Тееведе содавиксэкс: Мордовия Республикань Покш Игнатовань муниципальной райононь Чукало велень поселениянь прявтось Анна Владимировна Маскина. Те сонзэ тиринь велезэ, тесэ ютась эйкакшпингезэ. Те иень сёксня тензэ топодить 55 иеть.
Чукало велень эрицятнень, сентябрянь 1-це чистэ школав туицятнень икеле истямо картина: покш мельспаросо кизэнь каникулатнеде мейле весе ютыть эсь класстнэс, ансяк вейке ёлганя рунго, мазыйка вишка тейтерькась пек мелявтсь, пельсь а сайсызь васенце классос вейсэ ялганзо марто. Эдь сонензэ эште эзть топоде 7 иеть, а чачома чизэ – октябрянь 16 чись. Пек уш покшоль тейтерьканть мелезэ озамс парта экшс, эдь те шкантень сон парсте маштсь ловномо, тенень тонавтызь лелятне.Сон ськамонзо чийнесь библиотекав ды сайнесь вечкевикс книгатнень. Те чистэнть лездыцякс ульнесь тензэ авазо, сон пшкадсь школань прявтонтень Раиса Степановна Агееванень ды аватне вейсэ састь мельс: зярс журналс лемензэ а сёрмадомс, бути карми парсте тонавтнеме, сестэ шкань ютазь сайсызь васенце классос. Тейтерькась кемематнень идинзе. Р.С.Агеева апак учо кулось, зярдо Аня тонавтнесь омбоце классо…
Эште школасо тонавтнемсэ пек вечкилинзе историянь уроктнень, конатнень ветясь школань прявтось Григорий Павлович Понеев. Од тейтеренть Анна Коченовань (тейтерьксэнь фамилиязо) пек покшоль мелезэ улемс историкекс. Эрямосонзо жо овсе лиякс лиссь. Школанзо парсте прядомадо мейле тонавтнесь РСФСР-нь ЦСУ-нь УПК-нь Ардатовской СПТУ-со велень хозяйствань предприятиянь бухгалтер специальностенть коряс. Теде мейле важодсь Покш Игнатовань РАЙПО-со ревизорокс. Шкань ютазь ульнесь Чукалонь велень советэнь централизованной бухгалтериянь бухгалтерэкс.
2009 иень сёксня А.В.Маскинань эрямосо лиссь покш полавтома, сонзэ ладизь администрациянь кевкстематнень коряс эсест велень поселениянь прявтонь тевень топавтыцякс, малав пельиень ютазь, мартонь 31-це чистэ кочкизь Чукало велень поселениянь депутатонь Советэнь прявтокс Ней вана уш те тевентень сонзэ кочкизь колмоцеде.
Анна Владимировна пингензэ перть бажи содамочитнес, весе одонть тонавтнеме ды эрямос совавтомо. Истя, 2015 иестэ сон прядызе «Российская академия народного хозяйства и государственной службы при Президенте РФ» высшей профессиональной образованиянь федеральной государственной бюджетной образовательной учреждениянть «экономист» специальностенть коряс.
35 иень перть А.В.Маскина косо бу тензэ аволь саво важодемс, тевензэ топавты парсте содазь ды маштозь. Сонензэ, кода велень поселениянь депутатонь Советэнь депутатонтень, эсест велень эрицятне сеедьстэ пшкалить эрьва кодамо энялдома марто. Теде башка, Анна Владимировна вети покш общественной робота. Васня ульнесь участковой кочкамонь комиссиянь секретарекс, ней – прявтокс. Ютко шкасто эсест велень эрицятнень марто моры Чукалонь Культурань кудонь «Калинка» ансамблясонть. Свал эрсить покшчитнесэ, конат ютавтневить Покш Игнатовань ёнксонь ды республикань сценатнень лангсо.
Сень ловозь, што Чукалось ашти а васоло се тарканть эйстэ, косо теевезь коень коряс свал ютавтневи ней уш аволь ансяк Мордовиянь, истя жо весе масторонь келес содавикс «Раськень озкс» покшчись. Сонзэ анокстамонь ды ютавтомань мелявкстнэстэ ламось пры сынст лангс. Васняяк анокстыть презентацият ды невтнить аволь ансяк эсенек республикасто сыця инжетненень, истя жо Россиянь регионтнэстэ сыцятненень.
Нать, а стяко Анна Владимировнань казнетнень ютксо Мордовия Республикань Прявтонть ды Покш Игнатовань муниципальной райадминистрациянь Прявтонть пельде колмо Благодарносттне.
Течи А.В.Маскина минек редакциянь инже .
– Анна Владимировна, ловозь чить кадовсть Ине Отечественной войнасо Изнямонь 75 иетнень топодемань тешкстамонтень. Неень а шожда шкастонь, зыянов орманть а нолдамга, ламот аштить кудосо. Теке марто уле мель содамс, кода тынк ломантне анокстасть те покшчинть вастомантень.
– Алкукскак, неень шкась а шожда. Паро тундось сась рана, те зыянов орманть самодо икеле минь кенеринек ванськавтомо кавонест велетнесэ, Чукалсо ды Ташто Селищасо, калмо ланготнень, перькаст тарканть, урядынек шукштнень. Текенень поладса, те тевенть топавтано свал, тенень покш мель явтано тундосто сёксес.
