Покш Березникень средней школасо панжсть Героень парта – те школань прядыцянть, гвардиянь старшей лейтенантонть Василий Королевонь ледстнемга. Сон чавовсь спецоперациясо воинской долгонзо топавтомсто. Вастовомантень сакшность офицерэнть авазо Мария Васильевна, «Защитники Отечества» фондонь филиалонь важодицятне, школань тонавтницятне ды тонавтыцятне.

Василий Королев эйкакш пингестэ саезь бажась улемс военноекс. Школанть прядомадо мейле мольсь тонавтнеме Ицялонь педагогической колледжев. Седе тов – Санкт-Петербургонь Михайловской артиллерийской военной академияв, конань прядызе 2020 иестэ.

Цёрась специальной военной операциянь васенце читнестэ саезь тюрсь фронтсо, ульнесь толонь взводонь командирэкс. Апелемачинть ды героизманть кисэ гвардиянь старшей лейтенантось куломадонзо мейле казевсь государственной покш наградасо – Мужествань орденсэ.

«Василий Королев – од ломантнень туртов патриотизмань алкуксонь пример, – тешкстась «Защитники Отечества» фондонь филиалонь прявтонь полавтыцясь Ольга Зеткина. – Истят геройтнень вельде эйкакштне кармить содамо алкуксонь мужествадо, присягань кирдемадо ды воинской долгонь топавтомадо. Теде башка, тиринь масторонтень певтеме вечкемадо, конань невтить минек масторонь ванстыцятне».