Неть валтнэнь сеедьстэ марятано ды нетяно ошонь куротнева понгавтнезь рекламань плакаттнэстэ.
Юты омбоце ие, кода масторлангонтень сась кажов ормась, сон кандсь ламо седейризкст ды мик сайсь ламо ломанень эрямот. Сехте покш стакачить COVID-19 орманть пингстэ кирдить медицинасо важодицятне, кить аволь вейке-кавто чис каднызь семияст, малавикс ломанест. Те сыненст чинек-венек савсь важодемс ломантнень эрямост ванстомга, сынст шумбрачист витемга.
Нать, а стяко аволь умок Мордовиясо ютавтовиця Равчирень федеральной округонь регионтнэстэ законодательной собраниятнень делегациятне Мордовияв самсто васняяк ёвтасть сюкпрянь валт республикань медиктненень сынст ине тевест кисэ. Саранской ды Мордовской митрополитэсь Зиновий истя жо тердекшнынзе Саранскоень епархияв республикань больницятнесэ ды поликлиникатнесэ важодиця врачтнень ды медсестратнень, кить саизь эсест лангс истямо а шожда шкастонть стака канстонть.
Арсетяно, карми улеме виде, бути течи минь эштё весть ледстясынек те вастовомасонть казезтнень лемест. Неть: Московонь ды весе Русень Патриархонь «Патриаршая благодарность» медальсэ казезь С.В. Катков лемсэ республиканской клинической больницясто врачось-хирургось Ирина Дьячкова, Республиканской инфекционной клинической больницясто врачось-инфекционистэсь Елена Арбузова ды теке больницянь диагностикань клинической лабораториянь врачось Людмила Ерофеева. Мордовской митрополиянь «Милующее сердце» медалесь максозь МР-нь Здравоохранениянь министрань тевтнень топавтыцянтень Олег Маркиннэнь. «Милующее сердце» III степенень медалесь максовсь Республиканской клинической 1№ больницянь прявт врачонтень Дмитрий Амелькиннэнь, Республиканской клинической 4 № больницянь прявт врачонтень Александр Бурлаковнень ды Республиканской верень переливаниянь станциянь прявт врачонтень Ольга Македонскаянень.
Пандемиянь шкасто важодемаст кисэ Мордовской митрополиянь Архиерейской грамотасо тешкстазтнень ютксо – С.В. Катков лемсэ республиканской клинической больницянь медсестрась Нина Старателева ды теке больницянь санитаркась Нина Малова.
Те вастовомасонть ульнесть истяткак, кинень максозельть Мордовской митрополиянь Благодарносттне.
Аволь умок савсь тенек вастовомс казезтнень эйстэ вейкенть марто, кие пандемиянь шкасто весе виензэ, содамочинзэ макссь лезкс мельга пшкадицятненень.
Те С.В. Катков лемсэ республиканской клинической больницянь массажонь коряс медсестрась Нина Старателева.
Нина Андреевнань чачома ёнксось – Кочкурбуень Кочкурова велесь. Сон кассь ламо эйкакшонь триця семиясо. Тетязо, Андрей Фёдорович, пингень перть важодсь колхозсо, ламо иень перть ульнесь электросварщикекс. Авазо, Вера Петровна – хлебозаводсо мастерэкс. Кевкстеманок лангс, кода кочкизе эрямонь тевензэ, Нина Андреевна пачтясь: «Семиясо ульнинь сехте вишкинекс, касомсто секе-тев сэределинь, секс эштё эйкакшпингстэ арсинь эрямом алтамс медицинантень, штобу содамс аволь ансяк кода витемс эсень шумбрачинть, истя жо маштомс лиятненьгак лецямо.
Неть арсематнень мельсэ-превсэ кирдезь, Нина Старателева мольсь тонавтнеме Саранскоень медицинской училищав. Сонзэ прядомадо мейле велявтсь тиринь велев, кармась важодеме Кочкуровань центральной райбольницясо, косо муевсь тензэ диетмедсестрань тевесь.
Паряк, тоско пингень перть улевельгак, эдь сонзэ мельс пек тукшнось важодемазо, кудоськак маласоль. Эрямосонзо жо колмо иень ютазь теевсть полавтомат, лиссь мирденень Алексей Старателевень экшс ды савсь тензэ туемс Саранскоев, эдь мирдесь се шкане важодсь тосонь автоколоннасо водителекс.
Мордовиянь прявт ошов самсто кувать тев эзь вешне, сеске саизь важодеме сестэ эштё Саранск ошонь 3 № больницяв. Старателевтнень чачсь цёрынест. Эйкакшонть кадомс ульнесь а кинь лангс, сась арсема тонавтнемс массажонь тееме, эдь те тевенть топавтомась ульнесь ансяк чить, вень дежурстват арасельть.
Ней уш цёраст кассь, паряк, сонськак курок тетякс карми. Нина Андреевна массажонь тевенть больницясо те шкас топавты.
Неень шкадонть кортамсто сон тешкстась, ламот юткстост сэредсть те кажов ормасонть, кой-кить аволь вестькак. Мезе теят, эдь важодемаст кеместэ сюлмавозь ормалгадозтнень марто.
Нина Старателева киньгак лангс а пеняци, куш сонськак сэредсь аволь шождасто. Мекевлангт, седейшкава ёвтнесь ояксчисэ эриця ды тевень вечкиця коллективдензэ. Башка сюкпрянь валт ёвтась тонавтыцянстэнь, старшей медсестранть Вера Салагаевань лемс. Валонзо коряс, Вера Николаевна прок тиринь аваст, эрьва кевкстеманть коряс толковамот максы, ламо лезэв превс путомат ёвты.
Покш мельспаросо коллективесь вастызе Нина Андреевнань каземадо кулянть. Виде, теде икеле тензэ максозь МР-нь Здравоохранениянь министерствань ды эсест больницянь Почётонь грамотат ды Благодарностть, ялатеке эрьва казнесь кепеди ёжомарямо ды максы вийть эштё седеяк парсте важодемс.
Мордовской митрополиянть пельде казнесь ульнесь апак учонь ды пек талновтыця. Кода мерсь Нина Андреевна, сон васенцеде истя маласо ульнесь Саранской ды Мордовской митрополитэнть Зиновиень вакссо, неинзе сэнь сельмензэ, маризе чевте вайгелензэ.
Вановтонзо коряс, весе те кенярдовты ды максы кемема вандынь чинтень!
Валентина Юдина