Неть читнестэ Мордовиясто специальной военной операциянь ютавтомань таркасонть улиця земляктненень, Тиринь масторонь ванстыцятненень кучозь гуманитарной лезксэнь кавто машинат.

Весемезэ жо, кода ёвтнесь «Российский Фонд мира» Мордовиянь региононь отделениянь правлениянь председателесь, «Единая Россия» партиянь председателень региононь Общественной приёмноень руководителень полавтыцясь Ольга Филёткина, иень перть республикастонть кучозь гуманитарной лезксэнь ниленьгеменде ламо партият: ярсамопель, оборудования, автотранспортонь витнемань туртов эрявиксэнть ды лия мезе марто.

«Весе те рамазь предприятиятнень, учреждениятнень ды организациятнень, бизнес-структуратнень ды республикань эрицятнень пельде пурназь ярмактнень лангс. Весемезэ пурназь 130 миллиондо ламо целковойть, сынст ютксто 30 миллионтнэнь эсь олясо пурнызь эрицятне. Неть ярмактнень лангс минек боецтнэнь туртов рамави весе эрявиксэсь. Кода икеленсетнеяк, те гуманитарной лезксэсь пурназь яволявтоматнень коряс, конатнень пачтизь Мордовиянь Прявтонть юрсо важодемань группантень боевой подразделениятнень командиртнэ. Рамазь тепловентиляторт, бензинэнь ды дизелень генераторт, квадрокоптерт, рацият, дронт ды ламо лия мезе», – тешкстась Ольга Филёткина.

«Российский Фонд мира» МРО-сь кирди кеме сюлмот «Единая Россия» партиянь региононь Общественной приёмноенть марто, ков сыть яволявтомат аволь ансяк боецтнэнь пельде, истя жо СВО-нь участниктнень семиятнень ды малавикстнэнь пельде. Общественной приёмнойсэнть истя жо важоди информационной куншкакуро.
«Военнослужащейтнень малавиксэст эли эсест боецтнэнь пшкадемаст а кадовить вановттомо, лисиця кевкстематнень витемантень вейсэндявить эрьва кодат министерстватне ды ведомстватне», – мерсь Ольга Филёткина.

Сон ёвтась покш сюкпря водительтненень, кить пачтить гуманитарной лезксэнть эрявикс таркатнес. Истя жо ёвтась покш сюкпря автопредприятиятнень водительтненень, конат эсь автобустнэсэ пачтить тиринь ёнксов отпусков сыця специальной военной операциянь участниктнень.
Военнослужащейтненень лезксэнь пурнамонь коряс важодемась поладови.