Велень эрицянок покш каштанчисэ аштить тесэ чачозенть-касозенть, Советской Союзонь Героенть П.В.Еделевень коряс. 1941-1945 иетнестэ Ине Отечественной войнасо минек Покш Игнатовань районсто масторонть идеме тусть 4867 ломанть, юткстост 2816 кадовсть тюремань паксятнес, тёжадо ламо казезь орденсэ ды медальсэ. Кототненень максозь Советской Союзонь Героень почётонь лемесь. Сындест ледстнематнень ванстомась – минек ине тевенек.
Аволь умок прядынек лангозонок путозь почётонь тевенть – тылэнь тружениктненень юбилеень медальтнень явшеманть, сыненст кенярксов кулятнень кандоманть.
– Инескеть, пачтядо мезе удалась меельце шкасто теемс велень ломантнень эрямост шождалгавтомга, сынст мелест кепедемга
– Велесэ, кода ошсояк, мелявкстнэ певтеметь. Бути ошонь ульцятнень валдомтомаст коряс покш стакачить арасть, велесэ жо те ашти малав васень таркасо. Содазь, ДРЛ маркань лампатне пек питнейть, сындест велесэнек ульнесть 12, ней палыть светодиодной, энергиянь ванстыця, неень шкантень ладиця 28 лампат. А мезть сёпомс, велень калмолангонь пирявкстнэ таштомсть, сынст витнемс а свал муевить ярмакт. Паро, вастовсь седеймариця ломань, кинь лезксэнзэ вельде те тевесь витевсь.
– Эште мезе течи талновты велень эрицятнень?
– Минек ломантне пек кенярдсть Чукало велесэ од ФАП-нть теемантень, а вана важодиця зярс тенек эзь са. Паряк, кияк медицинань образования марто ломань ловносы те сёрмадовксонть ды сы тенек важодеме. Эдь неень шкане велесэ важодиця медроботниктнень туртов государстванть ёндо явови покш мель
– Чарькодеви, велесэ эрямсто эсеть пиревтеме, ракшавтомо прят а тряви. Ламот течи тень теить тынк ёнкссонть
– Видеть валонк. Минек велетнесэ эрицятне аволь пек сыреть, кода рузтнэ мерить, средней возрастось – 58иеть. Неть ломантне вийсэст кода сад-пиресэ эрьва мезе кастомс, истя кардазсо ракшань трямс. Невтемакс, мирдем марто скал, тувот, ламо саразт кирдтяно. Пиресэнек кодат чувтт-куракшт ансяк а касыть: умаринат, сливань, инзееень, вишнянь… Тешкстаса, лиятнень пиресэяк истя жо ламо мезе касы, мик виноградонокак парсте тусь касомо.
– Анна Владимировна, нурькинестэ пачтядо, кить тетят-ават, кодат обуцянь ёнкст пельдест тонеть ютасть
– Монень прась уцяска чачомс-касомс ламо эйкакшонь триця семиясо. Тетям, Владимир Гаврилович, ды авам, Ольга Романовна, марявсь, кодамо тевс эзть кундакшно, весемесь парсте ды шкастонзо топавтозель. Тенень истя жо тонавтсть минек ниленек эйкакштнень. Мон семиясонть колмоце эйкакшан, сехте покшось, Владимир, ней уш пенсиясо, омбоце лелям, Михаил, кулось 2006 иестэ. Сехте вишкине сазоронок, Елена, эри ды важоди Нижней Новгородсо, сон – главной бухгалтер строительной организациясо. Тетянок пингень перть важодсь тиринь колхозсо сокицякс-видицякс, ульнесь механизаторокс. Авам фермасо васня ракша мельга якась, мейле скалт потявтсь. Шкань ютазь ФАП-со санитаркакс ульнесь. Виде, минь, эйкакштне бажинек эрьва мейсэ лездамс малавиксэнек туртов. Сынь эсь ёндо тейсть весементь, штобу минь касовлинек тевень вечкицякс, видечинь кисэ аштицякс. Койсэнь, тень удалась тенст теемс. Куш, лиясто кой-зярдо обуцянь неть ёнкстнэ аволь весенень вечкевить... Кода народсо кортыть, евтасак видечинть, емавтсак ояксчинть.
– Инескеть, пачтядо, кода эсенк эрямось ладявсь?
– Сюкпря евтан Пазонтень. Мирденень лисинь 1986 иестэ эсенек велень церанть экшс. Юрий Александрович «Красный Октябрь» СХПК-со ушодсь важодеме васня механизаторокс, мейле 9 иеть прявтоль. Седе тов 13 иеть ульнесь «Маскин Ю.А.» КФХ-нь прявтокс. Неень шкане важоди Чукало велень Культурань кудосо, вети кружокт. Вейсэ мартонзо тринек-кастынек кавто тейтерть. Алёна ды Татьяна эрить Нижней Новгородсо. Весе кенярксчитнестэ сакшныть тиринь велев. Мельспаронок колмо нуцьканок: Даниил, Татьяна, Юлия.
– Анна Владимировна, сюкпря ёвтнеманк кисэ. Кадык эрямосонк весе арсезесь топавтови ды мезеськак а нусмалгавтсы ёжомарямонк.
Валентина Юдина