Неть читнестэ Орданьбуень райононь Н. К. Крупская лемсэ библиотеканть ды беряньстэ неиця эйкакштнень туртов общеобразовательной школанть-интернатонть юрсо ютавтозель «За здоровый образ жизни» мероприятия-агитпоезд, конась мольсь «Книга жизни»: тифлочтение по основам здорового образа жизни» проектэнть лувсо (ФПГ, 23-2-003337). Мероприятиянть арсицякс-ютавтыцякс кармасть «Национальная безопасность и наука» ИАЦ-нь АНО-сь ды «Мордовская республиканская специальная библиотека для слепых» МР-нь ГКУК-сь.
Участниктнень туртов теезель литературань, конась маштовикс беряньстэ неицятнень ды сокортнэнь туртов, «Знать сегодня, чтобы жить завтра» выставка. Теде башка, Арина Александровна Булычева ютавтсь «Лекарственные растения Мордовии» кортамо, конань лувсо сон ёвтнесь лециця касовкстнэде, сынст пурнамонь шкадонть, лезэвчидест, видестэ анокстамодост… Меельцекс ульнесь «Здоровье» викторина ды невтезель «Подари себе здоровье» ароматерапиянь коряс мастер-класс. Пурнавозтне кармасть содамо эфирной ойтнеде, лецямсто ды истяк тевс совавтомадост, лия чинень теемга вейс човорямодост. Сехте эряза участниктне кевкстематнень лангс виде каршо валонь максоманть кис казевсть мельстуиця казнесэ. Содама, шумбрачивтеме эрямось а карми уцяскавокс. Секс весень тердемат эрямонь шумбра лувонь ветямо.
Проектэнть туртов пек эрявиксэкс кармась Орданьбуень райононь беряньстэ неиця эйкакштнень туртов общеобразовательной школанть-интернатонть марто вастовомась. Теварсевксэнть вельде эйкакштне седе ламо кармасть содамо эсь шумбрачидест, эрямонь шумбра лувонь ветямодонть. Арина Александровна Булычева ды Юлия Владимировна Бурова эйкакштнень марто ютавтсть «Путь к здоровью» теманть коряс кортнемат ды пурнакшность «Тифлочтение про здоровье» экспресс-выставка. Истя жо теекшнесть «Глаза. Зрение и забота о нём» шумбрачинь урок, налксесть «Что полезно и что вредно» викторинасо. Теде башка, беряньстэ неиця эйкакштне невтизь ёрокчист «Путешествие в мир растений» шкинемань пелькстамосонть, конасонть изницятне ёвтавить маласо шкасто.
Неень шкасто пек эрявикс, штобу эйкакшось вишкинестэ саезь содаволь эрямонь шумбра лувонь ветямонть эрявиксчидензэ, чарькодевель, эдь васняяк эстеть эряви мелявтомс шумбрачидеть.
Юлия БУРОВА