Эрьва ие «Искусствань ве» весероссиянь акциясь невти ломантненень минек культурань сюпавчитнень. Ноябрянь 3-це чистэ Саранск ошсо весень туртов эсь кенкшест панжокшнызь библиотекатне. Те иестэ акциянь темась – «Россиясь вейсэнди». А. С. Пушкин лемсэ Раськень библиотекасо весе инжетнень вастсь тейтересь-часовщикесь, конась вельмевтсь эрьва кодамо пингень кеврунготнень ды «шкань машинасонть» пачтясь инжетнень ютазь шкас, невтсь течинь эрямонть ды икелепеленть.

«Путешественниктнень» туртов важодсть вейксэ площадкат, конатнесэ ульнесть мастер-класст, налксемат, викторинат, выставкат ды гайгсть морот. Кемекстазь маршрутканть мельспаросо ютасть кода покштне, истя вишкинетне.

Башка мель весе явсть «Патриотизм в современном искусстве» площадкантень. Эсь фамильной гербенть артомазо, акварельной скретчингесь, художественной произведениятнень коряс викторинась – весе те кармась каршо валокс кевкстеманть лангс: мекс минь вечксынек эсь тиринь масторонть?!
Библиотекань весе инжетнень каванизь ламбамо ярсамопель марто тантей чайде. Туемстэ жо весенень казсть ледстнемань панжаткеть, конатнень теинзе нейросетесь.

Ноябрянь 4-це чистэ акциянь участникекс кармасть республикань музейтне, культурань кудотне. Саранскоень 1941–1945 иетнень войнань ды трудонь подвигень мемориальной музеесь республикань прявт ошонь эрицятнень ды инжетнень туртов анокстакшнось сюпав программа – акцият, мастер-класст, квестт, налксемат, войнадо фильматнень невтемат ды ламо лия мезе.

– «Искусствань ве» акциясь пек тусь минек инжетнень мельс, – тешкстасть музейсэ. – Эрьва сыцянть ёжозо кепедезель, ды минек важодицятне тень туртов теизь весементь – анокстасть мельстуиця интеллектуальной ды творческой заданият, косо эсь ёрокчист невтизь покштнеяк-вишкинетнеяк.
Музеень инжетне невтизь эсь содамочитнень истят акциятнесэ, кода «Судьба солдата», «Солдатские навыки», ды «Узнай героя», «Загадки музея» квест-налксематнесэ, мельс пек тусть «Военная археология» интерактивной площадкась ды Ине Отечественной войнань тевтненень алтазь интеллектуальной площадкась.

Теке марто сыцятнень туртов кенярксчинь вадря программа невтсть Саранск ошонь Культурань кудонь творческой коллективтне.
Пек ламо инжеть «Искусствань вестэнть» пурнась С. Д. Эрьзя лемсэ республикань изобразительной искусствань музеесь. Ломантне тезэ сакшность семиянек – тетятне-аватне, эйкакштне, покштятне-бабатне. Весень вастсь «Торама» ансамблясь. Искусствань вечкицятнень туртов жо анокстазель ламо мезе мельстуиця. Невтемга – музейганть квестэсь (музеень залтнэва ютазь ды весе кармавтоматнень топавтозь, сехте ёроковтне казевсть мельстуиця казнесэ). Эрьзянь скульптуратнень ютксо инжетненень невтезель апокшке спектакля, ульнесть эрьва кодат мастер-класст.

Сюпав программасо весе инжетнень истя жо кенярдовтынзе Республикань Культурань кудось – морот, киштемат, мельстуиця невтемат.
Весе площадкатнесэ шкась ливтясь, эзь марявояк. Ды инжетне ней покш мельсэ учить лия акциятнень.