Мартонь 18-це чистэ Республикань Кудосо ютавтовсь промкс, конань шкасто Мордовиянь Прявтось Артём Здунов ёвтынзе Россиянь Президентэнь кочкамонь итогтнень.
«Течи минь кеместэ ёвтатано, Россиянь Федерациянь Президентэнь кочкамотне ютавтовсть, сынь законнойть, легитимнойть. Улить невтевкст, конатнень коряс мереви кортамс неень шкань Президентэнть кемевикс изнямодонзо», – мерсь Артём Здунов.
Мордовиясо кочкамонь кампаниясь ютась сэтьме лувсо, покш коламот апак редя. Мордовиянь эрицятне невтсть покш эрязачи. Республикась кармась васенцекс Равчирень федеральной округонь регионтнэнь ютксо кочкамонь участкатнес эрицятнень самост коряс – малав 85%. Владимир Путинэнь кисэ вайгелест максызь республикань 89% ламо эрицятне.
Кочкамонь участкатнес эрицятнень самост коряс сехте вадрят невтевксэст Отяжбуень, Ромодановань ды Дубенкань районтнэнь – 96,69 % ды седе ламо. 90 % невтевксэсь печтязь республикань 21 муниципальной районсо. Неень шкань Президентэнть кисэ сехте ламо вайгельть максозь: Дубенкань районсо – 96,35 %, Ташто Шайговань – 95,67 %, Теньгушевань – 95,18 %. Владимир Путинэнь кирдизь 90% ламо кочкицятне Мордовиянь 21 районсо. Региононь руководителесь истя жо тешкстызе Рузаевкань райононь эрицятнень кочкамонь эрязачист.
Сюкпрянь вал марто Артём Здунов пшкадсь весенень, кить сакшность кочкамонь участкатнес: «Вечкевикс землякт! Сюкпря тенк гражданской меленк кирдеманть кисэ, масторонь ды республикань вандынь чинтень виде мелень явоманть кисэ».
Кочкамонь читнестэ 6 тёжат эряза эрицятне ульнесть кочкамонь комиссиянь членэкс. Тедеде васенцеде УИК-нь члентнэ ульнесть «ИНФОРМ-УИК» проектэнь топавтомасо – ютавтсть толковамонь важодема. Региононь Прявтось истя жо ёвтась сюкпря весенень, кить ульнесть штабтнень ды инициативной вейсэндявкстнэнь важодемасо, кочкамонь кампаниятнень анокстыцятненень ды участниктненень – наблюдательтненень, доброволецтнэнень, медиктненень, правань ванстомань органтнэнь, экстренной ды коммунальной службатнень специалисттнэнень, республикань оштнесэ ды районтнэсэ властень органтнэсэ важодицятненень, СМИ-нь представительтненень – весе тевтнень куроксто ды видестэ невтемаст кисэ.
Тешкстасынек, республиканть келес важодсть 739 кочкамонь участкат. 269 участкатнесэ ульнесть видеонаблюдениянь кедъёнкст – тосо вайгелест максызь республикань весе кочкицятнень эйстэ малав 71%. Мордовиясо неть читнестэ важодсть раськеютконь экспертт – сынь тешкстызь кочкамонь невтевкстнэнь видечинть.
«Арсян, Российской Федерациянь кочказь Президентэнтень явозь виев кирдема ломантнень пельде. Минь кадовинек важодеме виев национальной лидерэнть марто, сонзэ сёлмонзо ало. Минек туртов те эрявикс кочкамо! – мерсь Артём Здунов. – Мордовиянь кочкицятне эштё весть невтизь примазь решениясонть видечинть».
Мордовиянь Прявтось тешкстась, республиканть учи покш важодема проекттнэнь коряс, конатнень кирдинзе масторонь Президентэсь – экономикань башка зонань теемань, социально-экономической виевгавтомань башка программань топавтомань, СВО-нь участниктненень лездамонь коряс.
«Те кочкамонть сехте прявт ёнксось – стабильностесь, порядокось ды седе тов касомась-виевгадомась. Тынк марто вейсэ ней тейтяно Россиянь од история. Те вий, авторитет, истя жо раськеютконь аренасо. Минь марятано кемема вандынь чинтень!» – тешкстась Артём Здунов.
Региононь руководителесь истя жо тешкстынзе решениятнень, конатнень Президентэсь яволявтынзе аволь умонь Кучомасонть, сынь кандыть лезэ Мордовиянтень. Сынь токшить субъекттнэнь долктост олякстомтоманть, семиятненень ды од ломантненень лездамонть, демографиянть, важодемань ресурстнэнь.
«Весе неть кемекстамотнень карматано топавтомо республикасонть, васняяк – явомо покш мель Президентэнь программатненень, – мерсь Артём Здунов. – Минь весе масторлангонтень невтинек: минь вейсэ, мезеяк лангс апак вано. Виевстэ мольтяно икелев!»
Юлия Еремина