«Россия» кинотеатрасо ютась «Степан Эрьзя. Долгий путь домой» документально-налксемань фильмань покш невтемась. Тей сакшность фильмань теицятне, налксицятне. Весе сынь талность, кода вастсызь ваныцятне те важодевксэнть. Нама, вастозель пек лембестэ. Ды кода лиякс? Покш экрансо невтевсь минек ине скульпторонть эрямонь ды творчествань кизэ.
МР-нь Прявтонть Артём Здуновонь пельде пурнавозтненень лембе вал марто пшкадсь МР-нь Правительствань Председателень васенце полавтыцясь Галина Лотванова:
– Фильмась снимазь А. А. Здуновонь лезксэнзэ вельде. Сюкпря ёвтавлинь продюсерэнтень Алла Каргинанень, кона актёртнэнь марто вейсэ тейсь покш тев. Фильмасонть минь несынек содавикс тенек ломантнень, те – музеень важодицятнень ды театрань актёртнэнь. Степан Эрьзя – минек гений, конань творчествась дивавты, кона кепеди верев вишка тиринь ёнксонзо – Мордовиянть. Фильмась уш невтевсь Московонь ВДНХ-со «Россия» выставкасонть. Июньстэ саезь сон невтеви республикань весе районтнэсэ. Сюкпря весенень, кить важодсть фильманть лангсо.
Премьерав сакшнось Мордовиянь народной артистэсь, РФ-нь заслуженной артистэсь, минек землякось Станислав Дужников. Сон налксизе Степан Эрьзянь тетянзо роленть.
– Те фильмантень минь путынек весе ойменек. Нама, мелявттано, кода сонзэ вастсызь ваныцятне. Масторлангсо Эрьзянь ловить рузонь Роденэкс. Ансяк вана Россиясо сондензэ содыть аламо, бути ансяк сетне, кить явить мель искусствантень. Мордовиясо жо лемензэ содасызь весе, – кортась Станислав Дужников.
Истя жо вал сайнесть актрисась Лиза Арзамасова, фильмань продюсерэсь Алла Каргина. Сцена лангс лиснесть весе, кить налксесть фильмасонть. Степан Эрьзянь роленть налксесь Эрзянь ды мокшонь национальной драмань театрань актёрось Павел Михайлов. Кинокартинасонть скульпторонть творчествадонзо парсте ды мельстуезь пачтясть С. Д. Эрьзя лемсэ изобразительной искусствань музеень ды И. Д. Воронин лемсэ музеень важодицятне.
Эряви меремс, те фильмадонть башка курок лисить эштё кавто: «Спасая маленькие жизни» (Республикань эйкакшонь больницядонть) ды «Школа Бабы-Яги» фильмась-ёвксось. Кода яволявтсь Алла Каргина, маласо кавто иетнень перть сынь кармить тееме Степан Эрьзядо художественной фильма.