Ромодановань райононь историко-краеведениянь музейсэ панжовсь «СВОи герои» экспозиция. Эйсэнзэ невтневить спецоперациясо чавовозтнень фотографияст ды лия ули-парост. Выставканть панжомо сакшность «Защитники Отечества» фондонь филиалонь важодицятне. 

Гвардиянь майоронть Юрий Архиповонь авазо музеев максызе цёранзо военной форманть. «Кадык од ломантне содыть геройтнень подвигтест, ледстнить тиринь масторонь ванстыцятнень», – мерсь Анна Семёновна.

Юрий Архипов чачсь 1985 иестэ Ромоданова посёлкасо. Школадо мейле тонавтнесь Казанень высшей военно-командной училищасо, конань прядызе якстере диплом марто. Боевой кизэ ушодовсь Северной Кавказсо, ульнесь Чечнясо ды Грузиянь-Осетиянь тюрематнесэ. Спецоперациянь васенце читнестэ саезь передовойсэль. 2022 иень мартсто стакасто ранязель кедьс, ансяк ковгак эзь туе, путсь жгут ды поладсь тюреме. Ульнесь батальононь командирэнь полавтыцякс, лемдсть эйсэнзэ «Мордвинэкс».

Офицерэсь чавовсь тедедень февральстэ, понгсь миномётонь леднема алов. Школасонзо панжозель «Героень парта». Гвардиянь майорось Архипов казезь «За боевые заслуги» медальсэ, «За заслуги перед Отечеством» меч марто II-це степенень орденсэ ды Мужествань орденсэ (куломадонзо мейле).