МР-нь Пресс-центрасо ютась вастовома, конась алтавсь «Защитники Отечества» фондонь филиалонь важодемантень. Промксонть ветясь прявтось Алексей Герасименко. Тешкстасынек, минек масторсо фондонь филиалтнэ панжовсть РФ-нь Президентэнть В. В. Путинэнь кармавтоманзо коряс. Саранскойсэ филиалось ушодызе важодеманзо июнень 1-це чистэ ошонь куншкакуросо – Полежаевень ульцянь 113-це кудосонть (икеле тосо ульнесь Эйкакшонь больницясь).
– Минь макстано лезкс боевой действиянь демобилизованной ветерантнэнень, военнослужащейтненень, истя жо семиятненень, кинь малавиксэст чавовсть СВО-со. Важодеманок ладязь истя – вейке таркасо теевить-топавтовить зярыя вешемат. А эряви чийнемс эрьва кодамо инстанциява. Улить социальной координаторт, конат тонавтозь. Сынь кирдить сюлмот пшкадицятнень марто. Ошсо 5 соцкоординаторт ды 20 – республикань районтнэсэ. Од иентень минек отделениясо панжовить эштё 5 ставкат, – пачтясь Алексей Герасименко.
Ниле ковтнень перть тей пшкалесть малав 2700 ломанть. Сынь кевкстнесть социальной лезкстэ, боевой действиянь ветеранонь удостоверениянь максомадо, медицинской лезксэнь коряс, надобия мельга, реабилитациянь, санаторно-курортной лецямонь коряс.
Теде башка, фондонь филиалов сакшныть малав 17 специалистт (МФЦ-стэ, Социальной фондсто, министерствань ды ведомствань важодицят, трудонь ды занятостень коряс специалистт, психологт, педагогт, волонтёрт). Ковозонзо весть вастовома ютавты МР-нь прокурорось С. Ю. Лапин.
Эряви меремс, филиалонть лездамонзо вельде 33 ломанть мусть важодема таркат. СВО-со чавовозтнень эйкакштне якасть оймсеме «Артек» лагерев. Психологтне важодить сетнень марто, кие тенст пшкали мелявксост ды кевкстемаст марто.
А. В. Герасименко пачтясь вейке тамашань тевде, конань витизь филиалонь соцкоординатортнэ. Спецоперациянь вейке ветеранось пшкадсь истямо кевкстема марто – сонензэ сакшныть аволь эсензэ долктне.
2020 иестэ саезь цёрантень «Госуслугасо» кармасть сакшномо апак пандо штрафтнень кис сёрмат Кемеровской областьстэ. Тосо эри должникезэ-«двойникезэ». Цёратнень весе ульнесть вейкетть – лемест, фамилияст, тетялемест ды чачома чист! Судось арестовизе сонзэ банковской счётонть ды банконь карточкасто ярмакт эзь саеве. Цёрантень савкшнось пшкалемс адвокаттнэнень, аштемс эсензэ кисэ судсо ды каявтомс лангстонзо лия ломанень долктнень.
Седе тов ушодовсь специальной военной операциясь. Александр тосоль пельиень перть. Сон служась пехотань войскатнесэ, ульнесь мотострелоконь должностьсэ. Тосто самодо мейле апак учонь тев – «двойникенть» пельде штрафтне таго сакшность тензэ. Колмо иень перть сынст покшолмаст кармась малав 100 тёжат целковойть.
Ветеранось пшкадсь «Защитники Отечества» фондонь филиалов. Юристтнэ ванкшнызь документтнэнь ды лездасть сёрмадомс яволявтома, конань кучизь РФ-нь Цифровой развитиянь, связень ды массовой коммуникациянь министерствав. Ведомствась куроксто ванкшнызе яволявтоманть ды витинзе даннойтнень базанть. Ветеранонть лангсто весе долктне каязельть. Мезть ансяк а эрсить эрямосонть, те тамашась зярыя иень перть эзь витеве. Ней, кемтяно, лия ломанень штрафтне а кармить сакшномо тензэ.
Татьяна Маторкина