И.М. Яушев лемсэ музыкальной театрасо ютась «Торама» фольклорной ансамблянь покш концерт. Сон алтавсь коллективенть 30 иетненень ды сонзэ пурныцянть В.И. Ромашкинэнь 70 иетненень. Театрав сакшность ансамблянть ялганзо, эрзянь ды мокшонь моронь вечкицятне.
Меельце шкане «Торамась» косо ансяк а морси, ков ансяк а ардтни прянзо невтеме. Сынь морасть Московонь Якстере площадьсэ, Крымень «Таврида» фестивальсэ, Государственной Кремлёвской дворецсэ ды лия таркасо. Од ломантне нолдасть мазый клипть, конат улить Интернетсэ. А аштить ве таркасо, тевс нолдыть од проектт. Ансамблянь ветицясь Андрей Николаев пурнась од цёрат ды тейтерть, морамодо башка сынь седить эрьва кодамо инструментсэ.
Сынст туртов лембе валонь ёвтамо сакшнось МР-нь Правительствань Председателесь В.Ф. Сушков. Сон пачтясь паро валт МР-нь Прявтонь тевтнень топавтыцянть А.А. Здуновонь пельде. Коллективенть туртов сценической оршамопелень рамамс казевсь 500 тёжат целковойс сертификат.
Теде мейле сцена лангс лиснесть «Поле чудес» капитал-шоунь прявтось ды продюсерэсь Галина Кузнецова ды программань музыкальной руководителесь, Россиянь заслуженной артистэсь Андрей Берестенко. Передачань ветицясь Леонид Якубович эзь саво, кучсь видеопоздоровт. Минек коллективесь пек тусь мельс «Поле чудесэнь» весе ваныцятненень. Галина Кузнецова макссь республикантень телепередачав тердемат. Валонзо коряс, сынь алтавить врачтненень. Истя жо мерсь, тагояк учить «Тораманть» эсест кедьсэ.
Концертэсь мазыель, анокстазель седейшкава. Ансамблянть марто ульнесь музыкальной театрань симфонической оркестрась. Те седеяк виевгавтызе музыкальной пельксэнть. Артисттнэ морызь эрзянь ды мокшонь кезэрень моротнень. Сынь ёвтнесть, кие а содасы келенть, мезде те морось. «Тораманть» марто номерт анокстасть «Келу» фольклорной ансамблясь, «Лейне» киштемань коллективесь, музыкальной театрань балетэсь, эйкакшонь музыкальной школань тонавтницятне.
Татьяна Маторкина
Фототне Эдуард Ретунскиень