М. Е. Евсевьев лемсэ МГПУ-нь педагогической ды художественной образованиянь факультетсэ панжовсь «Малая художественная этноакадемия» раськень творчествань мастерской. Мезе те истямось ды кода важоди? Теде тенек ёвтнесь этноакадемиянь ветицясь, художественной ды музыкальной образованиянь кафедрань прявтось Валерий ВАРДАНЯН. Сон изнясь культурасо ды искусствасо творческой проектэнь Президентэнь грант.
– Зярыя иень перть важодян «Шумбрат, Мордовия!» республикань фестивальсэ декоративно-прикладной творчествань выставкань коряс экспертэкс. Меельце кавто иетнень перть минь ардтнинек районтнэва, теевинек содавиксэкс кедьчелькевтнень ды сынст теевксэст марто. Умок рединь, минек сырнень кедь ломантне весе уш сыреть, кой-кинь арасть тонавтницясткак. Лиякс меремс, арасть тевень поладыцяст, кияк пельдест а тонавтни. Художественной промыслатне ды ремеслатне састыне ёмить. Те монь пек ацирьгавты ды ризнэвти. Истя чачсь мелесь арсемс кодамояк теварсевкс, конась сюлмавлинзе од ломантнень ды мастертнэнь. Сёрмадынь проект. Тедеде кизна пачтясть тень «О присуждении грантов Президента Российской Федерации для поддержки творческих проектов общенационального значения в области культуры и искусства» грантонь изнямодо, – ёвтни Валерий Амбарцумович.
«Вишка художественной этноакадемиясь» панжовсь аволь умок. Тов тонавтнеме якить Саранск ошонь общеобразовательной школатнесэ 5–9-це класстнэсэ тонавтницятне. Занятиятне молить субутасто, кавто часонь перть. Эйкакштне содавтовить викшнеманть, човалясо кодамонть, гончаронь тевенть, илёвсто ды ленгестэ кодамонть, чувтосто керсеманть ды коклюшкасо кружовань кодамонть марто.
Васенце чистэнть лембе вал марто пурнавозтненень пшкалесь педагогической ды художественной образованиянь факультетэнь деканось О. Ф. Асатрян. Сон тешкстась, народной художественной промыслатнень ванстомась – минек прявт тевенек.
Инжетненень ёвтнесть, кодат промыслат ды ремёслат ульнесть Мордовиясо, конат ёмасть, конат жо те шкас ванстовсть ды натой теевсть брендэкс.
Раськень промыслатнень коряс мастер-классонь ветямо тердевсть минек содавикс тонавтыцятне ды кедьчелькев ломантне. Гончаронь искусстванть марто содавты художественной ды музыкальной образованиянь кафедрань старшей преподавателесь А. П. Русяев; викшнеме тонавты 2 № эйкакшонь художественной школань тонавтыцясь С. П. Гагарина (эрзянь ды мокшонь викшнема); коклюшкасо кружовасо кодамонть марто содавты художественной ды музыкальной образованиянь кафедрань старшей преподавателесь Н. В. Матвеева; човалясо кодамо – Рузаевкань А. В. Ухтомский лемсэ культурань центрань педагогось А. А. Манеева; илёвсто кодамонть невти мастерэсь, И. М. Яушев лемсэ музыкальной театрань артистэсь М.Ю. Олькин; ленгестэ кодамонть вети Рузаевкань А. В. Ухтомский лемсэ культурань центрань педагогось С. С. Глухов; чувтосто керсеме тонавты Саранскоень 4 № эйкакшонь художественной школань тонавтыцясь, Россиянь народной мастерэсь А. В. Рябов.
Рамазь сатышка эрявикс материалт. Теде башка, мастертнэ сёрмадсть видеоурокт, косо невтить важодемань салавачист. Кие соды, паряк, зярыя шкань ютазь эйкакштнень эйстэ кияк сюлмасы эрямонзо промыслатнень марто.
– Ютасть уш зярыя занятият, эйкакштненень пек вечкеви. Мастер-класстнэс сакшныть студенттнэяк. Ванат эйкакштнень палыця сельметнес ды кецнят. Минек культурань сюпавчись аволь кадозь ды стувтозь. Седеесь ризны промыслатнень ды ремеслатнень кисэ. Сынст эрявить вельмевтемс, илязт ёма, эрявить тонавтомс эйкакштнень ды од ломантнень промыслань тевтненень. Чарькодеви, покш сюпавчи а саят, ансяк неть теевкстнэсэ ули раськень ойме, – корты В. А. Варданян.
Татьяна Маторкина