Чарькодемась, вейке-вейкенень мелень явомась ды, нама, вечкемась вана уш ведьгеменде ламо иеть кирди вейсэ Отяжелень райононь Трокс Кужо велень эрицятнень Василий Николаевич ды Тамара Кузьминична Дединтнэнь. Неть валдо ломантне пек лембестэ вастымизь эсь кудосост ды ёвтнесть эрямодост, уцяскасо ды вечкемасо ютавтозь иетнеде.
Дединтнэ трясть-кастсть вете эйкакшт: кавто тейтерть (Ирина, Татьяна) ды колмо цёрат (Николай, Виктор, Сергей). 1988 иестэ Тамара Кузьминичнанень максозель «Медаль Материнства» II-це степенень медалесь. Ней эрямост мазылгавтыть вете нуцькаст ды колмо правнукост. Тамара Кузьминична ды Василий Николаевич пек вечксызь эсь эйкакштнень ды весе оймест максыть нуцькатненень.
Мирденть-нинть васенце вастовомаст лиссь Василий Николаевичень тиринь велесэнзэ – Трокс Кужосо, зярдо сынь ульнесть эштё овсе эйкакшокс. Ансяк вана уцяскась сынст седейтнень вейсэндинзе ламо иетнень ютазь, зярдо чарькодсть, вейке-вейкевтеме ней уш сынь ковгак.
– Минек содавтымизь Света ялгам, сонзэ авазо ульнесь Трокс Кужонь. Весть Света марто бабанстэнь вишнянь кочкамо сакшнынь монгак ды теевинь содавиксэкс шабра цёрыненть марто. Сон монь кевкстнимим, костонян, кода школасо тонавтнян, кодат отметкан. Аламос кортнезь, максыя адресэм. Те ульнесь 5-це классо, – ёвтни Тамара Кузьминична. – Мейле, весе иетнень перть мартонзо вастневкшнинь ансяк кавксть – 8-це ды 10-це класстнэсэ, зярдо истя жо сакшнылинь ялган марто. Весе кортамонок, оймень чамдоманок ды седеень эждеманок ульнесть сёрматне, конатнеде сядольть. Минь туинек мельс вейке-вейкенень, паряк, тень коряс, сёрматнень ульнесь поладксост.
Кода тешксты Тамара Кузьминична, те ней улить телефонт, Интернет, вейке-вейке марто кортамонть те пек шождалгавты. Сестэ жо ульнесть ансяк сёрмат, теке марто эрьвасонть ульнесь ойме, седейлембе ды эрямо.
– Неть сёрматнень ванстынь кувать. Эйкакштнеяк уш касокшность, нуцькат ульнесть. Сеедьстэ яла озылинь, таргилинь сёрматнень, ловнылинь сынст ды ледстнилинь сеть шкатнень, од порань ёжомарямотнень, – корты Тамара Кузьминична.
Сонсь Тамара Кузьминична чачсь-кассь Орданьбуень райононь Орозбиесэ. Тетянзо-аванзо, Кузьма Дмитриевич (Ине Отечественной войнань ветераноль, васенце группань инвалидэль) ды Евдокия Яковлевна Аржаевтнень семиясо эйкакштнеде ульнесть колмо: кавто цёрат ды тейтерька. Тома уш вишка шкасто ульнесь пек бойка ды ёроков, секскак школасо тонавтнемстэ отрядной вожатойкскак кочкакшнызь, лиясто тонавтыцятненьгак полавтыль ды ветиль тарказост урокт. Тейтересь пек вечкиль ракшат, секскак школанть прядомадо мейле тонавтнесь Краснослободскоень зооветтехникумсо.
Василий тонавтнесь электрикекс ды весть, важодемань шкасто, лиссь зыянов тев. Цёранть марто мезеяк берянь эзь лисе, ансяк армияв сонзэ уш эзизь сае. Пек мелявтсть весе, эдь сеть шкатнестэ ульнесь визькс а служамс. Мелявтсь цёрась сень коряскак, вечкевиксэзэ а моли тензэ мирденень. Тамара тень коряс эзь арсеяк, зярдо тензэ топодсть 18 иеть ды Василий тердизе мирденень, сеске мерсь, моли. Ды те шкастонть саезь седе уцяскав семия уш арасель.
– 1972 иень маень 10-це чистэ минь венчинек, – тешксты Тамара Кузьминична. – Свадьбанть жо налксинек малав ковонь ютазь. Ававтом, Анастасия Семёновна, ды атявтом, Николай Владимирович, пельсть, кабу сеске аволинь оргоде. Семияст сынст ульнесь покш, эйкакштнеде сисемельть, весень эрямост эрявсь ладямс, сюпавчись жо арасель. А мон эзинь вано кодамояк сюпавчи лангс. Седейсэнь ульнесь вечкема.
Ушодовсь вейсэнь эрямось. Мельга-мельцек чачсть вете эйкакшост, конатне аштить ней васень лездыцякс ды кемемакс. Василий Николаевич весе эрямонзо перть роботась колхозсо трактористэкс ды ульнесь фермасо ракшань трицякс. Тамара Кузьминична кото иеть важодсь скалонь потявтыцякс, сисем иеть ульнесь фермань прявтокс а мейле, 23 иеть, Вечерлеень ветучасткасо врачокс-эпизоотологокс.
