Свал, зярдо савкшны улемс «Комбинат теплоизоляционных изделий» ООО-со, кортнемс тосонь важодицятнень марто, сайтянзат истямо ёжомарямо, прок сыть вейке покш семияс. Тосо ломантне вейкест-вейкест чарькодить аволь ансяк пельвалсто, лиясто вейке варштавксосткак ламодо корты.
Истя нейгак, коммерческой кевкстематнень коряс генеральной директоронь полавтыцясь Вячеслав Александрович Ведяшкин кевкстеманок лангс: кинь ланга сёрмадомс? – ялгатнень пурнамодо мейле апак кавтолдо мерсь: Михаил Ведяшкиндэ. Сонзэ валонзо коряс, эрзянь цёрась, ловт, пингензэ перть важоди те предприятиясонть, кодамо тев сонензэ а максыть, свал топавтсы шкастонзо ды парсте. Михаил Максимович зярдояк а пели стакачиде, а кекшни ялгатнень лавтовост удалов.
Нама, минек васняяк меленек ульнесь содамс, кодамо семиясо чачсь-кассь Михаил Максимович, кить ульнесть тетянзо-аванзо, од тевс васенце тонавтыцянзо. Самай теде ушодынек сонзэ марто кортамонок.
Михаил Максимович чачсь-кассь Ицялонь райононь Селища эрзянь велесэ, ламо эйкакшонь триця семиясо. Тетязо ды авазо, Максим Михайлович ды Анна Степановна, те велесэнть ульнесть содавикст, кода паро коень кирдицякс, весенень лездамо бажицякс ды, теке шкасто, аволь кортакшовольть. Сынь васень таркас аравтсть тевест парсте топавтоманть, ламо эйкакшонь трямонть-кастоманть. Максим Михайлович ды Анна Степановна чачтсть-кастсть сисем эйкакшт – сисем шумбра цёрат. Семиясост ульнесь паро кой – покштне лездасть кастомс мельгаст молицятнень. Ламоксть апак кармавто, эрьва эйкакшось содась, кинень мезе эряви теемс. Эрьвась юткстост бажась а ацирьгавтнемс вечкевикс аваст. Анна Степановна жо, ловт, лангозост вайгелензэяк пек эзь кепсе, чумондомояк эзь капша, бути а шкастонзо эли а истя мезеяк теильть.
Михаил Ведяшкинэнь ледстнематнес те шкас кадовсть истят тевтне: тикшень ледеме эли пенгеть уштомапелекс анокстамо цёратне сыргильть вейсэ. Вейсэ тешкстасть кенярксчитнень, вейсэ явсть седейризкстнэнь. Нать, неть ды ламо лия паро койтне, вейке-вейкень ютксо ладямось лездасть аваст туртов эрямс кувака пинге. Анна Степановнанень ульнесть вейксэньгемень колмо иеть, кода тусь эрямосто. Сыречинзэ мазылгавтсть цёратне, седейшкава мельганзо якасть урьватне. Куломадонзо мейлеяк пек ризнэсть кувалманзо малавиксэнзэ, сехте пек веженсь цёразо Михаил. Нать, ламонь семиясо эрси истя: вишкинетнень аволь ансяк тетясь-авась, седе покш эйкакштнеяк ванстыть-кольневтить. Тень лангс апак вано, веженсь цёрась Михаил кассь аволь нузяксокс, важодеме вечкицякс, малавикстэнзэ мелявтыцякс.
Михаил Ведяшкин школанзо прядомадо мейле тусь армияв, масторонть икеле долгонзо топавтомо. Службанзо кандсь васоло Украинасо – Чернигов ды Харьков оштнесэ.
Кавто иетне ютасть куроксто, службадо мейле велявтсь тиринь Мордовияв, васня кармась важодеме Литейной заводсо. Тосо нурька шкань перть важодемадо мейле, 1985 иестэ, мусь эстензэ лия тарка. Сась важодеме Саранскоень «Комбинат теплоизоляционных изделий» предприятияв. Сон васня ульнесь слесарекс, мейле – грузчикекс. 1987 иестэ ладизь мастерэкс сбытэнь отделс. Се шкастонть саезь Михаил Максимович кодамояк лия тев эстензэ эзь вешне, предприятиясь теевсь тензэ омбоце кудокс.
Нама, теньсэ покш путовксост сеть ломантнень, кить лембестэ вастызь од ломаненть, ламос тонавтызь, макссть кемема эсь вийтнес.
Михаил Максимович марто кортамсто сон ансяк паро валсо ледстнесь ды лембестэ ёвтнесь Николай Авдоничев тонавтыцядонзо. Николай Владимирович сеть шкатнестэ важодсь сбытэнь отделэнь мастерэкс, шкань ютазь сонзэ ладизь те отделэнь прявтокс. Николай Авдоничев зярдо-бути сонськак те предприятиянтень сась 17 иесэ цёрынекс ды роботась пингензэ перть. Лоткась важодеме сизьгемень иесэ. Кода мерсь Михаил Ведяшкин, сень лангс апак вано, што сон топавтсь прявтонь тев, ялатеке свал ульнесь прок ялга, свал аноколь лездамс, ёвтнемс эрявикс превс путомат.
Тешкстасынек, Михаил Максимович аволь ансяк седейшкава яки важодема таркав, сон эштё уцяскав семиясояк. Эштё армияв туемадо икеле теевсь содавиксэкс Инелей шабра велень Валентина од тейтеренть марто. Валентина Ивановна алужонзо учось кавто иеть, эштё кавто иеть вастневсть ды ансяк теде мейле венчасть-урьвакстсть.
1986 иестэ одтнэнь чачсь васенце цёрынест, максызь тензэ покштянзо лементь. Ней Максимнень 37 иеть. Сон васня тонавтнесь Саранскоень электронной приборонь техникумсо (ней – колледж), мейле Н. П. Огарёв лемсэ Мордовской государственной университетэнь электронной прибортнэнь факультетсэ. Омбоце цёраст туртов 24 иеть. Сон зярс эштё тонавтни Саранскоень кооперативной институтсо.
Течи ды свалгак Максим Михайлович ды Анна Степановна Ведяшкинтнэ свал кармить невтевксэкс малавиксэст туртов: кода видестэ эрямс, кода трямс-кастомс паро эйкакшт. Эдь ансяк тень вельде кармить улеме виевть тиринь тарканок, вечкевикс масторонок.
Валентина Юдина