Орданьбуень аватнеде, «сиянь» волонтёртнэде, конатне теить весементь минек цёратненень, специальной военной операциянь участниктненень, лездамга, минь уш ёвтнекшнинек. СВО-нь участниктнень туртов кекшемань алтыматнень кодамонь-сюлмамонь коряс куронть панжизе ды вети райононь ДК-нть юрсо декоративно-прикладной искусствань отделэнь прявтось Людмила Викторовна Ерошкина.
Кундамс те тевентень аванть кияк эзь кармавто. Ушодсь сонсь ды аламонь-аламонь эсь перьканзо пурнынзе лиятнень. Течи «сиянь» волонтёртнэнь-лездыцятнень куронтень совить сонсь Людмила Ерошкина, истя жо Антонина Кудашкина, Анна Татаринова, Вера Дубинкина, Татьяна Новикова, Татьяна Сербул, Татьяна Коннева, Мария Аппанина, Любовь Кириллова, Вера Ларина, Вера Макеева ды лиятне. Лиясто пурнавкшныть кеменьшка ломанть, лиясто седе аламо. Кинь шказо пры, се сы лездамо. Неть ломантне бажить куш мейсэяк лездамс изнямонть малавгавтомга.
Невтемга, Вера Дмитриевна Ларина кекшемань алтыматнень кодамонь куронтень сась февральстэ. Весе те шканть перть сон аволь ансяк те тевенть топавты, истя жо сты цёратнень туртов оршамопельть, нардамот, пацинеть. Тундонь каникулатнень шкасто Вера Дмитриевна марто сакшнось Матвей нуцьказо. Сон ванызе, кода вейсэ бабанзо марто лия аватне кодыть алтыматнень, ёвтызе эсь мелензэ варчамс. Эдь цёрынесь парсте соды, мейс теевить неть алтыматне ды ков сынь кучовить. Ды весе каникуланзо ютасть «сиянь» волонтёртнэнь ютксо – тонавтнесь мартост тевентень, варчнесь виензэ.
– Те цёрынесь покш невтема весень туртов. Кадык овсе вишкине, ансяк парсте чарькоди – тевесь пек эрявикс. Ды теньсэ ули сонзэяк путовксозо, – тешксты Людмила Ерошкина. – Од ломантне, саеде пример Матвей лангсто.
Неть читнестэ миненек сась куля: аватне кодызь-анокстызь кекшемань сядоце алтыманть. Те покш ды эрявикс тев. Ды эрьва алтымантень путозь ойме. Кода тешкстыть «сиянь» волонтёртнэ, эсь тевенть сынь ушодыть Пазонтень озномасто, важодеманть пертькак озныть. Кадык кекшемань эрьва алтымась вансты минек цёратнень – сэтьмечинть кисэ тюрицятнень. Тень кисэ сынь крёстыть эрьва сетенть.
«Сиянь» волонтёртнэ, кекшемань алтыматнеде башка, мель явить гуманитарной лезксэнть пурнамонтень. Ней весе улить социальной сеттнесэ ды свал ванкшныть СВО-нь лездамонтень алтазь куротнень. Тосто яла ловныть, мезе эряви минек цёратненень, ды сеске ушодыть пурнамо эрявиксэнть. Мезентькак рамить эсест ярмак лангс, лиянть кандыть малавиксэст-содавиксэст ды райононь эрицятне. Истя, аламонь-аламонь пурныть зярыя посылкат. Зяроксть кучсть посылкат, кияк ней уш а ловияк. Прявтось – лездамс.
– Специальной военной операциянть эйстэ ве ёнов течи кияк эзь кадово. Веенст минек масторонть кисэ аштить тосо, лиятне изнямонть малавгавтомга весементь теить тесэ. Те минек весень вейсэнь тев. Ды лездамо карматано семс, зярс эряви, – кемекстыть Орданьбуень аватне.
Юлия ЕРЕМИНА