Отяжелень райононь прявтось Виктор Григорьевич Прокин ломанесь ламо а кортыця, ансяк, кода невти эрямось, истятнэ, конатне чаво валт а ёртнить, самай седе ламо теитькак. А весть савкшнось тензэ пшкадемс минек газетань сёрмадстоманть коряс.
Сонськак эрзянь ломань, свал чарькодьсамизь. Каршон свал мери: «Кода эно эсенек ломанентень а лездамс, эсенексетнень а кадтано!» Вана уш кото иеть Виктор Григорьевич тиринь Отяжелень райононь прявт.
Сон чачсь-кассь Чукалы-на-Нуе тескень вишка велинесэ 1962 иень июнень 2-це чистэ, конась ней уш, ловт, ёмась масторлангстонть. Семияст ульнесь покш: тетязо-авазо трясть-кастсть ниле цёрат ды колмо тейтерть. Тетязо кулось рана, секскак весенень савсь вишка пингестэ саезь варчамс велесэ важодемань танстенть. Кардазсо трявиця ракшатнень эрявсть андомс-симдемс, анокстамс тикше, кочкомс пандятнень, мотыжамс тингенть… Сестэ уш Виктор Григорьевич сайсь мель сюлмамс прянзо велень хозяйстванть марто, седе кеместэ чарькодемс зоотехникень тевенть. Кавксо класстнэнь прядомадо мейле васняяк тусь Козловка велень СПТУ-в, тонавтнесь трактористэкс-машинистэкс, мейле – Н. П. Огарёв лемсэ МГУ-нь аграрной факультетсэ зоотехникекс, седе видестэ – квалификациязо – «Зооинженер». 1985 иестэ, высшей образованиядо дипломонть идезь, од специалистэсь сась роботамо старшей лаборантокс, научной сотрудникекс племенной тевень Весероссиянь НИИ-с. Ансяк те тевенть лангс Прокин эзь лотка, кармась тонавтнеме аспирантурасо ды 1990 иестэ тензэ максозель велень хозяйствань наукань кандидатонь учёной степенесь. Тешкстама, Прокинтнэнь семиясто весе эйкакштне тусть виде киява, лиссть ломанекс, муизь эсест таркаст эрямосонть. Нать, эйкакшпорасто те туи, бути совавтозь эйдентень важодемань сяткинесь, ды аволь мельде-валдо, сон кандсы те обуцянть весе эрямованть.
1991 иестэ од учёноесь кармась важодеме прявт зоотехникекс Рузаевкань райононь В. И. Ленин лемсэ племсовхозсо, мейле сон лемдезель «Лето» агрофирмакс. Кото иень ютазь ладизь сонзэ прявтокс. Истя ютазельть важодемань весе кузтематне, алдо саезь верев, пурназельть содамочитне. Виктор Григорьевич кармась племенной ракшатнень кастомань коряс сехте чарькодиця экспертэкс республикасонть, ды 2002 иестэ Прокинэнь тердизь те ёнксонть кемекстамо отделэнь прявтокс Мордовиянь Минсельхозов. 2005 иестэ республикань Прявтось ёвтызе мелензэ кучомс дока специалистэнть Дубенкань райононь Администрациянь руководителекс. Кода ёвтни Виктор Григорьевич вейке газетантень интервьюсо, вастызе те аравтоманть апак музгорде, теке солдат. Макссть приказ – эряви топавтомс. Ды сонстензэяк кабинетсэ важодемась ульнесь аволь обуцянзо коряс, эрявсь седеяк келейгавтомс содамочитнень, варчамс лия таркасо. Малав кевейкее ие Прокин ульнесь Дубенкань прявтокс, ламо мезе топавтозель, кепедезель велень хозяйствась, стявтозельть од объектт. Ансяк таго од полавтомат учость эрямосонть. 2016 иестэ Мордовиянь руководствась Виктор Григорьевичень кучизе тиринь Отяжелень райононь прявтокс. Неть читнестэ топодсть кото иеть, кода сон те таркасонть. Роботамо лувозо эзь полавтово: сы валске рана, туи позда чокшне.
Виктор Григорьевич – МР-нь велень хозяйствань заслуженной роботник, Государственной премиянь лауреат. Прокин а вечки шнамс прянзо, ялатеке районось ламо невтевкстнэнь коряс саи васенце таркат. Ды важодемадонзо кортыть нацпроекттнэнь коряс китнень, ульцятнень витнемась-петнемась, од строявкстнэнь стявтомась, се, кода полавтовсь Отяжелень посёлканть чачозо.
Течи, июнень 2-це чистэ, Виктор Григорьевич Прокин тешксты чачома чинзэ – юбилеензэ! Цёраломанень туртов те ансяк виень кемекстамонь шка. Арсетяно тензэ кеме шумбрачи, семиясо уцяска, важодемасо од изнявкст, мелявкстнэнь шождасто топавтомат, ламо лезэв тевть тиринь ёнксонть туртов ды зярдояк а стувтомс эсензэ эрзянь раськенть!