Покш Березникень кудонтень-интернатонтень – 55 иеть!
Ведьгемень вете иеде икеле Покш Березникень райононь мазый таркасо, пиче вирьсэ (покш кинть эйстэ аволь васоло), панжозель сыре ломантнень ды инвалидтнэнь туртов кудось-интернатось. Те учреждениянь архивсэ ванстовиця конёвтнень коряс васень шкасто тов ильтякшность сыре ды стакасто сэредиця зыянов тевень теицят (икелень уголовникть). Аламо шкань ютазь тов кармасть саеме лия ломанть. 1968 иестэ те кудонь-интернатонь кенкштне панжовкшность чумондозь икелень ашо гвардейской генералтнэнь, офицертнэнь ды аристократтнэнь туртов. Седе тов те кудонтень кармасть пачтямо сетнень, кить кадовсть вановттомо малавиксэст ёндо. Тесэ улить истяткак, кить сынсь сайсть мель эйкакшост олякстомтомга туемс эрямо тиринь кудосто.
Те социальной учреждениянть малас самсто аволь ансяк ванькс коштось кенярдовтымизь, истя жо сеске сельмес каявсть мазый, эрьва кодамо тюсонь цецятне. Весе территориясь ванькс, моли ёвксонь ошке ёнов. Улить оймсема таркат, яннэть, конат вельтязь асфальтсо.
– Те мазычинть тесэнь эрицятненень казить эсенек важодицянок, – вастовомсто мерсь тенек Покш Березникень кудонь-интернатонь прявтось Александр Петрович Акайкин. – Неень шкасто тесэ эрить 125 ломанть. Сынст туртов ули весемесь: валдо ды лембе комнатат, ярсамо- ды оршамопельть. Эрьвантень, бути эряви, максови медицинань лезкс.
ЭРИЦЯТНЕДЕ
Котошка иеде теде икеле тесэ теевинь содавиксэкс Московсто те учреждениянтень эрямо сыцянть марто. Ледстневи, сестэ цёрась видькстакшнось, келя, эрямскак тензэ а истя ламо кадовсь, кадык сыречись юты сэтьместэ ды аволь ськамонзо. Ней жо мельспаросо те учреждениясонть важодицятнень пельде маринь, сон полады эрямонзо ды ёжозо паро!
Нама, истятнэде а пек ламо тесэ. Седе сеедьстэ тей пачтить сетнень, кинь улить ламо эрьва кодат ормаст.
– Лиясто берянь ёжосо кувать кирдьсызь кудосо медицинань лезкстэме, ды тей пачтямодост мейле пек седе стака эрси кода эстензэ сэредицянтень, истя жо мельганзо якицятнененьгак, – пачтясь Александр Петрович. – Тесэнь эрицятнень ютксо улить истят сыре ды стакасто сэредицят, кить эрить минек кедьсэ пек умок. Невтемакс, Пелагея Н.-нень те иестэ топодсть 93 иеть, колмо аванок тешкстызь 89 иест!
ВАСЕНЬ ТАРКАСО – ЛОМАНТНЕНЬ
ШУМБРАЧИСТ
А мезть сёпомс, ней од ломантненьгак пеест сэредить сеедьстэ, а мезть кортамс сыретнеде… Те учреждениясонть эрицятнень секе-тев савкшнось пачтнемс Покш Березникень райононь поликлиникав, таркась аволь пек маласо. Транспорткак эрявсь муемс, сыре ломанентькак муцямс…
Александр Петрович покш кенярксчисэ пачтясь аволь пек умок сынст учреждениясонть стоматологиянь кабинетэнь панжомадонть. Ней сынст ули эсест врачост-стоматологост. Те тевенть кармась топавтомо А. Г. Небайкина. Альбина Геннадьевнань Покш Березникень муниципальной районсо ламот содасызь кода парсте тевензэ топавтыця врачонть. Сон, ловт, весе важодемань пингензэ алтызе медицинантень. Ней стака ловомскак, зяро ломанть олякстомтсь пеень ормадо колоньгеменде ламо иень перть.
Кода мерсь Александр Петрович, пеень лецямонь кабинетэнть панжомасо покш путовксозо «Птицефабрика «Атемарская» ОАО-нь прявтонть А. В. Щемеровонь. Александр Валентинович стоматологиянь кабинетэнть туртов оборудованиянь рамамс макссь 58 350 целковойть.
Тесэ сыре ломантнень шумбрачист свал ванкшны врачось-терапевтэсь И. Е. Назарова. Сеедьстэ тенст сакшныть истят специалисттнэ, кода окулист, дерматолог, психиатор, хирург. Бути кинень эряви домка лезкс, ильтить эйсэнзэ «Комсомольская ЦРБ» МР-нь ГБУЗ-в.
