Тешкстасынек,неть аватне пигень перть важодсть тиринь веленть ванстомга, сонзэ уцясканть паролгавтомга.
Валентина Юдина