– Важодемань ким ушодыя скалонь потявтыцякс. Сестэ эдь потявтылинек кедьсэ, аппаратт арасельть ды эрьва чистэ кавксть, лиясто колмоксть потявтылинь 16 скалт. Те пек покш ды стака робота. Эрьва ковсто передовикекс ульнинь, аволь весть вымпел тень максокшность, – ёвтни Тамара Дедина. – Паро важодемам редизь ды аравтымизь фермань прявтокс. Сисем иеть топавтынь те тевенть. Весть колхозонь председателесь тень мери: «Тамара Кузьминична, мезе тесэ, фермасо, теят, азё высшей образования мельга». Монень уш 44 иеть ульнесть, вете эйкакшон, ялатеке молинь тонавтнеме Н.П. Огарёв лемсэ МГУ-нь Аграрной институтов. Сюкпря, мирдем «сырнень», эзь моле монь бажамон каршо, нолдымим. Сюкпря аванень, конась 15 иеть эрясь минек кедьсэ, вансь эйкакштнень мельга ды кудоютконь тевтнесэ лездась.
Тонавтнемась аванть туртов мольсь шождасто, эдь сон пек парсте уш весементь содылизе. Кода мерсь, эрявсь ансяк «корочканть» получамс.
– Зярдо зооветтехникумонть прядомадо мейле карминь роботамо, ветврачокс ульнесь Иван Петрович Таряйкин – пек превей ломанель. Ды весе эсь содамочинзэ ды маштомачинзэ монень максынзе. Сон аволь ёвтнесь, сеске тевсэ кармавтыль тонавтнеме. Мериль яла, Кузьминична, давай укол путт, санс варчак, вазыямодо мейле кадовксонть ванськавтык ды седе тов. Мон университетэв молинь, уш весементь содылия ды маштылинь эрьва тевс, – кемексты Тамара Кузьминична.
Университетсэ дипломонть максомадо мейле Т. К. Дединань сеске саизь Вечерлеень ветучасткас ветеринарной врачокс. Эряви меремс, тевесь те а шождатнестэ. Тамара Кузьминичнань вановт ало ульнесть Отяжелень райононь кавксо велеть. Эрьва кудосонть сестэ кирдильть 3-4 скалт ды ламо лия ракшат. Те ней весе веленть келес 1-2 скалт кадовсть. Эсесткак хозяйстваст аволь вишкинель – лишме, кавто скалт, колмо авака тувот, реветь, саразт ды седе тов.
– Роботылинь чинек-венек. Лиясто козонь тердилимизь, тоско удылиньгак. Скалось кармиль вазыямо, стакасто молиль. Зярс весементь тейсак, ве ушосонть, ковгак а сыргат. Сестэ транспортонь коряс тевтне аштесть стакасто. Кодамо ардомапель яла тень понгиль, сеньсэ сыргилиньгак, – корты авась. – Весе райононь келес ды томбалеяк содылимизь. Ломантне вечкилимизь. Кортыльть яла: тон, Тамара Кузьминична, аволь ансяк ракшат лецят, тон алкуксонь врач. Важодемасо прявт аравтлувом ульнесь – тевенть ушодомс Пазонтень озномасо. Ков ды кинень а молилинь, свал крёстылия эсь прям, ловнылия 90-це Псалманть ды ушодылинь лецямо. Кидеяк эзинь визде, кидеяк эзинь пеле. Те сехте паро тев. Пазось зярдояк а кадтанзат. Ды весе эрямон перть истя эрян, Пазонтень кемезь. Эйкакштненьгак истя тонавтан.
Тамара Кузьминична тешкстась, весе эрямонзо перть роботась ломань ютксо. Ды эсензэ туртов вадрясто кемекстызе – ломантнень эряви вечкемс. Зярдояк киненьгак иля тее берянь, кодамо бу ломанесь аволь уле, весементь кирдть эсеть потсо. Ды ломантне тень вадрясто чарькодизь. Те шкас пшкалить тензэ куш кодамо мелявксонь коряс, весень кунсолосынзе, ёвты, кода теема.
– Эсень профессиям пек вечкилия. Те монь каштанчим. Мон муия эсь прям ветеринариясо, 61 иес роботынь. Покш сюкпря Отяжелень ветеринарной участкань прявттнэнень, башка – Юрий Николаевич Егорцевнень. Алкуксонь ломанесь, – тешксты Тамара Кузьминична.
Весе парсте чарькодтяно, эрямось аволь свал мелявкстомо ды маней. Эрьва мезе эрси. Ансяк Дединтнэнь семиясо весе мелявкстнэнь бажить ютамс шождасто. Ды тесэяк улить эсест салавачист.
– Весементь эряви теемс вейсэ, сестэ семияськак карми кеме ды эрямояк весе кармить ояксчисэ. Велесэ эдь свал улить тевть. Ракшатнень туртов тикшентькак эрявсь анокстамс, кудоютконь тевтненьгак теемс. Минь свал весементь теилинек семиянек. Вейсэнь важодемась кода-бути малавгавты, секскак эйкакштненьгак вишка иестэ саезь тонавтынек важодемантень. Истя жо нуцькатненьгак кастынек. Ды, арсян, те минек лиссь а беряньстэ. Весе получасть высшей образования. Эрьвась муизе эрямосонть эсь тарканзо, эрьвась кармась паро ломанекс. Те эдь сехте покш питне тетятнень-аватнень туртов. Ней покш мельсэ учотано эйсэст инжекс. Седе пек нуцькинетнень, конатне кенярдовтыть ды мазылгавтыть сыречинек, – кемекстызе Тамара Кузьминична.
Ноябрянь 7-це чистэ Тамара Кузьминична тешксты Чачома чинзэ. Те чистэнть вейс пурнави Дединтнэнь весе кудораськест. А зярдо вакссот эйкакштне ды нуцькатне – те сехте покш ды питнейдеяк питней казне.
Юлия Еремина