Нама, тесэ васень таркас аравтыть эрицятнень шумбрачист ванстоманть ды витеманть. Теке шкасто теить эрямонь истят условият, штобу ломантне марявольть пряст, прок мерят, эсест кудосо. Эрьва комнатасонть эрить 1–3 ломанть, ули весе эрявикс мебелесь. Холлтнэсэ понгавтозь покш экран марто телевизорт, улить чевте озамо таркат. Эрьва отделениясонть аравтозь душевой, кинь ули мелезэ молемс баняв, сонгак ули тосо, ансяк башка зданиясо.
КОЛЛЕКТИВЕСЬ
ВАЖОДИ СЕДЕЙШКАВА
Неень шкасто тосонь эрицятнень мельга яки ды эйсэст леци 81 важодиця. Весенень покш мель яви тевензэ парсте содыця отделениянь прявтось, врачось-терапевтэсь Т. Н. Кандрашина. Важодицятнень ютксто тесэ улить истят, кить топавтыть тевест колоньгеменде ламо иеть. Неть: Г. Ю. Каледина фармацевтэсь, медицинской сестратне Т.П. Карпушкина ды Т.И. Кузина, Е.М. Тренина поварось. Комсте ламо иень перть медицинской сестрань тевенть топавтыть О. Н. Ёжикова, С. Н. Чегодаева, сестра-хозяйкась Л. И. Лямзина, санитаркатне О. И. Ёжикова, Н. И. Подлёднова. Весе сынь, ков виест сатыть, седейшкава якить сыре ды стакасто сэредицятнень мельга.
Текенень поладсынек, весе содамочист максыть тей важодеме сыця одтнэнень, тонавтыть эйсэст улемс седеймарицякс, паронь арсицякс. Тосо эрьва эрицянтень явомс башка мель, истя зярдо-бути сынст тонавтокшнызь ветерантнэ, ней те тевенть поладыть сынь.
Те учреждениясонть улицятнень эрямост витемга, тенст паро ёжомарямонь каземга сеедьстэ тей сакшныть Покш Березникень муниципальной райононь Культурно-досуговой центрань художественной самодеятельностень коллективтне, декоративно-прикладной шкинемань кедьчелькев ломантне, библиотекань важодицятне, школасо тонавтницятне, волонтёртнэ.
ПИДИТЬ-ПАНИТЬ ТАНТЕЙСТЭ
Сыре ломантненень ды стакасто сэредицятненень эряви пидемс-панемс аволь истя, кода шумбра ломантненень. Тесэ сынст андыть нилексть, весе ярсамопелесь анокстави медицинань вешематнень мельс саезь. Васняяк мельс саеви, кинь кодамо ормазо, кие мезде вечки ярсамо. Сеть, кинь ули виест ды мелест ярсамс столовойсэ, сынсь тов молить. Улить истяткак, кинень ярсамопелесь кандови комнатав, бути эряви, тесэнь важодицятне истя жо сынсь андсызьгак. Нурькинестэ, сынь теить весементь, штобу тосонь эрьва эрицясь маряволь прянзо прок тиринь кудосо.
СЕДЕЙМАРЯМОНЬ ЛЕЗКСТЭНТЬ
Тешкстама, кезэрень шкасто саезь истят учреждениятненень максыть лезкс седеймариця ломанть. Паро, чевте седей ломанть улить неень шкастояк. Сынь максыть лезкс эйкакшонь кудотненень, сыре ломанень ды стакасто сэредиця учреждениятнесэ эрицятненень. Вере минь ледстинек «Птицефабрика «Атемарская» ОАО-нь прявтонть Александр Щемеровонь, кие лездась стоматологической оборудованиянь рамамс, а седе вишкине лезкс тенст максы Кедяров предпринимателесь. Мордовиясо сельхозобъектэнь строицясь аволь ансяк ярмаксо лезды, бути эряви, важодицяткак кучи, сонськак сы.
– Тенек весе лездыцятненень минь ёвтатано покш сюкпря, – мерсь Александр Акайкин. – Неть: «ЭМ-КАТ» ООО-сто К. Ш. Мангутов, «Лидер-Компаунд» АО-сто А. В. Бузлаев, «Электровыпрямитель-ЗСП» ЗАО-сто Д. В. Фомичёв, «Старость в радость» Московонь седеймарямонь фондонь прявтось Е. А. Олескина ды лият.
Нама, сеть ломантнень, кить, мезеяк лангс апак вано, бажить лездамс нужасо эрицятненень, паро тевест вановттомо а кадовить. Кадык аволь сеске, паряк, шкань ютазь те парось велявты эстест, бути аволь эстест, эйкакшост, нуцькаст туртов. Истя ульнесь икеле, истя ули нейгак!
Валентина Юдина