Суббота, сентября 18, 2021
Важное

Анна Андреевна Дёрова весе пингензэ перть эри Отяжбуень Ало Чукало велесэ. Сон чачсь 1939 иестэ.

1941 иестэ тетязо тусь фронтов ды сеске чавовсь. Тейтернесь пек вишкинель, ансяк ялатеке мельсэнзэ кадовсть тетянзо виев кедтне, конат кепсесть ды ёртнесть эйсэнзэ верев. Стака ульнесь эрямось войнань шкане. Сонзэ прядомадо мейле истя жо ульнесь вачочи ды арасьчи.

Школань сисем классонь прядомадо мейле Анна кармась важодеме колхозсо. Сонензэ ульнесть кеветее иеть. Роботась паксясо, фермасо (скалонь потявтыцякс, ваз мельга якицякс). Вишка, эряза, таркасо зярдояк а аштиця. Сон кенерсь теемс-топавтомс весементь. Аватне пейдсть: «Нюрыне, эштё аламодо касат ды весень минек полавтсамизь!»

Велесэ шожда тевть а эрсить. Эрямонзо перть сон пек ёроков важодиця, мельганзо ваномояк а кенерят. Аволь весть эйстэнзэ сёрмалесть райононь газетасо, кода паро ды виев важодицядо. Покш читнестэ казильть тензэ пацят ды палякс коцт. Истят казнетнеде таштавсь пешксе горобия.

Истя Нюрыне роботась 60 иес, яла учось колхозонь председателенть алтамонзо – вана курок тензэ максыть Почётной колхозницань лем. Састь 1990-це иетне. Весе содыть, кодамо ушодовсь шкась. Мельга-мельцек колхозтнэ кармасть каладомо. Кодат тесэ почётной лемть… Киненьгак мезеяк а эряви. Киньгак а дивавтсак, зяро ды кода стакасто роботыть.

Нюра эзь пурна эстензэ семия. Нать, истямо уцясказо. Весе шканзо валскестэ саезь чокшнес алтась колхозсо важодемантень.

Пек дивазевинек ды саимизь мельспаро, зярдо карминек содамо – Нюра патясь 15 иестэ саезь ловны «Эрзянь правда» газетанть! Ансяк колхозсо пандызь васенце зарплатанзо, сон сёрмадстсь газета. 67 иень перть свал сонзэ ловны ды сёрмадсты. «Эрзянь правданть» ловны педе-пес, вейкеяк лопа а менсти. Мельстуиця материалтнэнь саи тосто ды вансты эйсэст картононь башка паргинесэ! Кемтяно, тосо зняро иетнень перть таштавсть ламо материалт!

Февралень 6-це чистэ Анна Андреевнанень топодить 82 иеть. Седейшкава арсетяно тензэ кеме шумбрачи, кувака эрямо, паро ёжо! Свал улемс истямо жо эрямонь вечкицякс, весенень паронь арсицякс!

 

Анокстызе Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».