Февралень 2-це чистэ ютавтозель Мордовия Республикань Госсобраниянь сисемеце тердемань колоньгемень омбоце сессиясь. Промксонть панжомсто Владимир Чибиркин ёвтась зярыя кевкстемат, конатнень коряс 2024 иестэ депутаттнэнень эряви виевстэ важодемс. Те – СВО-нь участниктнень ды сынст семияст туртов мелень явомась, Россиянь Президентэнь кочкамотнес анокстамсто таркава самоуправлениянь органтнэнень лездамось, Семиянь иентень алтазь мероприятиятнева якамось ды Президентэнть указонзо топавтомга ламо эйкакш марто семиятнень туртов лезксэнь максомась.
Депутаттнэ вемельсэ кирдизь республикань Прявтонть Артём Здуновонь мелензэ аравтомс Алексей Ежовонь Мордовия Республикань Правительствань Председателень Полавтыцякс.
Алексей Владимирович чачсь 1980 иестэ Алтаень краень Рубцовск ошсо. 2001 иестэ прядызе Россиянь МВД-нь Сибирской юридической институтонть (Красноярск ош) «Юриспруденция» специальностенть коряс. Вузонть прядомадо мейле важодсь прокуратурань органтнэсэ. 2001 иестэ ушодсь важодеме прокуратурань следователекс Хакасия Республикань Черногорск ошсо. 2016 иестэ аравтозель Хакасия Республикань Абакан ошонь прокуроронь васенце полавтыцякс, 2017 иестэ – Абакан ошонь прокуророкс, 2018 иестэ – Дагестан Республикань прокуроронь полавтыцякс. 2019–2023 иетнестэ важодсь Дагестан Республикань прокуророкс.
Од таркасонть карми ветямо сэтьмечинь, антитеррористической ванстомань, федеральной законодательствань топавтомань кевкстематнень.
«Вейсэ поладсынек сеть тевтнень топавтоманть, конатнень путынзе икеленек Президентэсь. Те эрицятнень сэтьмечист ды бизнесэнь олячинть топавтомась, госсредстватнень видестэ тевс нолдамось, республикань бюджетэнтень кандозь ёмавкстнэнь велявтомась», – тешкстась Мордовиянь Прявтось Артём Здунов.
«Ёвтан сюкпря Мордовиянь Прявтонтень Артём Алексеевич Здуновнень явозь кемеманть кис. А кавтолдан, важодемань опытэм лезды монень лезэвстэ топавтомс путозь тевтнень. Анокан депутаттнэнь марто панжадо кортамонтень», – мерсь Алексей Ежов.
Сессиясонть максозель 2023 иень региональной Правительствань отчётось. МР-нь Правительствань Председателесь Дмитрий Поздняков тешкстась, Мордовиясо эрязасто стявтовить эрявикс объектт, одкстомтови ды витневи нормативной вешематнень коряс инженерной инфраструктурась. Промышленностень предприятиятне, велень хозяйстватне натой истят а шожда экономической условиятнесэ кастыть виест, теить од важодема таркат.
Совавтозь полавтомат «О мерах социальной поддержки отдельных категорий населения, проживающего в Республике Мордовия» Мордовия Республикань Закононтень. Сеть ломантне, конат казезь «Житель осажденного Сталинграда» тешкссэ, кармить кандовомо Ине Отечественной войнань ветеранонь категорияс ды те статусонть коряс тенст максовить социальной ванстомань гарантиятне.
Ваннозельть лия кевкстематкак.