Среда, июня 16, 2021
Важное

Истямо лем ало Эрзянь-мокшонь раськень драмань театрасо ацамковонь 16-це чистэ ютась вастовома, ков тердезельть аволь коммерческой вейсэндявксонь прявттнэ ды культурань учреждениясо важодицятне.

Вастовоманть, косо кортамось мольсь сень перька, кода ютась 2020 иесь, панжизе ды ветясь Мордовия Республикань Культурань, национальной политикань ды архивень тевень министрась С.Н. Баулина. Светлана Никитовна ёвтась седейшкавань лембе валт весе пурнавозтненень сень кис, кодамо покш тев сынь теить, тешкстызе, кезовонть кувалма стакачитнень лангс апак вано, ютазь иестэ ламо арсематне ды бажамотне топавтозельть. Те, васняяк, секс, мерсь сон, «минь маштынек невтеме ёрокчинек, ютамо ламо пирявкст ды панжомо седеенек вейке-вейкень туртов». Кодат тевть улить аравтозь сы иестэ эрьва вейсэндявксонть икелев, тень лангсо эряви арсемс нейке, мерсь Светлана Никитовна ды тердинзе весень эсест ушодкстнэнь-бажамотнень юткс совавтомс сетненьгак, конатнень тешкстынзе Культурань министерствась. Тень пингстэ а виздемс ёвтамс эсь меленть-арсеманть ды совавтомс истят вешемат, конат седе пек мелявтовтыть се-тона ломаненть, ды истямо ладсо теемс вейкине программа.

Башка мель Светлана Никитовна явсь проектэнь сёрмадомантень. Меельце шкастонть те тевесь виевгадсь. Тедеде максозельть кемнилее заявкат, колмотне изнясть. Те аволь берянь. Истямо ладсо Федеральной бюджетстэ Мордовиянь культуранть марто сюлмавозь бажамотнень эрямос совавтоманть туртов тевс нолдазельть 17 миллиондо ламо целковойть. Те аволь аламо. Теке марто тень лангс а эряви лоткамс, седе товгак поладомс те тевенть.

Ламо вейсэндявкстнэ эсест проектэст анокстыть культурань учреждениятнень марто сюлмавозь, мезесь седе шождалгавты сынст топавтомаст ды канды покш изнявкст. Кода эряви кирдемс сюлмавкст вейсэндявксонть ды культурань учреждениянть ютксо, тень коряс паро невтемакс лади ловомс Раськень драмань театранть (прявтось С.И. Дорогайкина) ды театрань важодицянь вейсэндявксонть (прявтось А.И. Анисимов) вейсэнь тевест ды изнявксост.

Раськень театрантень, кода тешкстызе сонзэ прявтось С.И. Дорогайкина, ули мейсэ шнамс прянть. Сынст сцена лангсо путозь «Куйгорож» ёвксось аволь весть лиснесь изницякс эрьва кодамо фестивальсэ. Теке марто Светлана Ивановна ледстизе, те ёвксонть путоманзо туртов ярмактне (3 миллионт 600 тёжат) явозельть Россиянь Культурань министерстванть пельде. Теде башка, сынь таго учить ярмакт Россиянь Культурань министерстванть пельде «Покш гастрольть» программанть коряс.
Театратнень марто проектт сёрмалесть ды изнясть Н.П. Огарёв лемсэ МГУ-сояк. Сынст кис сазь ярмактнень лангс арсеви Мордовиянь театратнесэ теемс интерактивной музейно-экспозиционной таркат. Теде ёвтнесь театральной искусствань ды раськень художественной культурань кафедрань прявтось Ю.А. Кондратенко.

Ине Отечественной войнасо Изнямонь 75 иетнень топодема иестэнть эрьва косо сеедьстэ кепсевить кевкстематне, конат сюлмавозь ютазь войнанть марто. Те вастовомасонть кортамось таго тусь Сурской оборонительной рубежденть. Сон стявтозель чивалгома ёндо сыця ятонть а нолдамга. Тень туртов путозель ламо ломанень вий. Сеть иетнень а стувтомга Мордовия Республикасо Российской военно-исторической обществань региональной отделениясь теи весементь Сурской рубеженть одс витнеманзо коряс. Лездыцякс эсь пряст лемдизь ламо вейсэндявкстнэ. «Сурский рубеж» военно-исторической клубонть пельде кортась С.А. Косынкин. Сон ёвтнесь, мезе тейсть сынь 2020 иестэ Сурской рубеженть витнеманзо коряс, ды алтась сы иестэ те тевенть седеяк виевгавтомс.

Эсензэ мелявксонзо ёвтызе «Эрьмезь» вейсэндявксонь прявтось П.В. Рябов. Сон пшкалесь сёрма марто Мордовиясо сы иенть алтамс содавикс музыкантонтень В.И. Ромашкиннэнь. Сонензэ сы иестэ топодевельть бу 70 иеть. Мордовиянь Прявтонть пельде истямо указ апак сёрмадо. Секс В.И. Ромашкинэнь ледстнемга мероприятиятнень ютавтоманть сави саемс таго «Эрьмезь» вейсэндявксонтень эстензэ. Виде, Светлана Никитовна алтась лездамс те тевенть топавтомсто.
Вастовомась прядозель шнамо конёвонь максомасо. Седе мейле весе тердезельть «Куйгорож» ёвксонть ваномо.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».