Масторлангсо пек ламо эрьва кодат профессият. Весе сынь эрявикст ды мельстуицят. Эрьвась эйстэнек эстензэ кочки истямо тев, конанть марто моли эрямованть, вишка пингстэ саезь уш бажи улемс тонавтыцякс, лецицякс, сроителекс, водителекс ды седе тов. А вана Орданьбуень ОГИБДД-нь прявтось, полициянь майорось Сергей Викторович Аржаев эйкакшпорасто уш бажась кандомс службанть полициясо ды важодемс ломантнень лезэс.
Сергей Аржаев чачсь Орданьбуень райононь Орозбуе велесэ. Тесэ мольсь школав ды тонавтнесь зярыя иеть. Мейле семияст тусь эрямо Куракина велев, косо Сергей поладызе школасо тонавтнеманзо седе тов.
– Мон эштё эйкакшокс арсинь милициянь тевдень, свал ванылинь те профессиянть марто сюлмавозь фильмат ды эсь прям аравтнилия геройтнень таркас, – ёвтни Сергей Аржаев. – Секскак школасо тонавтнемстэ уш ваннынь, косо тонавтыть те тевентень ды ков молема тонавтнеме седе тов. Истя, карминь содамо, Чебоксары ошсо ули Россиянь МВД-нь Нижегородской академиянь филиал ды тов мереви молемс кучомань коряс. Ней те филиалось уш а роботы, кадовсь ансяк Нижней Новгородсо академиясь. Кадовкшнось уш тонавтнемань меельце 11-це классось, эрявсь костояк саемс кучома. Се иестэ Мордовия Республиканть пельде эзть кучне, секскак 11-це классо савсь ютамс тонавтнеме шабра Чувашия Республикань Мишуковань средней школав. Ды направлениянть саинь Чувашиянь Порецкой райононь милициянь райотделстэ. Истя, 2000 иестэ мон карминь Россиянь МВД-нь академиянь студентэкс.
Кавто иетнень Сергей Аржаев тонавтнесь очна, мейле колмотнень – заочна. Тонавтнемань шкась ютась эзь марявояк ды кодаткак стакачитькак арасельть. Эдь тенень цёрась анокстась аволь вейке ие. Весе содыть, академиясонть тонавтнемстэ покш мель явови спортонтень. Аволь весе тень цидярдыть. Аржаевень весемесь лисиль парсте, спортонть цёрась вечкиль. Секскак тонавтнеманть прядызе вадрясто ды шкань апак таргсе кундась тевс. Эсь службанть сон ушодызе шабра республикань Порецкой райононь милициянь отделениясонть. Кавто иень перть ульнесь участковоекс, роботась эрицятнень марто ды теке шкасто седе парсте тонавтнесь эсь профессиянтень.
– Мейле службанть поладыя ДПС-нь инспекторокс, – ёвтни полициянь майорось. – Ды 2011 иенть самс ульнинь те тевсэнть, зярс милициянть эзизь полавто полициянть лангс. Зярдо неть полавтоматне лиссть, ДПС-нь инспекторонь тарка полициясо арасель, ды мон таго молинь участковоекс. Истя важодинь 2016 иес.
2016 иестэ С.В. Аржаев ютась важодеме РФ-нь МВД-нь «Ардатовский» межмуниципальной отделс, кармась истя жо участковоекс. Те таркасонть тензэ савсь важодемс аволь кувать ды теке иень умарьковсто Сергей Викторовичень аравтызь Россиянь МВД-нь «Ардатовский» ММО-нь ГИБДД-нь прявтокс. Отделэсь – кавто районс вейке, важодемась ветяви Орданьбуень ды Отяжелень районтнэсэ.
Кода тешкстызе Сергей Викторович, сынь весементь теить килангсо зыянонть а нолдамга. Сеедьстэ ютавтнить рейдт, пштистэ ваныть руль экшс иредьстэ озыцятнень мельга. Неень шкане те покш зыян ды самай истятнэнь кувалма седе сеедьстэ лиснитькак килангонь кажотне.
– Эдь аволь весемесь ашти эйстэнек. Минь топавтано эсь тевенть, ламо важодтяно ПДД-нь колыцятнень марто. Ансяк вана аволь свал те лезды. Ломантненень васняяк эстест чарькодема, ПДД-нь кармавтоматнень топавтомась – вансты эрямот, – кемекстызе Сергей Аржаев.
Юлия Еремина